ភ្នំពេញ ៖ ក្នុងស្មារតីរួមប្រកៀកស្មាការពារជាតិ និងជួយប្រជាជនគ្រប់កាលៈទេសៈ ក្រសួងមហាផ្ទៃក្រោមការដឹកនាំរបស់ លោកឧបនាយករដ្ឋមន្ត្រី ស សុខា បាននិងកំពុងធ្វើចលនាកៀរគរ ការគាំទ្រពីថ្នាក់ដឹកនាំ និងមន្ត្រីក្រសួង ព្រមទាំងសប្បុរសជន នូវជំនួយថវិកា ស្បៀងអាហារ និងសម្ភារៈ ដើម្បីឧបត្ថម្ភគាំទ្រដល់ប្រជាពលរដ្ឋជនភៀសសឹក និងកងកម្លាំងជួរមុខដែលបាននិងកំពុងឈរជើងការពារបូរណភាពទឹកដី និងអធិបតេយ្យភាពជាតិ ពីអំពើឈ្លានពានរបស់កងទ័ពថៃ។
ផ្ដើមពីថ្ងៃទី៣០ ខែកក្កដា រហូតមកដល់ព្រឹកថ្ងៃទី១ ខែសីហា ឆ្នាំ២០២៥នេះ ចលនានេះ បានទទួលការចូលរួម ឧបត្ថម្ភគាំទ្រពីថ្នាក់ដឹកនាំក្រសួងមហាផ្ទៃ និងសប្បុរសជន នានាជាបន្តបន្ទាប់ ក្នុងនោះថវិកាទទួល បាន១៨៦.២៤៩.០០០រៀល និងប្រាក់ដុល្លារ២៨.៦៣៧ដុល្លារ អង្ករជាង២០តោន និងគ្រឿងឧបភោគបរិភោគ មួយចំនួនទៀត។ នេះបើតាមលោក រ៉េន រតនៈ អ្នកនាំពាក្យឯកឧត្តមអភិសន្តិបណ្ឌិត។
បើតាមលោក រ៉េន រតនៈ, ឧបនាយករដ្ឋមន្ត្រី និងលោកស្រី កែ សួនសុភី ស សុខា បានរួមចំណែកបរិច្ចាគថវិកា ចំនួន២ម៉ឺនដុល្លារអាម៉េរិក ថ្នាក់ដឹកនាំ និងសមាជិក ខុទ្ទកាល័យ ឯកឧត្តមអភិសន្តិបណ្ឌិត ថវិកាចំនួន ៥.៦៣៧ដុល្លារអាម៉េរិក ខណៈថ្នាក់ដឹកនាំ មន្ត្រី និងសប្បុរសជនផ្សេងទៀត ដែលបានចូលរួម ចំណែកក្នុងចលនាគាំទ្រ ប្រជាជនភៀសសឹក និងកងកម្លាំងជួរមុខតាមខ្សែបន្ទាត់ព្រំដែន ជាមួយក្រសួងមហាផ្ទៃ ។
សូមបញ្ជាក់ថា ក្រសួងមហាផ្ទៃ នៅតែបន្តទទួលការចូលរួមចំណែកបរិច្ចាគ ទាំងថវិកា ស្បៀងអាហារ និងសម្ភារៈប្រើប្រាស់ចាំបាច់ផ្សេងៗទៀត ពីថ្នាក់ដឹកនាំ និងមន្ត្រីចំណុះក្រសួងមហាផ្ទៃ ព្រមទាំងសប្បុរសជននានា នៅទីស្តីការក្រសួង៕
