ឧបនាយករដ្ឋមន្ត្រី ស៊ុន ចាន់ថុល ៖ អាម៉េរិក បញ្ចុះពន្ធ១៩% គឺជាអត្រាល្អមួយ ជួយទាក់ទាញ វិនិយោគិនមកបណ្តាក់ទុននៅកម្ពុជា
ភ្នំពេញ ៖ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានលើកឡើងថា អាម៉េរិកបញ្ចុះអត្រាពន្ធ១៩% គឺជាអត្រាល្អមួយជួយជំរុញទាក់ទាញ វិនិយោគិនមកបណ្តាក់ទុន នៅកម្ពុជា និងជំរុញឱ្យការធ្វើពាណិជ្ជកម្មរវាងកម្ពុជា-អាម៉េរិក កាន់តែល្អប្រសើរជាងមុន។
នាឱកាសអញ្ជើញទទួលជួបពិភាក្សាការងារជាមួយ គណៈប្រតិភូសភាសហរដ្ឋអាម៉េរិក (CODEL) ដឹកនាំដោយលោកស្រី Beth Van Duyne ប្រធានគណៈប្រតិភូ និងជាសមាជិកសភាប្រចាំរដ្ឋ Texas នៅថ្ងៃទី២៩ សីហា នេះ លោកឧបនាយករដ្ឋមន្រ្តី បានថ្លែងអំណរគុណចំពោះសហរដ្ឋអាម៉េរិក ដែលសម្រេចបញ្ចុះអត្រាពន្ធលើទំនិញ នាំចេញពីកម្ពុជាទៅកាន់សហរដ្ឋអាម៉េរិកពី៤៩% មកនៅត្រឹម ១៩%។ លោកថា «អត្រាពន្ធដែលកម្ពុជាទទួល បានគឺជាអត្រាល្អមួយ ដែលជួយជំរុញទាក់ទាញវិនិយោគិនមកបណ្តាក់ទុននៅកម្ពុជា និងជំរុញឱ្យការធ្វើពាណិជ្ជកម្ម រវាងកម្ពុជា-អាម៉េរិក កាន់តែល្អប្រសើរជាងមុន»។
ឆ្លៀតក្នុងឱកាសនេះ លោកឧបនាយករដ្ឋមន្រ្តី ក៏បានថ្លែងអំណរគុណចំពោះ ឯកឧត្តមប្រធានាធិបតី Donald Trump ដែលបានជំរុញឱ្យមានបទឈប់បាញ់ បានឆាប់រហ័ស ក្នុងបញ្ហាជម្លោះកម្ពុជា-ថៃ ។ គោលជំហររបស់កម្ពុជាគឺ មានភាពច្បាស់លាស់ ក្នុងការរក្សាការពារសុខសន្តិភាព ជូនប្រជាជាតិ ដែលប្រមុខថ្នាក់ដឹកនាំកម្ពុជា បានខិតខំកសាងមកដោយលំបាក។ គោលជំហរនេះក៏បានទទួលការជឿជាក់ ពីឯកឧត្តមប្រធានាធិបតី Donald Trump ផងដែរ តាមរយៈសារលិខិតជូនសម្ដេចធិបតីនាយករដ្ឋមន្ត្រី កាលពីថ្ងៃទី២០ ខែសីហា ឆ្នាំ២០២៥ ថ្លែងអំណរគុណ និងកោតសរសើរកម្ពុជាដែលគាំទ្របេក្ខភាពឯកឧត្តមសម្រាប់ពានរង្វាន់ណូបែលសន្តិភាព។
លោកឧបនាយករដ្ឋមន្ត្រី បានសម្តែងនូវការកោតសរសើរ និងវាយតម្លៃខ្ពស់ចំពោះទំនាក់ទំនងមិត្តភាពជាមួយសហរដ្ឋអាម៉េរិក ដោយឈរលើគោលការណ៍គោរពគ្នាទៅវិញទៅមក ព្រមទាំងមានក្តីសោមនស្សរីករាយចំពោះភាពវិជ្ជមានក្នុងទំនាក់ទំនងទ្វេភាគីរាប់ចាប់ពីវិស័យវិនិយោគ ពាណិជ្ជកម្ម ការតភ្ជាប់រវាងប្រជាជន និងប្រជាជន និងទំនាក់ទំនងការទូត ។ លោកឧបនាយករដ្ឋមន្ត្រី បានស្នើសុំគណៈប្រតិភូសភាអាម៉េរិក បន្តជំរុញវិនិយោគិនអាម៉េរិកឱ្យមកបណ្តាក់ទុន និងធ្វើធុរកិច្ចនៅកម្ពុជា ឱ្យបានកាន់តែប្រសើរឡើងបន្ថែមទៀត។
ក្នុងឱកាសនេះ លោកស្រី បានសម្តែងនូវការ កោតសរសើរចំពោះអំពីការអភិវឌ្ឍដ៏ឆាប់រហ័សរបស់ប្រទេសកម្ពុជា និងការវិវត្តជាវិជ្ជមាន នៃទំនាក់ទំនងទ្វេភាគី រវាងប្រទេសកម្ពុជា និង សហរដ្ឋអាម៉េរិក។ តាមរយៈជំនួបជាមួយសម្តេចធិបតីនាយករដ្ឋមន្ត្រី និងថ្នាក់ដឹកនាំកម្ពុជា ជាច្រើនរូបនៅក្នុង ឱកាសដំណើរទស្សនកិច្ចនេះ លោកជំទាវបានបង្ហាញនូវសុទិដ្ឋិនិយមខ្ពស់ លើការបន្តរីកលូតលាស់ នៃទំនាក់ទំនង និងកិច្ចសហប្រតិបត្តិការ រវាងប្រទេសទាំងពីរនាពេលអនាគត។
គួរបញ្ជាក់ថា តាមរយៈជំនួបកាលពីខែឧសភា ឆ្នាំ២០២៥ នៅទីក្រុងវ៉ាស៊ីនតោន រវាងលោកឧបនាយករដ្ឋមន្ត្រី និងលោកស្រី ផ្ទាល់ ពោលគឺអំឡុងពេលចរចា លើកិច្ចព្រមព្រៀងពន្ធបដិការ លោកជំទាវក៏បានលើកឡើង អំពីគោលបំណងក្នុងការបង្កើន កិច្ចសហប្រតិបត្តិការ រវាងប្រទេសកម្ពុជា និងសហរដ្ឋអាម៉េរិកបន្ថែមផងដែរ៕
