ភ្នំពេញ៖ មន្រ្តីជាន់ខ្ពស់រាជរដ្ឋាភិបាលកម្ពុជា បានថ្លែងការអះអាងនៅចំពោះមុខមន្រ្តីស្ថានទូតអាម៉េរិកថា កម្ពុជាជាដៃគូដ៏ស្មោះស្ម័គ្រ និងជាទីទុកចិត្តរបស់សហរដ្ឋអាម៉េរិក ហើយជឿជាក់យ៉ាងមុតមាំថា មិត្តភាពនេះ នឹងបន្តរីកចម្រើនប្រកបដោយភាពរឹងមាំ ជាមួយទិសដៅនិងសារៈសំខាន់ជាយុទ្ធសាស្រ្ត។
លោកឧបនាយករដ្ឋមន្រ្តី ស៊ុន ចាន់ថុល នៅក្នុងពិធីបុណ្យឯករាជ្យ លើកទី២៤៩របស់សហរដ្ឋអាមេរិក នាល្ងាចថ្ងៃព្រហស្បត្តិ៍ ទី០៣ ខែកក្កដា ឆ្នាំ២០២៥ បានថ្លែងថា “អស់រយៈពេលជាច្រើនទសវត្សរ៍ កន្លងមកនេះ ប្រទេសយើងទាំងពីរ បានកសាងភាពជាដៃគូយ៉ាងរឹងមាំ និងកាន់តែស្អីតរមួត ដោយផ្អែកលើគោលការណ៍នៃការគោរពគ្នាទៅវិញទៅមក និងកិច្ចសហប្រតិបត្តិការ”។
ជាប្រធានក្រុមការងារចរចាពន្ធបដិការរបស់ជារាជរដ្ឋាភិបាលកម្ពុជា ជាមួយសហរដ្ឋអាម៉េរិកផងនោះ លោក ស៊ុន ចាន់ថុល ក៏មិនភ្លេចផ្ញើនូវសេចក្តីអំណរសាទរ ជូនចំពោះប្រធានាធិបតី ដូណាល់ ត្រាំ និងជំទាវទី១។
លោកឧបនាយករដ្ឋមន្រ្តី បន្តថា “អរគុណទៅដល់សន្តិភាព ស្ថិរភាព និងការបើកទូលាយ កម្ពុជា បានក្លាយជាដៃគូប្រកបដោយថាមឋន្ត និងគួរឱ្យទាក់ទាញ។ ទំនាក់ទំនងយើងទាំងពីរ បានបន្តរីកលូតលាស់ និងពង្រីកវិសាលភាពភាពលើបណ្តាវិស័យ ដូចជាពាណិជ្ជកម្ម វិនិយោគ កិច្ចសហប្រតិបត្តិការលើវិស័យការពារជាតិ អប់រំ ការអភិរក្សវប្បធម៌ និងទំនាក់ទំនងរវាងប្រជាជនយើងទាំងពីរ”។
លោកស្រី Bridgett Walker ភារៈធារីស្ថានទូតអាម៉េរិក បានលើកឡើងផងដែរថា “គំនិត និងស្មារតី នៃប្រទេសអាម៉េរិក មិនត្រឹមតែបានធ្វើឱ្យប្រទេសខ្ញុំ មានការអភិវឌ្ឍប៉ុណ្ណោះទេ តែថែមទាំងជាមូលដ្ឋាននៃទំនាក់ទំនងរបស់យើងជាមួយតំបន់ដទៃទៀត និងពិភពលោកថែមទៀតផង។ យើងចង់បានភាពជាដៃគូ និងផ្តល់លទ្ធភាពនិងឱកាសស្មើគ្នា ដែលក្នុងនោះមានតម្លាភាព និងភាពត្រឹមត្រូវ”។
លោកស្រី ភារៈធារី បន្ថែមថា “ដើម្បីសម្រេចគោលដៅទាំងនេះ លោកអ្នកឃើញជនជាតិអាម៉េរិក ធ្វើការនៅក្នុងគ្រប់វិស័យ និងគ្រប់ទីកន្លែង ដើម្បីបង្កើតទំនាក់ទំនង និងជំរុញភាពជាដៃគូ ឱ្យកាន់តែភាពជ្រាលជ្រៅថែមទៀត”។
(រូបថត៖ លោក សយ សុភា និពន្ធនាយក សារព័ត៌មាន ដើមអម្ពិល (ឆ្វេងទី២) ថតរូបអនុស្សាវរីយ៍ ជាក្រុមតន្ត្រីទ័ពអាកាសអាមេរិក)
