សម្ដេចធិបតី ណែនាំឲ្យផ្សព្វផ្សាយស្វែង រកអ្នកផ្ទុក មេរោគអេដស៍ជាង ៤ពាន់នាក់ ដើម្បីទទួលបានការព្យាបាល
ភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានណែនាំដល់គ្រប់ភាគី ផ្សព្វផ្សាយស្វែងរកអ្នកផ្ទុកមេរោគ អេដស៍ជាង ៤ ០០០នាក់ មិនទាន់បានដឹងពីស្ថានភាព របស់ពួកគេឲ្យមកទទួលសេវា ធ្វើតេស្តរកមេរោគអេដស៍ ដើម្បីទទួលបានការព្យាបាលទាន់ពេល។
តាមរយៈសារលិខិត សម្តេចមហាបវរធិបតី ហ៊ុន ម៉ាណែត ក្នុងឱកាសទិវាពិភពលោកប្រយុទ្ធនឹងជំងឺអេដស៍ ១ ធ្នូ ឆ្នាំ២០២៥ ក្រោមប្រធានបទ «យកឈ្នះការរំខាន បរិវត្តកម្មឆ្លើយតប នឹងជំងឺអេដស៍» សម្ដេចធិបតី បានសម្តែងអំណរសាទរ ចំពោះសមិទ្ធផលកម្ពុជាសម្រេចបាន ក្នុងការទប់ស្កាត់ការរីករាលដាល នៃមេរោគអេដស៍និងជំងឺអេដស៍ ដូចមានចំណុចសំខាន់ៗ ដូចជា៖
១- នៅឆ្នាំ២០២៤ អ្នកផ្ទុកមរោគអេដស៍មានចំនួនប្រមាណ ៧៦ ០០០នាក់ ដែលក្នុងនេះអ្នកផ្ទុកមេរោគ អេដស៍ចំនួន ៧១ ៧១៦នាក់ បានទទួលការធ្វើតេស្តរកមេរោគ និងបានដឹងពីស្ថានភាព ផ្ទុកមេរោគអេដស៍ របស់ពួកគេ និងបានទទួលសេវាថែទាំ និងព្យាបាលដោយឱសថប្រឆាំងមេរោគអេដស៍នៅមូលដ្ឋាន សុខាភិបាលរបស់រដ្ឋនៅ ទូទាំងប្រទេស ស្មើនឹង១០០% ដែលជាអត្រាគ្របដណ្តប់ខ្ពស់ជាងគេនៅតំបន់ អាស៊ី-ប៉ាស៊ីហ្វិក។
២- ករណីឆ្លងថ្មីនៃមេរោគអេដស៍បានធ្លាក់ចុះជាបន្តបន្ទាប់ ជាក់ស្តែងការឆ្លងថ្មីនៃមេរោគអេដស៍បានធ្លាក់ចុះពី ១ ៥០០ករណីក្នុងឆ្នាំ២០២៣ មកនៅត្រឹម ១ ២០០ករណីក្នុងឆ្នាំ២០២៤។ ចំណែកឯចំនួនអ្នកស្លាប់ ដោយសារមេរោគអេដស៍ក៏បានធ្លាក់ចុះពី ១ ១០០ករណីក្នុងឆ្នាំ២០២៣ មកនៅត្រឹម ១ ០០០ករណី ក្នុងឆ្នាំ២០២៤។
៣- អ្នកផ្ទុកមេរោគអេដស៍នៅកម្ពុជា ត្រូវបានរាប់បញ្ចូលក្នុងចំណោមប្រជាជនក្រីក្រដែលកំពុងទទួលបាន នូវផលប្រយោជន៍នៃកម្មវិធីគាំពារសង្គមកាន់តែទូលំទូលាយ។ គិតពីពេលចាប់ផ្តើមអនុវត្តកម្មវិធី ក្នុងត្រីមាសទី១ ឆ្នាំ២០២២ រហូតដល់ដំណាច់ខែកញ្ញា ឆ្នាំ២០២៥ អ្នកផ្ទុកមេរោគអេដស៍ ចំនួន ៥៣ ៨២១នាក់ បានទទួលប័ណ្ណមូលនិធិសមធម៌ សុខាភិបាល ស្មើនឹង ៧៥% នៃអ្នកផ្ទុកមេរោគអេដស៍ សកម្មចំនួន ៧១ ៧១៦នាក់។
