ភ្នំពេញ ៖ លោក ប៉ែន បូណា ប្រធានអង្គភាពអ្នកនាំពាក្យរាជរដ្ឋាភិបាល បានលើកឡើងថា កម្ពុជាស្រឡាញ់សន្តិភាព និងគោរពច្បាប់អន្តរជាតិ ហើយករណីតែមួយគត់ ដែលកម្ពុជា រក្សាសិទ្ធិប្រើអាវុធ គឺករណីមានការឈ្លានពានតែប៉ុណ្ណោះ។
ការលើកឡើងរបស់ ប្រធានអង្គភាព អ្នកនាំពាក្យរាជរដ្ឋាភិបាល លោក Gen Boonsin Padklang បានប្រកាសចង់ធ្វើសង្គ្រាម ជាជាងចរចាជាមួយភាគី កម្ពុជា និងថាថៃ មិនទៅតុលាការ ICJ ជាដាច់ខាត ខណៈភាគី កម្ពុជា-ថៃ កំពុងរៀបចំកិច្ចប្រជុំគណៈកម្មការចម្រុះខណ្ឌសីមា និងបោះបង្គោលព្រំដែនគោក (JBC) កម្ពុជា-ថៃ នៅប្រទេសកម្ពុជា ។
តាមរយៈបណ្ដាញសង្គមហ្វេសប៊ុក នៅថ្ងៃទី១៤ ខែមិថុនា ឆ្នាំ២០២៥ លោក ប៉ែន បូណា បានឱ្យដឹងថា ការត្រៀមនាំយកករណីមុំបី ប្រាសាទតាមាន់តូច ប្រាសាទតាមាន់ធំ និងប្រាសាទតាក្របី ទៅដោះស្រាយនៅតុលាការ យុត្តិធម៌អន្តរជាតិ បន្ទាប់ពីការចរចាដោះស្រាយ ទ្វេភាគីមិនអាចទៅរួច គឺជាជំហរសន្តិភាពនិយមនិងបង្ហាញថា កម្ពុជាគោរពច្បាប់អន្តរជាតិ។
លោក បន្ដថា ទោះជាយ៉ាងនេះក្តី យន្តការទ្វេភាគីក៏នៅតែបន្តប្រើប្រាស់ ដើម្បីចរចាដោះស្រាយបញ្ហាព្រំដែន ដែលនៅសេសសល់ ក្រៅពីចំណុចទាំង៤ ដែលយើងលើកយកទៅតុលាការយុត្តិធម៌អន្តរជាតិ ។ កិច្ចប្រជុំគណៈកម្មការចម្រុះខណ្ឌសីមា និងបោះបង្គោលព្រំដែនគោកកម្ពុជា-ថៃ (JBC) នៅរាជធានីភ្នំពេញនាថ្ងៃសៅរ៍នេះ គឺជាឧទាហរណ៍ស្រាប់។
អ្នកនាំពាក្យ គូសបញ្ជាក់ថា «នេះសបញ្ជាក់ថា កម្ពុជាគឺជាប្រទេស ដែលស្រឡាញ់សន្តិភាព និងខិតខំប្រើប្រាស់គ្រប់មធ្យោបាយ សន្តិវិធីឱ្យអស់លទ្ធភាពក្នុងការដោះស្រាយបញ្ហា ដើម្បីបញ្ចៀសការប្រឈមមុខដាក់គ្នា ដោយអាវុធ ។ មានករណីតែមួយគត់ ដែលកម្ពុជារក្សាសិទ្ធិប្រើអាវុធ គឺករណីដែលមានការឈ្លានពានតែប៉ុណ្ណោះ» ។
អ្នកនាំពាក្យ បន្ដថា ពេលនេះសាធារណមតិជាតិ និងអន្តរជាតិ បានមើលឃើញយ៉ាងច្បាស់ពីជំហររបស់កម្ពុជាដែលស្រឡាញ់សន្តិភាព គោរពច្បាប់អន្តរជាតិ និងស្អប់ខ្ពើមសង្គ្រាម ខណៈដែលភាគីថៃ ទាត់ចោលយុត្ថាធិការ តុលាការយុត្តិធម៌អន្តរជាតិ ហើយមេទ័ពរបស់ខ្លួន ថែមទាំងប្រើវោហាសាសន៍សង្គ្រាមទៅវិញ៕
