កំពង់ស្ពឺ: ដោយគិតគូរអំពីសុខទុក្ខ ចំពោះកងកម្លាំង លោកឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានចាត់ឲ្យតំណាង ចុះសាកសួរសុខទុក្ខ កងកម្លាំងទាំង៣ប្រភេទ ។
ដឹកនាំដោយលោក សេង ញ៉ក់ តំណាងរាស្ត្រមណ្ឌលខេត្តកំពង់ស្ពឺ និងមានការចូលរួមលោក យឹម សុខុម ប្រធានក្រុមប្រឹក្សាខេត្ត លោក ស៊ីម រតនៈ អភិបាលរងខេត្ត ព្រមទាំងកងកម្លាំង ប្រម៉ាណជាង៤០០នាក់ នៅក្នុងបរិវេនសាលាខេត្តកំពង់ស្ពឺ នាថ្ងៃទី៥ ខែមេសា ឆ្នាំ២០២៥ ។

លោក សេង ញ៉ក់ តំណាងរាស្ត្រមណ្ឌល ខេត្តកំពង់ស្ពឺ បានពាំនាំនៅការផ្តាំផ្ញើ នូវការសាកសួរសុខទុក្ខពីសំណាក់ លោកឧបនាយករដ្ឋមន្ត្រី ហ៊ុន ម៉ានី ជូន ចំពោះបងប្អូនកងកម្លាំងទាំងអស់ ដែលមានវត្តមាននៅទីនេះ ។
ហើយក៏សូមផ្តាំ ការសូមអធ្យាស្រ័យផងដែរ ដែលលោកមិន បានអញ្ជើញមកដោយផ្ទាល់នៅថ្ងៃនេះ ប៉ុន្តតែចិត្តនិងកាយគោរព ស្រឡាញ់ចំពោះវីរៈភាព របស់កងកម្លាំងនៃខេត្តកំពង់ស្ពឺជានិច្ច ទោះមានភាពមមាញឹកក្នុងការងារ យ៉ាងណាក៏ដោយលោក មិនដែលភ្លេចពីសុខទុក្ខបងប្អូនកងកម្លាំងយើង ដែលកំពុងឈរជើងបំពេញបេសកកម្មដ៏ឧត្តុង្គឧត្តម ជាពិសេសក្នុងឱកាសបុណ្យចូលឆ្នាំប្រពៃណីជាតិខាងមុខ ។

អ្នកតំណាងរាស្ត្រ បានលើកឡើងដោយសង្កត់ធ្ងន់ថា កងកម្លាំងមិនមែន ជាមនុស្សយន្តទេ គាត់ក៍ចេះហត់ ចេះក្តៅ ចេះរងារ ចេះចង់ជួបគ្រួសារ ក្នុងពេលបុណ្យទាន ដែរ តែនៅពេលដែលយើង ពាក់ឯកសណ្ឋានជាកងកម្លាំង យើងត្រូវបានប្រគល់នៅតួនាទីយ៉ាងសំខាន់មួយ ដែលតំរូវឲ្យយើង បង្កើនការប្រុងប្រយ័ត្ន ដើម្បីធានាសន្តិសុខ សណ្តាប់ធ្នាប់ សុវត្ថិភាព និងភាពសុខសប្បាយរបស់ប្រជាពលរដ្ឋ ដាច់ខាតត្រូវការការពារថែរក្សា សុខសន្តិភាព និងសុវត្ថិភាពជូនប្រជាជន និងប្រទេសជាតិ ។
ជាពិសេសដោយសារ តែមានកងកម្លាំងទាំងអស់គ្នានេះហើយ ទើបធ្វើឱ្យប្រជាពលរដ្ឋ រស់នៅដោយសេចក្តីសុខ យើងអាចនិយាយបានថា សេចក្តីសុខ របស់ប្រទេសជាតិ ពិតជាមិនអាចកាត់ផ្តាច់ចេញ ពីកិច្ចខិតខំប្រឹងប្រែង បំពេញការងាររបស់កងកម្លាំង ប្រដាប់អាវុធរបស់យើងបានឡើយ។

លោក ស៊ឹម រតនៈ អភិបាលរង ខេត្តកំពង់ស្ពឺ ជំនួសមុខ នៃរដ្ឋបាលខេត្តកំពង់ស្ពឺ និងកម្លាំងប្រដាប់អាវុធទាំង៣ប្រភេទ ដឹងគុណយ៉ាងជ្រាលជ្រៅ លោកឧបនាយករដ្ឋមន្ត្រី ហ៊ុន ម៉ានី និងអ្នកតំណាងរាស្ត្រទាំងអស់ ដែលតែងយកចិត្តទុកដាក់ ចំពោះសុខទុក្ខ កងកម្លាំងរបស់យើង ដោយលោក ចាត់ទុកកងកម្លាំង ប្រដាប់អាវុធ គឺជាដាវ និងខែលការពារជាតិ ដ៏រឹងមាំសម្រាប់រារាំង រាល់សកម្មភាពបំផ្លិចបំផ្លាញ នានាដែលប៉ះពាល់ភាព សុខដុមរមនារបស់ប្រជាពលរដ្ឋ និងការពារ សុខសន្តិភាព ដែលជាសន្តិភាពដ៏ពេញលេញ និងទទួលបានមកដោយលំបាក ហើយក៏ជាឬសគល់ នៃការអភិវឌ្ឍលើគ្រប់វិស័យ និងនាំកម្ពុជាឱ្យឆ្ពោះទៅត្រើយ នៃវឌ្ឍនភាព វិបុលភាព ថ្កុំថ្កើងរុងរឿង ខ្លាំងក្លាថែមទៀត ៕
ដោយ:សុខ សុភ័ណ្ឌ រូបថតមជ្ឈមណ្ឌលដើមអំពិល
