អភិបាលខេត្តបាត់ដំបង បន្តនាំយកអំណោយសប្បុរស ជន ប្រគល់ ជូនកងកម្លាំងកំពុងឈរជើង នៅតាមខ្សែបន្ទាត់ព្រំដែន កម្ពុជា-ថៃ ក្នុងភូមិសាស្រ្តខេត្តបាត់ដំបង
នៅថ្ងៃទី២៩ ខែសីហា ឆ្នាំ២០២៥ នេះ លោក សុខ លូ អភិបាល នៃគណៈអភិបាល ខេត្តបាត់ដំបង បានបន្តដឹកនាំគណៈប្រតិភូ មន្ទីរ អង្គភាពជុំវិញខេត្តចុះជួបសំណេះសំណាល សាកសួរសុខទុក្ខ និងនាំយកនូវអំណោយ របស់សប្បុរសជននានា ដែលបានឧបត្ថម្ភតាមរយៈរដ្ឋបាលខេត្ត ដើម្បីផ្តល់ជូនដល់កងកម្លាំង កំពុងឈរជើងការពារ តាមខ្សែបន្ទាត់ព្រំដែនកម្ពុជា-ថៃ ក្នុងភូមិសាស្រ្តខេត្តបាត់ដំបង។
ក្នុងឱកាសនោះ លោក សុខ លូ មានប្រសាសន៍ថា ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា គឺបានគិតគូរយកចិត្តទុក ដាក់ឧបត្ថម្ភគាំទ្រនិងផ្គត់ផ្គង់គ្រប់បែបយ៉ាង ដល់កងទ័ពកម្ពុជាពុំឱ្យមានការខ្វះខាតនោះឡើយ។
លោក សុខ លូ គូសបញ្ជាក់ថា អំណោយរបស់សប្បុរសជន នាពេលនេះគឺជាការជួយគាំទ្រ ដល់កងកម្លាំងជួរមុខក្រោមស្មារតីស្នេហាជាតិ និងការចូលរួមចំណែកជួយជាតិ តាមរយៈសមរភូមិក្រោយជួយសមរភូមិជួរមុខ។
លោក អភិបាលខេត្តបានប្ដេជ្ញាបន្តកៀរគរ ប្រមូលជំនួយដើម្បីបន្តជួយឧបត្ថម្ភគាំទ្រ បន្ថែមទៀតដល់កងកម្លាំងជួរមុខ មិនឱ្យជួបបញ្ហាខ្វះខាតឡើយ៕
អត្ថបទ៖ ណារិទ្ធ
