ភ្នំពេញ៖ លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ អំពាវនាវឱ្យបងប្អូនពលរកខ្មែរនៅប្រទេសថៃ ដែលមិនមានឯកសារពេញលេញ គួរត្រឡប់មកធ្វើការនៅកម្ពុជាវិញ ប្រសិនបើនៅទីនោះ មានការរើសអើង មានការធ្វើទុក្ខបុកម្នេញ ឬមិនមានសុវត្ថិភាព។ នេះ បើយោងតាមកិច្ចសម្ភាសន៍ពិសេសរវាងលោករដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ជាមួយទូរទស្សន៍ជាតិកម្ពុជា ដែលបានចេញផ្សាយនៅថ្ងៃទី១០ ខែកក្កដា ឆ្នាំ២០២៥។
លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា «អ្នកដែលមិនមានឯកសារពេញលេញ មិនត្រឹមតែបាត់អត្ថប្រយោជន៍ ប.ស.ស. ដែលមាននៅខ្មែរទេ។ បងប្អូននៅទីនោះ ពេលខ្លះធ្វើការឱ្យគេហើយ គេមិនឱ្យប្រាក់ខែក៏មានដែរ ព្រោះយើងខ្វះឯកសារ។ ទៅណាមកណា យើងបារម្ភពីការធ្វើទុក្ខបុកម្នេញពីអ្នកនេះ អ្នកនោះនៅស្រុកគេ»។
លោករដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានបន្តទៀតថា «ដូចនេះ សម្រាប់បងប្អូនដែលអត់មានឯកសារពេញលេញ ខ្ញុំនៅតែអំពាវនាវដដែលថា អាចវិញត្រឡប់មកប្រទេសកំណើតរបស់យើងវិញ ដែលមានការងារសមរម្យ ប្រាក់ឈ្នួលសមរម្យ និងអត្ថប្រយោជន៍ ប.ស.ស. ដែលជួយបងប្អូន»។
ការធ្វើការនៅកម្ពុជា ក្រៅពីការងារសមរម្យ និងប្រាក់ឈ្នួលសមរម្យ ពលករខ្មែរ អាចទទួលបានផលប្រយោជន៍ច្រើនពីបេឡាជាតិសន្តិសុខសង្គម (ប.ស.ស.) ដូចជាការមើលថែទាំសុខភាពពេលមានជំងឺ ឬគ្រោះថ្នាក់ការងារផ្សេងៗ និងទទួលបានប្រាក់សោធននិវត្តន៍ពេលពលករដល់វ័យចំណាស់។ នេះ បើយោងតាមប្រសាសន៍របស់លោករដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ក្នុងកិច្ចសម្ភាសន៍ជាមួយនឹងទូរទស្សន៍ខាងលើ។
«នេះ គឺជាទ្រព្យមួយ ដែលមិនអាចកាត់ថ្លៃបាន។ ពេលដែលយើងឈឺ ពេលខ្លះលុយដែលសន្សំមានទាំងប៉ុន្មានក៏បាត់បង់ទៅវិញដែរ។ ដូចនេះ យើងទៅធ្វើការនៅគេ អត់ឯកសារ មានកម្លាំងចេះតែទ្រាំលំបាកទៅ។ តែពេលយើងឈឺស្កាត់ យើងធ្វើការលែងកើត។ ពេលត្រឡប់មកវិញ គឺគ្រួសារទាំងមូល នឹងក្លាយជាអ្នកដោះស្រាយបន្ទុករបស់បងប្អូន។ ដូចនេះ យល់ល្អ ពិចារណាមកស្រុកកំណើតរបស់យើងវិញ»។ លោករដ្ឋមន្ត្រី បានលើកឡើងដូចនេះ។
លោកហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា សូមបងប្អូនត្រឡប់មកស្រុកកំណើតវិញ ប្រសិនបើនៅទីនោះ មានការរើសអើង មានការធ្វើទុក្ខបុកម្នេញ ឬមិនមានសុវត្ថិភាព។ រាជរដ្ឋាភិបាលកម្ពុជា បានត្រៀមខ្លួនទទួលស្វាគមន៍បងប្អូន ហើយព្រមទាំងមានការងារសមរម្យសម្រាប់ជូនបងប្អូនផងដែរ៕
