រដ្ឋមន្ត្រីអប់រំ លើកទឹកចិត្ត លោកគ្រូ អ្នកគ្រូ បន្តចូលរួមចំណែក ដើម្បីធ្វើឱ្យការរៀន ភាសាបារាំង នឹងប្រែក្លាយ ជាបទពិសោធន៍ មួយដ៏រីករាយ
ភ្នំពេញ ៖ ក្នុងកម្មវិធីអបអរសាទរទិវាគ្រូបង្រៀន ភាសាបារាំងអន្តរជាតិ, លោក ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានលើក ទឹកចិត្តដល់ លោកគ្រូ អ្នកគ្រូ បន្តចូលរួមចំណែក ដើម្បីធ្វើឱ្យការរៀនភាសា បារាំង នឹងប្រែក្លាយជាបទ ពិសោធន៍មួយដ៏រីករាយ។
ការលើកឡើង របស់ លោក ហង់ជួន ណារ៉ុន ក្នុងពិធីអបអរសាទរ «ទិវាគ្រូបង្រៀនភាសាបារាំងអន្តរជាតិ» បានប្រារព្ធឡើង នៅស្ថានទូតបារាំង ប្រចាំនៅកម្ពុជា នៅថ្ងៃទី២៦ វិច្ឆិកា ដោយមានការអញ្ជើញចូលរួមពី លោក លោកស្រី តំណាងស្ថាប័ន និងសាកលវិទ្យាល័យដែលប្រើប្រាស់ភាសាបារាំង និងលោកគ្រូ អ្នកគ្រូដែលជាគ្រូបង្រៀន ភាសាបារាំងជាច្រើនរូបផងដែរ។
ពិធីជួបជុំនេះ ធ្វើឡើង ដើម្បីអបអរទិវាអន្តរជាតិ នៃគ្រូបង្រៀនភាសាបារាំង ដែលជាតួអង្គលើកស្ទួយ កិត្យានុភាពភាសាបារាំង លើពិភពលោក។
ប្រធានបទដែលត្រូវ បានជ្រើសរើសនៅឆ្នាំនេះគឺ «ច្រៀង លេង បង្រៀន៖ ហ្រ្វង់កូហ្វូនីរណ្ដំដូចតន្រ្ដី» ដែលឆ្លុះបញ្ចាំងអំពី ការពិតនៃថ្នាក់រៀនរបស់យើង និងស្មារតីដែលយើងចង់ បណ្តុះបណ្ដាលក្នុងការអប់រំ ។ តន្ត្រីបានក្លាយជាមធ្យោបាយដែលអាចចូលរួមយ៉ាងទូលំទូលាយសម្រាប់ការសិក្សា។ ការអប់រំដូចជា តន្ត្រី គឺជាសកម្មភាពរួមគ្នា ដែលបង្ហាញពីគន្លងមកពីការទទួលទានយ៉ាងស្រស់ស្អាត : «សាមគ្គីជាកម្លាំង»។
ក្នុងឱកាសនេះផងដែរ លោកឧបនាយករដ្ឋមន្ត្រី បានថ្លែងអំណរគុណចំពោះរដ្ឋាភិបាលបារាំងសម្រាប់ការគាំទ្រ និងការប្តេជ្ញាចិត្តឥតងាករេ ក្នុងការបណ្តុះបណ្តាលអ្នកដឹកនាំ នាពេលអនាគតរបស់យើង តាមរយៈអាហារូបករណ៍ France Excellence និស្សិតកម្ពុជា ចំនួន ៣៤៧ នាក់ (រួមទាំងអ្នកទទួលអាហារូបករណ៍ Eiffel ៥០ នាក់) ទទួលបានអត្ថប្រយោជន៍ ចន្លោះឆ្នាំ ២០២០ និង ២០២៦ ពីឱកាសក្នុងការអប់រំកម្រិត ខ្ពស់នៅប្រទេសបារាំង។
បន្ថែមពីនេះ លោកឧបនាយករដ្ឋមន្រ្ដី បានមានប្រសាសន៍ថា កម្ពុជា បានប្តេជ្ញាចិត្តយ៉ាងមុតមាំ ក្នុងការរៀបចំព្រឹត្តិការណ៍ ដ៏មានសារៈសំខាន់ជាប្រវត្តិសាស្ត្រ ដែលកម្ពុជានឹង ក្លាយជាម្ចាស់ផ្ទះនៃកិច្ចប្រជុំកំពូល Francophonie នៅឆ្នាំ ២០២៦ ខាងមុខនេះ។
លោកឧបនាយករដ្ឋមន្រ្ដី បានបន្ថែមទៀតថា «លោកគ្រូ អ្នកគ្រូគឺជាស្ថាបត្យករដែលបង្កើត អនាគតភាសាបារាំង របស់ប្រទេសកម្ពុជា ក្នុងការរៀបចំសម្រាប់កិច្ចប្រជុំកំពូលឆ្នាំ ២០២៦ ដូច្នេះសូមលើកទឹកចិត្តឱ្យលោកគ្រូ អ្នកគ្រូបន្តចូលរួមចំណែកដើម្បីធ្វើឱ្យការរៀនភាសាបារាំងនឹងប្រែក្លាយជាបទពិសោធន៍មួយដ៏រីករាយ»៕
