ភ្នំពេញ៖ លោកស្រី ជា ស៊ីណា ឃួង ស្រេង ប្រធានក្រុមប្រឹក្សា នៃសមាគមកាយឫទ្ធិនារីកម្ពុជា សាខារាជធានីភ្នំពេញ បានដឹកនាំសមាជិកសកម្ម ចំនួនជាង២៥០នាក់ មកសិក្សាស្វែងយល់ អំពីពិធីបុណ្យ ចូលព្រះវស្សា, ការធ្វើសមាធិ ព្រមទាំងសូត្រមន្តរំលឹកគុណ ដល់វីរកងទ័ពដែលពលីក្នុងសមរភូមិជួរមុខ និងបួងសួងសុំសេចក្ដីសុខ ជូនព្រះរាជាណាចក្រកម្ពុជា ។
ពិធីនេះបានធ្វើឡើងនារសៀលថ្ងៃទី១០ ខែសីហា ឆ្នាំ២០២៥នេះ នៅក្នុងវត្តនិគ្រោធវ័ន ហៅវត្តគល់ទទឹង ស្ថិតក្នុងសង្កាត់ព្រែកថ្មី ខណ្ឌច្បារអំពៅ។
តាមរយៈលោកស្រី ដោ សម្ផស្ស អនុប្រធានក្រុមប្រឹក្សា នៃសមាគមកាយឫទ្ធិនារីកម្ពុជា សាខារាជធានីភ្នំពេញ បានឱ្យដឹងថា សមាគមកាយឫទ្ធិនារីកម្ពុជា សាខារាជធានី ភ្នំពេញ ដឹកនាំដោយលោកស្រី ជា ស៊ីណា ឃួង ស្រេង ជាប្រធានបានផ្តួចផ្តើម ឱ្យមានកម្មវិធីចំនួន៣ ក្នុងពេលតែ១ នោះគឺ ការនាំប្អូនៗ នារីចំនួន១៥០នាក់ ដែលជាសមាជិកសកម្ម និងបងប្អូនជាសមាជិកាគាំទ្រ សមាគមកាយឫទ្ធិនារីកម្ពុជា នៅតាមខណ្ឌទាំង១៤ ចំនួន១០០នាក់ទៀត មកសិក្សាស្វែងយល់ អំពីពិធីបុណ្យចូលព្រះវស្សា ដែលសម្តែងដោយព្រះភិក្ខុ សតិបាលោ សុខ សុផៃ តំណាងដ៏ខ្ពង់ខ្ពស់របស់សម្តេចសង្ឃ គូ សុភាព។
ក្នុងឱកាសនេះទាំងសមាជិកសកម្ម និងសមាជិកាទាំងអស់ បានស្វែងយល់កាន់តែច្បាស់ថា តើពិធីបុណ្យចូល ព្រះវស្សា គេធ្វើអ្វីខ្លះ សំរាប់ទំនៀមទំលាប់ខ្មែរ ។ ប្រធានបទទី២ ព្រះភិក្ខុសង្ឃ បានដឹកនាំធ្វើសមាធិ បន្ទាប់មកគឺពិធីសូត្រមន្ត រំលឹកគុណវីរកងទ័ព ដែលពលីក្នុងសមរភូមិមុខ និងបួងសួងសុំសេចក្ដីសុខ ជូនព្រះរាជាណាចក្រកម្ពុជា៕
