សាស្រ្តាចារ្យ ឈាង រ៉ា ចុះសួរសុខទុក្ខពលរដ្ឋ ខ្មែរ៣នាក់ របួសដែលត្រូវទាហានថៃបាញ់
ភ្នំពេញ ៖ លោកសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានអញ្ជើញចុះសួរសុខទុក្ខប្រជាជនខ្មែរ ជាជនស៊ីវិលស្លូតត្រង់ កំពុងសម្រាលព្យាបាលនៅមន្ទីរពេទ្យកាល់ម៉ែត ដែលរងគ្រោះដោយសារការបាញ់ប្រហារ ដោយកងកម្លាំងថៃ នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ កាលពីរសៀលថ្ងៃទី១២ ខែវិច្ឆិកា ឆ្នាំ២០២៥ ។
ក្នុងឱកាសចុះពិនិត្យ និងសាកសួរសុខទុក្ខ សាស្រ្តាចារ្យរដ្ឋមន្រ្តី បានប្រជុំការងារបច្ចេកទេសវេជ្ជសាស្រ្តកម្រិតឯកទេស ជាមួយគ្រូពេទ្យពហុជំនាញពាក់ព័ន្ធ ពិនិត្យបន្ថែមលក្ខណៈស៊ីជម្រៅ និងលម្អិតលើករណីជំងឺនីមួយៗ ដើម្បីពិនិត្យ និងបញ្ជាក់បន្ថែមលើភាពច្បាសលាស់នៃការធ្វើរោគវិនិច្ឆ័យ និងវិធីសាស្រ្ត នៃការព្យាបាល និងជំហានបន្ទាប់ សំដៅគោលការណ៍សុវត្ថិភាព និប្រសិទ្ធភាពខ្ពស់បំផុត។
សូមជម្រាបថា បច្ចុប្បន្នអ្នកជំងឺទាំង៣នាក់ បានបញ្ជូនបន្តពីមន្ទីរពេទ្យមិត្តភាពកម្ពុជា-ជប៉ុនមង្គលបូរី ខេត្តបន្ទាយមានជ័យ មកមន្ទីរពេទ្យកាល់ម៉ែត ដើម្បីបន្តតាមដាន សម្រាកព្យាបាល ក្រោមការយកចិត្តទុកដាក់ពីថ្នាក់ដឹកនាំក្រសួង និងក្រុមគ្រូពេទ្យគ្រប់ជំនាញ ស្របតាមអនុសាសន៍ យកចិត្តទុកដាក់ខ្ពស់របស់សម្តេចតេជោ ហ៊ុន សែន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត៕
