ពិធីចុះអនុស្សរណៈនៃការយោគយល់ ស្តីពីការចូលរួមក្នុង បរិវត្តកម្មឌីជីថល នៃក្រសួងទេសចរណ៍
ភ្នំពេញ ៖ លោក ហួត ហាក់ រដ្ឋមន្ត្រីក្រសួងទេសចរណ៍ រួមជាមួយអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា, ប្រធានក្រុមប្រឹក្សាភិបាល និងជាអគ្គនាយកប្រតិបត្តិក្រុមហ៊ុន រ៉ូយាល់ គ្រុប និងលោកស្រី មាស សុភារ័ត្ន ប្រធានក្រុមប្រឹក្សាភិបាលក្រុមហ៊ុនប្រាវីនយ៉ា បានអញ្ជើញជាអធិបតី ក្នុងពិធីចុះអនុស្សរណៈ នៃការយោគយល់ ស្តីពីការចូលរួមក្នុងបរិវត្តកម្មឌីជីថល នៃក្រសួងទេសចរណ៍ ដោយមានលោក នាង ម៉ៅ រដ្ឋលេខាធិការ ក្រសួងទេសចរណ៍ តំណាងក្រសួងទេសចរណ៍ និងលោក Yap Kok Leong អគ្គនាយកប្រតិបត្តិក្រុមហ៊ុន សែលកាត តំណាងក្រុមហ៊ុន ខេមជី អេស អេម “CAMG SM” (Cellcard) និងលោកស្រី មាស សុភារម្យ អនុប្រធានក្រុមប្រឹក្សាភិបាល ក្រុមហ៊ុនប្រាវីនយ៉ា តំណាងក្រុមហ៊ុនប្រាវីនយ៉ា ជាអ្នកហត្ថលេខី លើអនុស្សរណៈ នៃការយោគយល់នេះ ។
ពិធីដ៏មានសារៈសំខាន់នេះ ធ្វើឡើងនាថ្ងៃទី២៨ ខែវិច្ឆិកា ឆ្នាំ២០២៥ ដោយមានការអញ្ជើញចូលរួមពីសំណាក់ ភ្ញៀវកិត្តិយសជាតិ និងអន្តរជាតិ តំណាងក្រុមហ៊ុន ខេមជី អេស អេម (CAMG SM) និងក្រុមហ៊ុន ប្រាវីនយ៉ា ប្រមាណ ២០០នាក់។
ក្នុងពិធីដ៏ឧត្តុង្គឧត្តមនេះ លោករដ្ឋមន្ត្រី បានគូសបញ្ជាក់ថា តាមរយៈកិច្ចសហប្រតិបត្តិការខាងលើ, ក្រសួងទេសចរណ៍ បានសហការ ជាមួយក្រុមហ៊ុន PRAVINYA ដើម្បីបង្កើតនូវគេហទំព័រ ដែលមានឈ្មោះថា Visit Cambodia និងកម្មវិធី Visit Cambodia APP (Super APP) ដែលគ្រោងនឹងដាក់ ឱ្យដំណើរការ នាពេលឆាប់ៗខាងមុខនេះ ។ ជាក់ស្តែងតាមរយៈ កម្មវិធី Super App របស់ក្រុមហ៊ុន PRAVINYA និងរួមជាមួយកិច្ចសហការ ជាមួយក្រុមហ៊ុន CELLCARD នឹងបន្ថែមមុខងារ ដល់ Super APP ក្នុងការផ្ដល់នូវភាពងាយស្រួល និងអត្ថប្រយោជន៍បន្ថែមទៀត ជូនដល់ភ្ញៀវទេសចរ អន្តរជាតិ ដែលមានបំណង ធ្វើដំណើរកម្សាន្ត មកព្រះរាជាណាចក្រកម្ពុជា។
ជាមួយគ្នានេះ លោករដ្ឋមន្ត្រី ក៏បានថ្លែងនូវការកោតសរសើរ វាយតម្លៃខ្ពស់ និងថ្លែងអំណរគុណ ចំពោះ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា ដែលជានិច្ចជាកាលតែងតែបានចូលរួម សហការគាំទ្រឧបត្ថម្ភ សព្វគ្រប់បែបយ៉ាង តាមគ្រប់រូបភាព តាមគ្រប់មធ្យោបាយនៅរាល់ព្រឹត្តិការណ៍ ពិធីបុណ្យ និងកម្មវិធីនានា របស់ក្រសួងទេសចរណ៍ ដែលជួយលើកស្ទួយវិស័យទេសចរណ៍កម្ពុជា និងចូលរួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ចកម្ពុជា ព្រមទាំងលើកកម្ពស់កិត្តិនាមកម្ពុជានៅលើឆាកអន្តរជាតិ។
ជាមួយគ្នានេះ លោករដ្ឋមន្រ្តី ក៏បានថ្លែងអំណរគុណដល់ លោកស្រី មាស សុភារ័ត្ន និងក្រុមហ៊ុនប្រាវីនយ៉ា ដែលបានចូលរួម ជាមួយក្រសួងទេសចរណ៍ នៅក្នុងការអភិវឌ្ឍទេសចរណ៍ឌីជីថល នៅក្នុងបរិបទបរិវត្តកម្មឌីជីថលដ៏មានសារៈសំខាន់ នាពេលនេះ៕
ដោយ៖ ដារាត់| ដើមអម្ពិល
