ភ្នំពេញ ៖ សម្ដេចតេជោ ហ៊ុន សែន ប្រធានព្រឹទ្ធសភា បានទូន្មាន ចំពោះអ្នកនយោបាយ និងក្រុមអគតិមួយចំនួនរបស់ថៃ ថា សម្ដេច ចង់បានបំផុតនោះ គឺសត្រូវវាយតម្លៃ ហ៊ុន សែន ក្នុងកម្រិតទាបបំផុត បានបង្ហាញថា សម្ដេច កំពុងធ្វើរឿងដ៏ត្រឹមត្រូវ ចំពោះប្រទេសជាតិ និងប្រជាជនរបស់ខ្លួន។
តាមរយៈបណ្ដាញសង្គម នារសៀលថ្ងៃទី៩ ខែកក្កដា ឆ្នាំ២០២៥នេះ សម្ដេចតេជោ ហ៊ុន សែន បានឱ្យដឹងថា វាជារឿងដ៏ចម្លែក និងកម្រណាស់ នៅលើពិភពលោក ដែលប្រទេសមួយកំពុង ប្រឈមមុខដាក់គ្នា បែរជានាំគ្នាធ្វើការស្ទង់មតិ ចំពោះមេដឹកនាំ ប្រទេសមួយទៀត ដែលជាសត្រូវរបស់ខ្លួនទៅវិញ វាជារឿងគួរឱ្យអស់សំណើច និងគ្មានហេតុផលអ្វី ដែលត្រូវធ្វើបែបនេះទេ ប៉ុន្តែប្រទេសថៃ អាចធ្វើរឿងបែបនេះបាន។
សម្ដេចតេជោ បន្ដថា ការរៀបចំស្ទង់មតិរបស់វិទ្យាស្ថាន NIDA ដើម្បីចង់ដឹងទឹកចិត្តប្រជាជនថៃ ចំពោះរូប សម្ដេច ហ៊ុន សែន វាបង្ហាញពីការចាប់អារម្មណ៍ខ្លាំង និងផ្តល់តម្លៃចំពោះ សម្ដេច ទៅវិញទេ ។ សម្ដេច ថា «គួរណាស់ប្រជាជនថៃ នាំគ្នាស្ទង់មតិមេដឹកនាំរបស់ខ្លួនឯងទៅ»។
សម្ដេច ប្រធាន គូសបញ្ជាក់ថា «ដូច្នេះខ្ញុំសូមទូន្មានថា អ្វីដែលខ្ញុំខ្លាចបំផុតនោះគឺ ប្រជាជនថៃស្រឡាញ់ ហ៊ុន សែន ដែលអាចបង្ហាញពីខ្ញុំក្បត់ជាតិសាសន៍ និងប្រជាជនរបស់ខ្ញុំ ប៉ុន្តែអ្វីដែលខ្ញុំចង់បានបំផុតនោះ គឺសត្រូវវាយតម្លៃ ហ៊ុន សែន ក្នុងកម្រិតទាបបំផុត ដែលចំណុចនេះបង្ហាញថា ខ្ញុំកំពុងធ្វើរឿងដ៏ត្រឹមត្រូវ ចំពោះប្រទេសជាតិ និងប្រជាជនរបស់ខ្ញុំ» ៕