៤- ប្រជាជនគន្លឹះចំនួន ១៥ ៤៥៤នាក់ បានទទួលប័ណ្ណមូលនិធិសមធម៌សុខាភិបាល នៅត្រីមាសទី១ ឆ្នាំ ២០២៥។
៥- រាជរដ្ឋាភិបាលបានដាក់ចេញនូវគោលនយោបាយជាតិបញ្ចប់អេដស៍ និងចីរភាពកម្មវិធីអេដស៍ សម្រាប់ ឆ្នាំ២០២៣-២០២៨ ដើម្បីឆ្ពោះទៅបញ្ចប់អេដស៍ដែលជាបញ្ហាសុខភាពសាធារណៈ។
៦- យើងកំពុងពង្រឹងប្រព័ន្ធជាតិឆ្លើយតបនឹងមេរោគអេដស៍ និងជំងឺអេដស៍ សំដៅជំរុញចរន្តជាតិមួយ ដ៏មុតស្រួច ដោយបង្កលក្ខណៈឱ្យគ្រប់ក្រសួង ស្ថាប័ន រាជធានី ខេត្ត ក្រុង ស្រុក ខណ្ឌ ឃុំ សង្កាត់ ដំណើរការ គណៈកម្មាធិការប្រយុទ្ធនឹងជំងឺអេដស៍គ្រប់លំដាប់ថ្នាក់ ជាមួយនឹងកិច្ចសហការយ៉ាងជិតស្និទ្ធជាមួយ ដៃគូអភិវឌ្ឍ អង្គការអន្តរជាតិ រួមទាំងអង្គការមិនមែនរដ្ឋាភិបាល អង្គការសង្គមស៊ីវិលជាតិ និងអន្តរជាតិ។
សម្ដេច នាយកករដ្ឋមន្ដ្រី គូសបញ្ជាក់ថា «ជាមួយនឹងសមិទ្ធផលខាងលើ យើងទាំងអស់គ្នាត្រូវខិតខំបន្ថែមទៀត ក្នុងការផ្សព្វផ្សាយស្វែងរកអ្នកផ្ទុក មេរោគអេដស៍ ចំនួនប្រមាណជាង ៤ ០០០នាក់ ដែលមិនទាន់បានដឹងពីស្ថាន ភាពរបស់ពួកគេឱ្យមកទទួលសេវាធ្វើ តេស្តរកមេរោគអេដស៍ ដើម្បីទទួលបានការព្យាបាលទាន់ពេល និងខិតខំកាត់បន្ថយអត្រាបោះបង់ការថែទាំ និងព្យាបាល របស់អ្នកផ្ទុកមេរោគអេដស៍»។
សម្ដេច នាយកករដ្ឋមន្ដ្រី បន្ដថា ជាមួយគ្នានេះ គ្រប់ក្រសួង ស្ថាប័ន រាជធានី ខេត្ត ក្រុង ស្រុក ខណ្ឌ ឃុំ សង្កាត់ ត្រូវដើរតួនាទីនាំមុខជាអ្នកសម្របសម្រួលកម្មវិធីបង្ការទប់ស្កាត់ការរីករាលដាលនៃមេរោគអេដស៍ ដោយគ្មានការរើសអើង មាក់ងាយ និងផ្តោតការយកចិត្តទុកដាក់ជាពិសេសចំពោះប្រជាជនគន្លឹះ ដូចជា ក្រុមបុរសរួមភេទជាមួយបុរស ក្រុមបំប្លែងភេទ ក្រុមអ្នកបម្រើការនៅសេវាកម្សាន្ត អ្នកប្រើប្រាស់គ្រឿងញៀន និងក្រុមយុវវ័យ ដែលត្រូវទាក់ទាញ ឱ្យមកធ្វើតេស្តរកមេរោគអេដស៍ឱ្យបានឆាប់ និងទទួលបានសេវាព្យាបាលមេរោគអេដស៍ក្នុងថ្ងៃតែមួយ៕
