ភ្នំពេញ ៖ ខណៈកម្ពុជា កំពុងប្រឈមនឹងឈ្លានពានទឹកដី ពីសំណាក់ប្រទេសថៃ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា អះអាងជាថ្មីម្តងទៀត នៅចំពោះមុនឧត្តមសេនីយ៍ឯក Roy Mabagos Galido O-10285 PA មេបញ្ជាការកងទ័ពជើងគោក ហ្វីលីពីន ទី៦៦ថា ទោះបីជាបច្ចុប្បន្នកម្ពុជា ជាប្រទេសតូច ប៉ុន្តែសម្តេច ប្តេជ្ញាការពារបូរណភាពទឹកដី មិនឲ្យបាត់បង់មួយមីលីម៉ែត្រ ទៅប្រទេសក្បែរខាងឡើយ ។
លោក ជា ធីរិទ្ធបានឲ្យដឹងក្រោយបញ្ចប់កិច្ចពិភាក្សានាថ្ងៃ១៨ កក្កដា ថា សម្តេចតេជោបានរំលឹកពីអតីតកាល និងចែករំលែកបទពិសោធន៍របស់សម្តេច ទៅមេបញ្ជាការកងទ័ពជើងគោកហ្វីលីពីនថា សម្តេចបានចូល បម្រើកងទ័ពតាំង ពីវ័យ១៨ឆ្នាំ ដោយមានការ ប្រយុទ្ធបង្ហូរឈាម ជាមួយសត្រូវ ព្រមទាំងការរំដោះប្រទេសចេញ ពីរបបប្រល័យ ពូជសាសន៍ រហូតនាំឲ្យជាតិមានសុខសន្តិភាពមកដល់បច្ចុប្បន្ន ។
អ្នកនាំពាក្យគូសបញ្ជាក់ថា “ជាពិសោធន៍ ដែលសម្តេចតេជោបានចែករំលែក ហើយបានរំលេចអំពីស្ថានភាព បែកបាក់ពីអតីតកាលរបស់កម្ពុជា កាលពីជាង៥០០ឆ្នាំ ប្រទេសដែលធ្លាប់ដែលមានផែនដីធំទូលាយ ប៉ុន្តែក្លាយជាប្រទេសតូច ដោយសារការបែកបាក់គ្នា ។ ហើយឥឡូវនេះ កម្ពុជាមានសន្តិភាព ហើយពង្រឹងនូវខឿន នៃការការពារនូវអ្វី ដែលដីកម្ពុជាមាន ទោះបីជាបច្ចុប្បន្នតូច ប៉ុន្តែការពារនូវអ្វីដែលយើងមាន នាពេលបច្ចុប្បន្នឲ្យបានល្អប្រសើរ” ។
ជាកិច្ចឆ្លើយតប ឧត្តមសេនីយ៍ឯក មេបញ្ជាការកងទ័ពជើងគោកហ្វីលីពីន បានស្ងប់កោតសរសើរជាខ្លាំងចំពោះភាពវ័យឆ្លាត ប៉ិនប្រសប់របស់សម្តេចតេជោ ។ ជាមួយគ្នានេះ ឧត្តមសេនីយ៍ឯក ក៏បានផ្តល់តម្លៃខ្ពស់ចំពោះបទពិសោធន៍ របស់សម្តេចតេជោដែលបានលះបង់អាយុជីវិត តាំងពីវ័យក្មេងដើម្បីជាតិមាតុភូមិ ។ ឧត្តមសេនីយ៍ឯកចាត់ទុកថា នេះជាបទពិសោធន៍ដ៏កម្របំផុត ក្នុងនាមជាដឹកនាំមួយរូបរបស់កម្ពុជា ដែលមានភាពអស្ចារ្យយ៉ាងខ្លាំង ។
ឧត្តមសេនីយ៍ឯកអះអាងថា លោកពិតជាទទួលបានចំណេះដឹង និងគំនិតថ្មីៗ ព្រមទាំងបទពិសោធន៍ពីសម្តេចតេជោផងដែរ ៕
