តំណាងរដ្ឋមន្ត្រី ហេង សួរ ចូលរួមទិវាអក្ខរកម្មជាតិ ៨កញ្ញា ២០២៥នៅខេត្តក្រចេះ
ក្រចេះ៖លោក ម៉ុល វិបុល អនុរដ្ឋលេខាធិការ តំណាងដ៏ខ្ពង់ខ្ពស់លោក ហេង សួរ រដ្ឋមន្រ្តីក្រសួងការងារ និងបណ្ដុះបណ្ដាលវិជ្ជាជីវៈ បានអញ្ជើញចូលក្នុងឱកាសប្រារព្ធទិវាអក្ខរកម្មជាតិ ៨ កញ្ញា ២០២៥ ក្រោមអធិបតីភាពដ៏ខ្ពង់ខ្ពស់បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជន និងកីឡា ដែលបានប្រព្រឹត្តទៅនៅខេត្តក្រចេះ នាថ្ងៃទី១០ ខែកញ្ញា ឆ្នាំ២០២៥។
កម្មវិធីនេះ ក៏មានការចូលរួមពីលោកស្រី Esther McFarlane ប្រធានផ្នែកអប់រំនៃអង្គការយូណេស្កូ ប្រចាំប្រទេសកម្ពុជា ព្រមទាំងវត្តមានចូលរួមពីថ្នាក់ដឹកនាំ នៃក្រសួងស្ថាប័នរាជរដ្ឋាភិបាលជាច្រើនរូបទៀត។
ទិវាអក្ខរកម្មជាតិនាឆ្នាំនេះប្រារព្ធឡើងក្រោមប្រធានបទ «ការលើកកម្ពស់អក្ខរកម្មក្នុងយុគសម័យឌីជីថល» ដែលគូសបញ្ជាក់អំពីតួនាទីនៃអក្ខរកម្ម សម្រាប់មនុស្សជាតិ និងសង្គម ខណៈប្រទេសកម្ពុជាកំពុងខិតខំប្រែក្លាយជាប្រទេសដែលមានប្រាក់ ចំណូលមធ្យមកម្រិតខ្ពស់នៅឆ្នាំ២០៣០ ហើយការអភិវឌ្ឍធនធានមនុស្ស នៅតែជាបេះដូងនៃវឌ្ឍនភាពជាតិ។
អក្ខរកម្មផ្ដល់អំណាចដល់ប្រជាជនកម្ពុជាជាមួយនឹងជំនាញចាំបាច់ ដើម្បីទទួលបានការអប់រំ និងការងារ ការកសាងសង្គមពុទ្ធិ និងប្រកបដោយបរិយាបន្ន ដែលជាផែនការយុទ្ធសាស្រ្តអប់រំ (ESP ២០២៤-២០២៨) នៅកម្ពុជា បានដាក់អក្ខរកម្មជាមូលដ្ឋានគ្រឹះនៃសសរស្ដម្ភ ដើម្បីសម្រេចបាននូវការអប់រំប្រកបដោយបរិយាបន្ន សមធម៌ និងគុណភាព។
តាមរយៈប្រធានបទនេះ គឺស្របទៅនឹងទស្សនៈវិស័យរបស់រាជរដ្ឋាភិបាលកម្ពុជា ដែលបានដាក់ចេញនូវក្របខ័ណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ ដើម្បីឆ្លើយតបនឹងបដិវត្តន៍ឧស្សាហកម្មជំនាន់ទី៤ ពោលគឺកសាងឱ្យបាននូវពលរដ្ឋឌីជីថល រដ្ឋាភិបាលឌីជីថល និងធុរកិច្ចឌីជីថល៕
