ភ្នំពេញ៖ រដ្ឋបាលរាជធានីភ្នំពេញ នៅរសៀលថ្ងៃទី១០ ខែកក្កដា ឆ្នាំ២០២៥ បាននាំយកទៀនព្រះវស្សា និងទ័យវត្ថុ បច្ច័យ និងគ្រឿងបរិក្ខារបស់សម្តេចធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ទៅប្រគេនដល់វត្តចំនួន១៥១វត្ត និង៥សាលាបុណ្យក្នុងរាជធានីភ្នំពេញ សំរាប់បុណ្យចូលព្រះវស្សា ក្នុងន័យចូលរួមលើកតម្កើង វិស័យព្រះពុទ្ធសាសនា ដែលជាសាសនារបស់រដ្ឋ។
ពិធីខាងលើនេះ បានរៀបចំជាសរុប នៅក្នុងបរិវេណវត្តនាគវន័្ត ក្នុងសង្កាត់បឹងកក់២ ខណ្ឌទួលគោក ក្រោមអធិបតីភាពលោក ឃួង ស្រេង អភិបាលរាជធានីភ្នំពេញ និងលោកស្រី ជា ស៊ីណា ឃួង ស្រេង។
តាមទំនៀមទំលាប់ជាប្រពៃណី នៃព្រះពុទ្ធសាសនា ព្រះសង្ឃទាំងឡាយគ្រប់អារាម ក្នុងព្រះរាជាណាចក្រកម្ពុជា ត្រូវនិមន្តចូលកាន់ព្រះវស្សា អស់ថេរវេលា ៣ខែ ចាប់ពីថ្ងៃ១រោច ខែអាសាធតទៅ។ ពាក្យថា (វស្សា)ប្រែថា(ភ្លៀងឬរដូវភ្លៀង) ដែលមានកំណត់រយៈពេល៣ខែ រាប់ពីថ្ងៃ១រោចខែអាសាធ ដល់ថ្ងៃ១៥កើតខែកត្តិក។ ក្នុងរយៈពេល៣ខែនេះនៅគ្រប់ព្រះវិហារទាំងឡាយគេតែងរក្សាភ្លើងទៀនព្រះវស្សា ធ្វើពីក្រមួនឱ្យឆេះជានិច្ច។ តែបច្ចុប្បន្ននេះ ដោយសាក្រមួនពុំសូវសំបូរ គេនិយមប្រើប្រេងជំនួសវិញ។ ជួនកាលមានព្រះសង្ឃខ្លះ ពុំបានចូលព្រះវស្សា តាមកំណត់កាលវេលា៣ខែ ដោយមានធុរៈអ្វីមួយ ឬដោយរោគាពាធិនោះ លោកអាចចូលបច្ឆិមិកវស្សាបាន គឺព្រះអង្គនឹងចូលនៅថ្ងៃ១រោជ ខែស្រាព ហើយត្រូវគិតវស្សាឱ្យគ្រប់៣ខែ ដូចព្រះសង្ឃដែលចូលមុន គឺត្រូវចេញវិញ នៅថ្ងៃ១រោជខែកត្តិក ។
ចំពោះទ័យទាន ដែលត្រូវប្រគេនដល់ព្រះសង្ឃ តាមវត្តទាំង១៥១វត្ត និង៥សាលាបុណ្យដោយ ក្នុង១វត្តនិង១សាលាបុណ្យមាន ២០០.០០០រៀល, ទៀនវស្សា១គូ, អង្ករ១០០គីឡូក្រាម, សាដកចំនួន១, ស្ករស១បាវ២៥គីឡូក្រាម, ទឹកដោះគោខាប់១កេស, ទឹកក្រូច៤កេស, ទឹកបរិសុទ្ធ៤កេស, មី៤កេសតូច, ត្រីខកំប៉ុង១កេសស្មើ១០០កំប៉ុង។
ក្នុងឱកាសនោះដែរលោក ឃួង ស្រេង អភិបាលរាជធានីភ្នំពេញ និងលោកស្រី ជា ស៊ីណាឃួង ស្រេង បាទអញ្ជើញអុជទៀន អុជធុនៅលើព្រះវិហារ សុំសេចក្ដីសុខសប្បាយ ជូនប្រជាពលរដ្ឋក្នុងរាជធានីភ្នំពេញ នាចូលព្រះវស្សានេះផងដែរ៕
