បរទេស៖ រដ្ឋមន្ត្រីការពារជាតិអ៊ីស្រាអែលលោក Israel Katz បានប្រកាសនៅថ្ងៃសុក្រនេះថា កងទ័ពអាកាសអ៊ីស្រាអែលបានធ្វើការវាយប្រហារ “ទុកជាមុន” នៅក្នុងប្រទេសអ៊ីរ៉ង់។ ប្រព័ន្ធផ្សព្វផ្សាយអ៊ីរ៉ង់ បានរាយការណ៍ពីការផ្ទុះនៅក្រុងហេអេរ៉ង់ព្រមទាំងការស្ទាក់ចាប់គ្រាប់មីស៊ីលផងដែរ។
យោងតាមសារព័ត៌មាន RT ចេញផ្សាយនៅថ្ងៃទី១៣ ខែមិថុនា ឆ្នាំ២០២៥ បានឱ្យដឹងថា ស្ថានភាពអាសន្នត្រូវបានប្រកាសនៅទូទាំងប្រទេសអ៊ីស្រាអែល។ លោក Katz បាននិយាយថា “បន្ទាប់ពីការវាយប្រហារជាមុនរបស់រដ្ឋអ៊ីស្រាអែលប្រឆាំងនឹងប្រទេសអ៊ីរ៉ង់ ការវាយប្រហារដោយមីស៊ីល និងយន្តហោះគ្មានមនុស្សបើកប្រឆាំងនឹងរដ្ឋអ៊ីស្រាអែល និងប្រជាជនស៊ីវិលរបស់ខ្លួនត្រូវបានគេរំពឹងថា នឹងកើតឡើងនៅពេលខាងមុខ” ។
ការវាយប្រហារនេះកើតឡើងបន្ទាប់ពីភាពតានតឹងកាន់តែច្រើនសប្តាហ៍បន្ទាប់ពីការបរាជ័យនៃការចរចាជាថ្មីជុំវិញកម្មវិធីនុយក្លេអ៊ែររបស់អ៊ីរ៉ង់។ សារព័ត៌មានជាច្រើនបានរាយការណ៍កាលពីខែមុនថា អ៊ីស្រាអែលបានពិភាក្សាអំពីការវាយប្រហារដ៏មានសក្តានុពលលើទីតាំងនុយក្លេអ៊ែរអ៊ីរ៉ង់ជាមួយសហរដ្ឋអាមេរិក។
ប្រធានាធិបតីអាមេរិកលោក Donald Trump ថ្មីៗនេះបានចោទទីក្រុងតេហេរ៉ង់ថា “ដើរយឺត” ក្នុងការចរចា ហើយបានរំលឹកឡើងវិញថា គោលបំណងរបស់លោក គឺការរុះរើទាំងស្រុងនៃកម្មវិធីនុយក្លេអ៊ែររបស់អ៊ីរ៉ង់។ ចំណែក អ៊ីរ៉ង់ បានបដិសេធចំពោះការធ្វើតាម និងនៅតែអះអាងថាសកម្មភាពនុយក្លេអ៊ែររបស់ខ្លួនគឺសម្រាប់តែគោលបំណងស៊ីវិល៕
ប្រែសម្រួលៈ ណៃ តុលា
