អភិបាលខេត្តពោធិ៍សាត់ អញ្ជើញជាអធិបតី ក្នុងពិធីអបអរសាទរ ទិវាទេសចរណ៍ ពិភពលោក លើកទី ៤៥ ឆ្នាំ ២០២៥
ពោធិ៍សាត់ ÷ លោក ខូយ រីដា អភិបាលនៃគណៈអភិបាលខេត្តពោធិ៍សាត់ នៅពព្រឹកថ្ងៃទី ១៤ ខែ តុលា ឆ្នាំ ២០២៥ បានអញ្ជើញជាអធិបតីក្នុងពិធីអបអរសាទរទិវាទេសចរណ៍ ពិភពលោកលើកទី៤៥ ឆ្នាំ២០២៥ ក្រោមប្រធានបទ “ទេសចរណ៍ និងបរិវត្តកម្មប្រកបដោយចីរភាព” ពិធីនេះប្រារព្ធឡើងនៅបរិវេណអនុវិទ្យាល័យពោធិ៍សាត់ ដោយមានការចូលរួមពីថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ លោកគ្រូអ្នកគ្រូ សិស្សានុសិស្ស និងភ្ញៀវកិត្តិយសយ៉ាងច្រើនកុះករ ។
ថ្លែងក្នុងឱកាសនោះ លោក ខូយ រីដា អភិបាលខេត្តពោធិ៍សាត់ បានគូសបញ្ជាក់ពីសារៈសំខាន់នៃវិស័យទេសចរណ៍ ដែលជាកម្លាំងចលករជំរុញកំណើនសេដ្ឋកិច្ចជាតិ និងមូលដ្ឋាន ក៏ដូចជាការលើកកម្ពស់ជីវភាពរស់នៅរបស់ប្រជាពលរដ្ឋ ។ លោកអភិបាលខេត្តបានសង្កត់ធ្ងន់ថា ប្រធានបទនៅឆ្នាំ២០២៥ នេះបានឆ្លុះបញ្ចាំងពីការប្ដេជ្ញាចិត្ត របស់រដ្ឋបាលខេត្ត ក្នុងការអភិវឌ្ឍវិស័យទេសចរណ៍ ប្រកបដោយការទទួលខុសត្រូវ ធានាបាននូវតុល្យភាពរវាងការអភិវឌ្ឍសេដ្ឋកិច្ច ការអភិរក្សធនធានធម្មជាតិ និងវប្បធម៌ ។
លោក ខូយ រីដា ក៍បានជំរុញឱ្យអាជ្ញាធរពាក់ព័ន្ធ និងប្រតិបត្តិករទេសចរណ៍ទាំងអស់ នៅទូទាំងខេត្តពោធិ៍សាត់ បន្តចូលរួមថែរក្សាបរិស្ថាន អនាម័យ និងសណ្ដាប់ធ្នាប់សាធារណៈនៅតាមតំបន់ទេសចរណ៍នានា ជាពិសេសត្រូវផ្ដោតលើការលើកកម្ពស់គុណភាពសេវាកម្ម និងការបង្កើតផលិតផលទេសចរណ៍ថ្មីៗ ដែលមានលក្ខណៈច្នៃប្រឌិត និងទាក់ទាញភ្ញៀវទេសចរ ។
ពិធីនេះត្រូវបានបញ្ចប់ក្នុងបរិយាកាសរីករាយ និងស្និទ្ធស្នាល ដោយបានបន្សល់ទុក នូវការប្ដេជ្ញាចិត្តរួមគ្នា មួយក្នុងការធ្វើឱ្យខេត្តពោធិ៍សាត់ក្លាយជាគោលដៅទេសចរណ៍គំរូមួយ ដែលមានការអភិវឌ្ឍប្រកបដោយនិរន្តរភាព ស្របតាមចក្ខុវិស័យ របស់រាជរដ្ឋាភិបាលកម្ពុជា៕
ប្រភព&រូបភាព÷រដ្ឋបាលខេត្តពោធិ៍សាត់
ដោយ÷ហ៊ុន ធឿន(ដើមអម្ពិល)
