ភ្នំពេញ ៖ អ្នកតាមដានស្ថានការណ៍នយោបាយនៅកម្ពុជា លោកបណ្ឌិត យង់ ពៅ បានបង្ហាញការយល់ឃើញថា លោក ដូណាល់ ត្រាំ សម្រេចដំឡើងពន្ធគយលើមុខទំនិញកម្ពុជា៤៩%មិនជាប់ពាក់ព័ន្ធបញ្ហាសិទ្ធិមនុស្ស និងលទ្ធិប្រជាធិបតេយ្យនោះទេ។
ការលើកឡើងរបស់លោកបណ្ឌិត យង់ ពៅនេះ បន្ទាប់ពីលោកសង្កេតឃើញក្រុមប្រឆាំង និងអ្នកវិភាគនៅក្រៅប្រទេសបានវិភាគដោយវាយតម្លៃថា ការបន្ថែមពន្ធគយពីសំណាក់លោក ដូណាល់ ត្រាំជាប់ពាក់ព័ន្ធនឹងបញ្ហាសិទ្ធិមនុស្ស និងលទ្ធិប្រជាធិបតេយ្យជាដើម។
តាមរយៈមជ្ឈមណ្ឌលព័ត៌មានដើមអម្ពិលនៅថ្ងៃ៣ មេសា បន្ទាប់ពីមានការផ្ទុះឡើងចំពោះការដំឡើងពន្ធគយរបស់រដ្ឋបាលដូណាល់ ត្រាំ មេដឹកនាំសហរដ្ឋអាមេរិកមកលើមុខទំនិញកម្ពុជា លោកបណ្ឌិត យង់ ពៅ បានលើកឡើងថា ការដំឡើងពន្ធនេះគឺជាញ្ហាសកលមិនមែនធ្វើឡើងសម្រាប់តែកម្ពុជាមួយនោះ គឺមានច្រើនប្រទេសដោយមិនលើកលែង សូម្បីតែប្រទេសជាសម្ព័ន្ធមិត្តនៅអឺរ៉ុបក្តី អាស៊ីក្តី ឬក៏ណាតូក្តី ក៏លោក ត្រាំ បានដំឡើងពន្ធទាំងអស់។
លោក យ៉ង ពៅ បានគូសបញ្ជាក់ថា ការដំឡើងពន្ធ៤៩%របស់រដ្ឋបាល លោក ដូណាល់ ត្រាំ មកកម្ពុជានេះ គឺជាការដំឡើងពន្ធជុំវិញពិភពលោក សម្រាប់គោលនយោបាយពាណិជ្ជកម្ម។
ដូច្នេះ លោកសង្កត់ធ្ងន់ថា ការប្រកាសពីការដំឡើងពន្ធពីសំណាក់លោកត្រាំ មិនជាប់ពាក់ព័ន្ធទៅនឹងបញ្ហាសិទ្ធិមនុស្ស និងលទ្ធិប្រជាធិបតេយ្យ ដូចអ្នក នយោបាយរបស់ក្រុមប្រឆាំង និងអ្នកវិភាគមួយចំនួនតូចលើកឡើងនោះទេ។
លោកបណ្ឌិតបន្ថែមថា “ចឹងហើយទើបខ្ញុំបានបង្ហោះ សារថ្លែងថា វាមិនពាក់ព័ន្ធនឹងបញ្ហាប្រជាធិបតេយ្យ សិទ្ធិមនុស្សអីទេ វាជានយោបាយសកលរបស់លោក ដូណាល់ ត្រាំ ។ ហើយមិនមែនករណីប្រទេសកម្ពុជា ទេ ដូចដែលយើងបានឃើញតារាងពន្ធគយ ដែលគាត់ ដំឡើងនៅថ្ងៃទី២ មេសា ដូចបានផ្សព្វផ្សាយហ្នឹង យើងឃើញដូចតែគ្នា ។ អីចឹងហើយសូមកុំយកបញ្ហានេះ បញ្ហាជាសកលរបស់សហរដ្ឋអាមេរិកនេះ ទៅបូកជាបញ្ហាផ្ទៃក្នុងរុញច្រាន ដុតរោឱ្យយើងមានបញ្ហាផ្សេងទៀត ក្នុងខណៈដែលយើងកម្ពុជាយើង គួរតែដៃដុតជើង គិតគូរថាតើការចរចាយ៉ាងណា ដើម្បីបន្ធូរបន្ថយទៅលើករណីការដំឡើងនេះ ក្នុងខណៈដែល ប្រទេសផ្សេងទៀត ក៏រួតរះក្នុងការទៅទីក្រុងវ៉ាស៊ីន តោន លើការចរចា និងយើងមិនអាចវាយតម្លៃស្រាល ទៅលើចំណុចនេះទេ”។
ជាមួយគ្នានេះដែរ អ្នកតាមដានស្ថានការណ៍នយោ បាយរូបនេះ ក៏បានអំពាវនាវ ឱ្យពិចារណាទាំងអស់គ្នា ដើម្បីស្វែងរកធាតុចូលមួយ ដើម្បីឱ្យមេដឹកនាំអាមេរិក បន្ទន់ឥរិយាបថ ឬក៏បន្ធូរបន្ថយអត្រាពន្ធដ៏ខ្ពស់នេះ ពីព្រោះកម្ពុជាត្រូវការពេលវេលាបន្ថែមទៀត សម្រាប់ពង្រឹងខ្លួនឱ្យមានលំនឹងថែមទៀត។
សូមបញ្ជាក់ថា អត្រាពន្ធគយថ្មី៤៩% ដែលអាមេរិកដាក់មកកម្ពុជានេះ គឺផ្អែកលើគម្លាតនៃការនាំចេញ នៃប្រទេសទាំង២ មិនមែនដោយសារកម្ពុជា ធ្លាប់កំណត់អត្រាពន្ធគយលើទំនិញអាមេរិកខ្ពស់ដល់ទៅ៩៧% នោះទេ។ កម្ពុជា នាំចេញទៅអាមេរិកនៅឆ្នាំ២០២៤ មានចំនួន១២៧០០លានដុល្លារ ។ ដោយឡែក អាមេរិកនាំចេញមកកម្ពុជានៅឆ្នាំ២០២៤ មានចំនួន ៣២១.៦ លានដុល្លារ ដែលនាំឱ្យគម្លាតស្មើនឹង៩៧.៤៦%៕
