ឧត្តមសេនីយ៍ទោ ស ថេង ស្នងការនគរបាលខេត្តពោធិ៍សាត់ រៀបចំពិធីក្រុងពាលី សាងសង់អាគារការិយាល័យថ្មី សម្រាប់បម្រើការងារបង្ការ ពន្លត់អគ្គីភ័យ និងសង្គ្រោះ
ពោធិ៍សាត់ ៖ នៅព្រឹកថ្ងៃអាទិត្យ ទី៣០ ខែវិច្ឆិកា ឆ្នាំ២០២៥ លោកឧត្តមសេនីយ៍ទោ ស ថេង ស្នងការនគរបាលខេត្តពោធិ៍សាត់ ព្រមទាំងគណៈស្នងការ បានរៀបចំធ្វើពិធីក្រុងពាលី បើកការដ្ឋានសាងសង់ជាផ្លូវការ នូវអគារការិយាល័យថ្មីមួយខ្នង ដែលមានទំហំ១៨ម៉ែត្រ គុណនឹង៥ម៉ែត្រ សម្រាប់បម្រើការងាររបស់ការិយាល័យនគរបាលបង្ការ ពន្លត់អគ្គីភ័យ និងសង្គ្រោះ នៃស្នងការដ្ឋាននគរបាលខេត្ត។ អគារថ្មីនេះ ត្រូវបានសាងសង់ឡើងទាំងស្រុងដោយប្រើប្រាស់ ថវិកាផ្ទាល់ខ្លួន របស់លោកឧត្តមសេនីយ៍ទោ ស្នងការផ្ទាល់ ដើម្បីលើកកម្ពស់លក្ខខណ្ឌការងារ និងប្រសិទ្ធភាពនៃការបម្រើសេវាសាធារណៈជូនប្រជាពលរដ្ឋក្នុងមូលដ្ឋាន។
ពិធីក្រុងពាលីនេះ ត្រូវបានប្រារព្ធឡើងទៅតាមប្រពៃណី សាសនា ដ៏ខ្ជាប់ខ្ជួន ក្រោមការចូលរួមពី ថ្នាក់ដឹកនាំស្នងការដ្ឋាន លោកនាយការិយាល័យ និង មន្ត្រីនគរបាល ចូលរួមជាច្រើនរូប ។ គម្រោងសាងសង់អគារការិយាល័យថ្មីនេះ គឺជាកាយវិការនៃការយកចិត្តទុកដាក់ខ្ពស់របស់លោកឧត្តមសេនីយ៍ទោ ស ថេង ចំពោះកងកម្លាំងនគរបាល និងវិស័យសន្តិសុខសាធារណៈ ជាពិសេសការងារសង្គ្រោះ និងបង្ការគ្រោះមហន្តរាយ។
អគារការិយាល័យថ្មីនេះ ត្រូវបានរំពឹងថា នឹងក្លាយជាមជ្ឈមណ្ឌលបញ្ជាការ ដែលមានលទ្ធភាពគ្រប់គ្រាន់ក្នុងការទទួល និងឆ្លើយតបទៅនឹងករណីអគ្គីភ័យ និងគ្រោះថ្នាក់ផ្សេងៗ បានកាន់តែឆាប់រហ័ស និងមានប្រសិទ្ធភាពជាងមុន
ប្រកបដោយ ទីកន្លែងបំពាក់សម្ភារៈ និងឧបករណ៍បច្ចេកទេសជំនាញ ដើម្បីត្រៀមលក្ខណៈជួយសង្គ្រោះប្រជាពលរដ្ឋបានទាន់ពេលវេលា។
ការចំណាយថវិកាផ្ទាល់ខ្លួនរបស់លោកឧត្តមសេនីយ៍ទោ ស ថេង ក្នុងការសាងសង់សមិទ្ធផលនេះ គឺបានឆ្លុះបញ្ចាំងពីភាពជាអ្នកដឹកនាំដ៏គំរូ និងការប្តេជ្ញាចិត្តរបស់លោក ក្នុងការកសាងហេដ្ឋារចនាសម្ព័ន្ធចាំបាច់នានា ដើម្បីជាប្រយោជន៍ដល់អង្គភាព និងសង្គមជាតិទាំងមូល។ ការងារបង្ការ ពន្លត់អគ្គីភ័យ និងសង្គ្រោះ គឺជាការងារអាទិភាព ដែលទាមទារនូវការត្រៀមលក្ខណៈសម្បត្តិជានិច្ច ទាំងធនធានមនុស្ស ទាំងសម្ភារៈបរិក្ខារ និងទីកន្លែងធ្វើការងារឱ្យបានសមរម្យ និងបង្កើនការឆ្លើយតបទៅនឹងតម្រូវការចាំបាច់របស់ប្រជាពលរដ្ឋ៕
អត្ថបទនេះ÷ ស្នងការដ្ឋានខេត្តពោធិ៍សាត់|ខេម៉ា | ដើមអម្ពិល
