ព័ត៌មានជាតិ

លោកបណ្ឌិត ម៉ៅ ហាវណ្ណាល់៖ ក្រុមហ៊ុនអាកាសចរណ៍ជាតិកម្ពុជា បានជួយនាំយកវប្បធម៌ខ្មែរ ទៅផ្សព្វផ្សាយកាន់ពិភពលោក

ភ្នំពេញ៖ លោក បណ្ឌិត ម៉ៅ ហាវណ្ណាល់ ប្រធានក្រុមប្រឹក្សាភិបាល នៃក្រុមហ៊ុនអាកាសចរណ៍ជាតិកម្ពុជា (Air Cambodia) បានថ្លែងថា ក្រុមហ៊ុនអាកាសចរណ៍ជាតិកម្ពុជា-Air Cambodia បានរៀបចំការសម្ដែងសិល្បៈប្រពៃណីខ្មែរមួយចំនួន ដើម្បីបង្ហាញពីភាពរស់រវើកនៃវប្បធម៌ខ្មែរ ហើយតួនាទីនៃក្រុមហ៊ុនអាកាសចរណ៍ជាតិ ក្នុងការនាំយកនូវវប្បធម៌ខ្មែរទាំងនោះ ផ្សព្វផ្សាយទៅកាន់ពិភពលោក។

ថ្លែងក្នុងពិធីអបអរសាទរពិធីបុណ្យចូលឆ្នាំខ្មែរឆ្នាំ២០២៥ ជាមួយអត្តសញ្ញាណថ្មី និង ចក្ខុវិស័យថ្មី នៅ អគារ ប៉េងហួត យូរ៉ូ១ រាជធានីភ្នំពេញ នាល្ងាចថ្ងៃទី៤ ខែមេសា ឆ្នាំ២០២៥នេះ លោក បណ្ឌិត ម៉ៅ ហាវណ្ណាល់ បានថ្លែងអំណរគុណយ៉ាងជ្រាលជ្រៅបំផុត ដល់គ្រប់បណ្តាភាគីពាក់ព័ន្ធទាំងអស់ ដែលមានក្រសួង ស្ថាប័ន ភ្នាក់ងារទេសចរណ៍ ដៃគូអាជីវកម្មនិង បុគ្គលិកក្រុមហ៊ុន ដែលបានខិតខំជួយជ្រោមជ្រែង និងគាំទ្រកិច្ចដំណើរការអាជីវកម្ម នៃក្រុមហ៊ុនអាកាសចរណ៍ជាតិកម្ពុជា ប្រកបដោយជោគជ័យ រួមជាមួយការរក្សាបានសន្តិសុខ និងសុវត្ថិភាពល្អប្រសើរ ជូនអ្នកដំណើរតាមផ្លូវអាកាស ស្របតាមការអនុវត្តយ៉ាងខ្ជាប់ខ្ជួន កម្រិតស្ដង់ដាសុវត្ថិភាព ប្រតិបត្តិការនៃ IOSA Certificate (IATA Operational Safety Audit)។

លោក ប្រធានក្រុមប្រឹក្សាភិបាល នៃក្រុមហ៊ុនអាកាសចរណ៍ជាតិកម្ពុជា (Air Cambodia)បានឱ្យដឹងថា ក្នុងឆ្នាំ២០២៤កន្លងមកនេះ ក្រុមហ៊ុន ក៏បានសម្រេចនូវសមិទ្ធផលគួរកត់សំគាល់ ដោយមានការកើនឡើង នៃប្រាក់ចំណូលដល់ទៅ៥០% និងទទួលបាននូវប្រាក់ចំណេញផងដែរ។

