ភ្នំពេញ៖ ដោយមានការអនុញ្ញាតពីក្រសួងការពារជាតិ អគ្គបញ្ជាការ នាយឧត្តមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក បានអញ្ជើញដឹកនាំប្រតិភូ ទៅបំពេញទស្សនកិច្ចផ្លូវការ នៅប្រទេសិង្ហបុរី ចាប់ពីថ្ងៃទី២១ ដល់ថ្ងៃទី២៣ ខែតុលា ឆ្នាំ២០២៥។
ក្នុងឱកាសនោះ លោកនាយឧត្តមសេនីយ៍ ម៉ៅ សុផាន់ បានចូលជួបសម្តែងការគួរសមជាមួយ លោក DESMOND CHOO រដ្ឋលេខាធិការក្រសួងការពារជាតិសិង្ហបុរី និងលោក ឧត្តមនាវីឯក AARON BENG អគ្គមេបញ្ជាការកងទ័ពសិង្ហបុរី ព្រមទាំងបានជួបពិភាក្សាការងារទ្វេភាគី ជាមួយ លោក ឧត្តមសេនីយ៍ទោ CAI DEXIAN មេបញ្ជាការកងទ័ពជើងគោកសិង្ហបុរី ក្នុងគោលបំណងពង្រឹង កិច្ចសហប្រតិបត្តិការការពារជាតិ រវាងប្រទេសទាំងពីរ កម្ពុជា-សិង្ហបុរី ឲ្យកាន់តែស៊ីជម្រៅ។
ដំណើរទស្សនកិច្ចរបស់ លោកនាយឧត្តមសេនីយ៍ ម៉ៅ សុផាន់ ទៅកាន់សិង្ហបុរីនាពេលនេះ ស្របពេលដែលឆ្នាំ២០២៥ គឺជាខួបអនុស្សាវរីយ៍៦០ឆ្នាំំ នៃការបង្កើតទំនាក់ទំនងការទូតប្រទេសទាំងពីរ កម្ពុជា-សិង្ហបុរី៕
