កូនក្មេង៤នាក់ បបួលគ្នាជិះកង់២គ្រឿង ពីខេត្តបាត់ដំបង ទៅខេត្តព្រះសីហនុ ត្រូវបានប្រជាពលរដ្ឋ ក្នុងស្រុកសង្កែ ហៅសួរនាំរួចរាយការណ៍ជូនសមត្ថកិច្ចឱ្យជូនត្រឡប់ទៅផ្ទះវិញ
បាត់ដំបង ៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាន នគរបាល ខេត្តបាត់ដំបង មានកិត្តិយសសូមជម្រាបជូន សាធារណជន បានជ្រាបថាថ្ងៃទី៨ ខែ តុលា ឆ្នាំ២០២៥ ឃើញការផ្សព្វផ្សាយ ក្នុងបណ្តាញសង្គមពីករណីបា-ត់ក្មេងនៅចំណុចសង្កាត់ទួលតាឯក ក្រុងបាត់ដំបង ខេត្តបាត់ដំបង មិនដឹងទៅទីណា ដែលការផ្សព្វផ្សាយរៀបរាប់ពីម្តាយរបស់ក្មេងនេះ បានធ្វើឱ្យមានការចាប់អារម្មណ៍ ពីមហាជនក្នុងបណ្តាញសង្គម។
ឃើញការផ្សព្វផ្សាយនេះ លោកឧត្តមសេនីយ៍ទោ ដាញ់ អេងប៊ុនចាន់ ស្នងការនៃស្នងការ ដ្ឋាននគរបាល ខេត្តបាត់ដំបង បានដាក់បញ្ជាដល់អធិការដ្ឋាន នគរបាលក្រុង ស្រុក ធ្វើការស្រាវជ្រាវលើបញ្ហានេះ ជាបន្ទាន់ និងឱ្យអាណាព្យាបាល ជួបទំនាក់ទំនងបំភ្លឺបញ្ហានេះ ឱ្យបានច្បាស់លាស់និងជាក់ស្តែងជូនដល់សមត្ថកិច្ច ។
លោកវរសេនីយ៍ទោ យុត តុងហូ អធិការនគរបាលស្រុកសង្កែ បានឱ្យដឹងថា នៅវេលាទៀបភ្លឺថ្ងៃទី ៨ ខែ តុលា ឆ្នាំ ២០២៥ ប្រជាពលរដ្ឋនៅភូមិស្រះកែវ ឃុំកំពង់ព្រះ ស្រុកសង្កែ បានប្រទះឃើញក្មេងប្រុស ស្រីចំនួន ០៤នាក់ ជិះកង់០២គ្រឿងនៅលើដងផ្លូវ ឃើញដូច្នេះគាត់ក៏បានកាក់សួរក្មេងៗបានឆ្លើយថា ពួកគេបបួលគ្នាជិះ កង់ទៅខេត្តព្រះសីហនុដែលមិនមានឪពុក ម្តាយឬអាណាព្យាបាលណាដឹងទេ ឮដូច្នេះប្រជាពលរដ្ឋបានកាក់ដំណើរ ពួកគេទាំង០៤នាក់ ហើយរាយការណ៍មកសមត្ថកិច្ចនគរបាល។
នៅពេលនេះអាណាព្យាបាលរបស់ក្មេងៗទាំងនេះ បានទទួលព័ត៌មាននេះ និងមកទទួលយកពួកគេវិលត្រឡប់ទៅលំនៅដ្ឋានវិញហើយ ទោះជាបែបនេះក្តីសមត្ថកិច្ចផែនជំនាញ និងបន្តសាកសួរ ស្រាវជ្រាវបន្ថែមលេី ការលេីកឡេីងរបស់ពួកគេពីដំណេីរទៅកាន់ខេត្តព្រះសីហនុនេះ។
ករណីនេះក៏សូមធ្វើការក្រើនរំលឹកដល់បងប្អូនប្រជាពលរដ្ឋ សូមមេត្តាពិនិត្យ តាមដាន នូវសកម្មភាពរបស់កូនៗ ជាប់ជាប្រចាំ ក្រែងមានបញ្ហាដូចករណីខាងលើ ករណីនេះជួបប្រជាពលរដ្ឋ ដែលលោក មានការសង្កេត ពិនិត្យ ឬសង័្សយទើបកាក់ដំណើរ របស់ពួកគេទុកនិងផ្តល់ព័ត៌មានមកសមត្ថកិច្ច ចុះបើប៉ះចំជនទុច្ចរិតណាមួយនោះតើជោគវាសនា ពួកគេទាំង០៤នាក់នឹងទៅដល់ទីណា?
ដូចបានជម្រាបជូនខាងលើ សូមសាធារបណជន ជ្រាបជាព័ត៌មាននិងសូមបន្តចូលរួមសហការជាមួយសមត្ថកិច្ចដោយ ភាតរបំផុត ៕
អត្ថបទ ច័ន្ទ វិស្សាសៈ
ប្រភព ស្នងការដ្ឋាននគរបាលខេត្តបាត់ដំបង
រូបភាព នគរបាលស្រុកសង្កែ