ទន្ទឹមនេះ លោក បណ្ឌិត ម៉ៅ ហាវណ្ណាល់ បានថ្លែងសង្កត់ធ្ងន់ថា«ក្នុងពិធីអបអរសាទរបុណ្យចូលឆ្នាំខ្មែរឆ្នាំ២០២៥នាពេលនេះ ក្រុមហ៊ុនអាកាសចរណ៍ជាតិកម្ពុជា- Air Cambodia មិនត្រឹមតែរៀបចំទទួលទានអាហារសាមគ្គី ដើម្បីសម្ដែងការអំណរគុណ ជូនគ្រប់ភាគីពាក់ព័ន្ធទាំងអស់នោះទេ ក្រុមហ៊ុន ក៏បានរៀបចំឱ្យមានការសម្ដែងសិល្បៈប្រពៃណីខ្មែរមួយចំនួន ដើម្បីបង្ហាញពីភាពរស់រវើក នៃវប្បធម៌ខ្មែរ ហើយតួនាទីនៃក្រុមហ៊ុនអាកាសចរណ៍ជាតិ ក្នុងការនាំយកនូវវប្បធម៌ខ្មែរទាំងនោះ ទៅផ្សព្វផ្សាយពិភពលោកផងដែរ»។

នៅក្នុងពិធីនេះ ក្រុមហ៊ុន ក៏បានប្រកាសជាផ្លូវការនូវការផ្លាស់ប្ដូរអត្តសញ្ញាណថ្មី ពីឈ្មោះ ក្រុមហ៊ុនអាកាសចរណ៍ជាតិ កម្ពុជា អង្គរ អ៊ែរ ទៅជា អាកាសចរណ៍ជាតិ កម្ពុជា (Air Cambodia) រួមជាមួយការដាក់ចេញ នូវចក្ខុវិស័យថ្មី លើការពង្រីកជើងហោះហើរថ្មីៗបន្ថែមទៀត ប្រកបដោយផាសុកភាព និងសេវាកម្មល្អកម្រិតផ្កាយ៣នៃ Skytrax ជូនអ្នកដំណើរតាមផ្លូវអាកាសជាតិនិងអន្តរជាតិ ស្របជាមួយការចាប់ផ្ដើមប្រើប្រាស់អាកាសយាន ប្រភេទ ATR72-600ចំនួន៣គ្រឿង នៅពាក់កណ្តាលខែឧសភា ឆ្នាំ២០២៥។

លើសពីនេះ សុខុមាលភាពនិងការយកចិត្តទុកដាក់បណ្តុះបណ្តាលធនធានមនុស្ស នៃបុគ្គលិករបស់ក្រុមហ៊ុនទាំងមូល ត្រូវបានពង្រឹងនិងពង្រីកជាបន្តបន្ទាប់។

ឆ្លៀតឱកាសនេះ លោក ប្រធានក្រុមប្រឹក្សាភិបាល នៃក្រុមហ៊ុនអាកាសចរណ៍ជាតិកម្ពុជា (Air Cambodia)ក៏បានថ្លែងអំណរគុណ ដល់អាកាសចរណ៍ជាតិកម្ពុជា Air Cambodia បាននិងកំពុងដើរតួនាទីយ៉ាងសំខាន់ ដើម្បីចូលរួមអនុវត្តសម្រេច «យុទ្ធសាស្ត្របញ្ចកោណដំណាក់កាលទី១» របស់រាជរដ្ឋាភិបាលកម្ពុជា នីតិកាលទី៧នៃរដ្ឋសភា ដែលវិស័យអាកាសចរណ៍ស៊ីវិល ស្ថិតនៅក្នុងបញ្ចកោណទី២៖ការធ្វើពិពិធកម្មសេដ្ឋកិច្ចនិងការបង្កើនភាពប្រកួតប្រជែង និង មុំទី២៖ការលើកកម្ពស់ការតភ្ជាប់ និងការបង្កើនប្រសិទ្ធភាពនៃវិស័យដឹកជញ្ជូននិងឡូជីស្ទីក វិស័យថាមពល វិស័យទឹកស្អាត និងវិស័យឌីជីថល៕

To Top