ទេសរដ្ឋមន្ត្រី គន់ គីម ចុះពិនិត្យការកសាងហេដ្ឋារចនាសម្ព័ន្ធ និងសាងសង់ផ្ទះ ជូនអតីតយុទ្ធជន នៅខេត្តបាត់ដំបង
បាត់ដំបង ៖ នាថ្ងៃទី២៩ ខែសីហា ឆ្នាំ២០២៥នេះ ទេសរដ្ឋមន្ត្រី គន់ គីម អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា បានអញ្ជើញត្រួតពិនិត្យការស្ថាបនាផ្លូវ និងការសាងសង់ផ្ទះ ព្រមទាំងការស្តារប្រឡាយឡើងវិញ សម្រាប់បម្រើជូនអតីតយុទ្ធជន ស្ថិតនៅភូមិព្រៃសិន ឃុំឆ្នាល់មាន់ ស្រុកគាស់ក្រឡ ខេត្តបាត់ដំបង ។
ក្នុងពេលចុះពិនិត្យ លោកទេសរដ្ឋមន្ត្រី បានមានប្រសាសន៍ថា យោងតាមអនុសាសន៍ របស់សម្តេចតេជោ ហ៊ុន សែន បានណែនាំឱ្យបន្តការ ពិនិត្យលើតម្រូវការជាក់ស្តែង និងដោះស្រាយជូនអតីតយុទ្ធជនគ្រប់រូបដែលជួបការលំបាក ដើម្បីផ្តល់ដី និងផ្ទះសម្រាប់កសាងជីវភាពរស់នៅប្រចាំថ្ងៃ។
ការរៀបចំហេដ្ឋារចនាសម្ព័ន្ធរូបវន្តបំពេញបន្ថែម ដែលមានដូចជា ការស្ថាបនាផ្លូវ និងការស្តារប្រឡាយ នាពេលនេះពិតជាមានសារៈសំខាន់ សម្រាប់បម្រើដល់ជីវភាពរស់នៅប្រចាំថ្ងៃ ជូនអតីតយុទ្ធជន និងក្រុមគ្រួសារ ។
លោកបានបន្ថែមទៀតថា ក្នុងន័យនេះ រាជរដ្ឋាភិបាលដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្រ្តី និងជាអនុប្រធានទី១ សមាគមអតីតយុទ្ធជនកម្ពុជា ជានិច្ចកាលបានបន្តអនុវត្ត និងដោះស្រាយជូនអតីតយុទ្ធជន ចុះដោយការចុះជួបផ្ទាល់ ជាមួយបងប្អូនអតីតយុទ្ធជនតាមមូលដ្ឋាន ដើម្បីឈ្វែងយល់ពីសុខទុក្ខ និងការលំបាករបស់បងប្អូន ហើយបានរិះរកគ្រប់មធ្យោបាយ ដើម្បីជួយលើកស្ទួយជីវភាពអតីតយុទ្ធជន ឱ្យទទួលបាននូវអត្ថប្រយោជន៍ជាច្រើន ដោយបានកែប្រែជីវភាពរស់នៅ កាន់តែល្អប្រសើរឡើងជាលំដាប់ស្រប តាមការវិវឌ្ឍនៃសេដ្ឋកិច្ចជាតិ៕
អត្ថបទ៖ ណារិទ្ធ
