ភ្នំពេញ ៖ ប្រធានអង្គភាពអ្នកនាំពាក្យរាជរដ្ឋាភិបាលកម្ពុជា លោក ប៉ែន បូណា បានលើកឡើងថា ទាំងរាជរដ្ឋាភិបាល និងក្រុមយធាថៃ គួរយកពេលវេលា ទៅស៊ើបអង្កេតករណី ទាហានរបស់ខ្លួនបានបាញ់ សម្លាប់ទាហានកម្ពុជា ដោយកុំរុញបញ្ហាមកឲ្យកម្ពុជា។
លោក ប៉ែន បូណា បានលើកឡើង ក្នុងបទអន្តរាគមន៍នៅថ្ងៃទី២៤ ខែមិថុនា ឆ្នាំ២០២៥ថា ភាគីថៃគួរបញ្ឈប់បង្ក បញ្ហាជាមួយកម្ពុជាបន្តទៀត ទៅពាក់ព័ន្ធជម្លោះព្រំដែន ក្រោយពីកងទ័ពខ្លួនបានបាញ់ សម្លាប់ទាហ៊ានខ្មែរម្នាក់ កាលពីព្រឹកព្រលឹមស្រាងៗថ្ងៃ២៨ ឧសភា ។
លោកបន្តថា “សូមផ្តល់អនុសាសន៍ទៅវិញ ក្នុងនាមអ្នកនាំពាក្យរាជរដ្ឋាភិបាល ឈប់ទៅ ចរឹកលក្ខណៈបែបហ្នឹង កែទៅ ហើយខ្ញុំសូមថា ជំនួសឲ្យការប្តឹងផ្តល់កម្ពុជា ពីរករណី (ប្តឹងសម្តេចតេជោ២ករណី) អាជ្ញាធរថៃ គួរយកពេលវេលានេះ ទៅស៊ើបអង្កេតករណី ដែលទាហានរបស់ខ្លួន បាញ់សម្លាប់កងទ័ពខ្មែរម្នាក់កាលពីថ្ងៃ២៨ ឧសភា ។ នេះគឺជាឃាតកម្មពិតប្រាកដ យកជនដៃដល់ទៅផ្តន្ទាទោស ។ នេះជាកិច្ចការ ដែលត្រូវធ្វើ មិនមែនធ្វើពាក្យបណ្តឹង ឲ្យតែលឺសំឡេងអត់ប្រយោជន៍ហ្នឹងទេ ។ វាគួរឲ្យអស់សំណើច ខ្មាស់គេ”។
ប្រធានអង្គភាពអ្នកនាំពាក្យ រាជរដ្ឋាភិបាល ក៏បានផ្តល់យោបល់ ទៅភាគីថៃថា ត្រូវបញ្ឈប់ការរុកគួនកម្ពុជា ហើយគួរតែយកពេលវេលា ទៅដោះស្រាយបញ្ហាផ្ទៃក្នុង របស់ខ្លួនវិញល្អជាង ព្រោះបញ្ហាផ្ទៃក្នុងថៃ កំពុងជួបការប្រេះស្រាំ រវាងរាជរដ្ឋាភិបាល និងក្រុមយោធា ។
សូមបញ្ជាក់ថា ការប៉ះទង្គិចរវាងកងទ័ពកម្ពុជា-ថៃ កើតឡើងកាលពីព្រឹកថ្ងៃទី២៨ ខែឧសភា ឆ្នាំ២០២៥ ស្ថិតក្នុងភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ កងទ័ពថៃបានលបធ្វើការបាញ់ ប្រហារមុនមកលើ លេណដ្ឋាន ដែលជាទីតាំងឈរជើងរបស់កងទ័ពកម្ពុជា បានបណ្តាលឲ្យបាត់បង់ជីវិតកងទ័ពកម្ពុជាម្នាក់ គឺព្រឹន្ទបាលឯក សួន រ៉ោន អាយុ៤៨ឆ្នាំ ៕
