អគ្គនាយកស៊ីម៉ាក់កម្ពុជា៖ ករណីផ្ទុះមីនជនជាតិចិនម្នាក់ ធ្វើឱ្យនឹកឃើញព្រឹត្តិការណ៍ប្រវត្តិសាស្ត្រ ដែលទាហ៊ានថៃបានដឹកជនភៀសខ្លួនកម្ពុជា យកចាក់ចោលនៅតំបន់ភ្នំខ្មោច
ភ្នំពេញ៖ លោក ហេង រតនា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា ហៅកាត់ថា CMAC បានលើកឡើងថា ករណីផ្ទុះមីនជនជាតិចិនម្នាក់ ធ្វើឱ្យនឹកឃើញព្រឹត្តិការណ៍ប្រវត្តិសាស្ត្រ ដែលទាហ៊ានថៃបានដឹកជនភៀសខ្លួនកម្ពុជា យកចាក់ចោលនៅតំបន់ភ្នំខ្មោច ។
តាមរយៈសំណែរនៅលើបណ្ដាញសង្គមហ្វេសប៊ុក នៅថ្ងៃទី៣០ ខែវិច្ឆិកា ឆ្នាំ២០២៥នេះ លោក ហេង រតនា បានសរសេរយ៉ាងដូច្នេះថា៖ បញ្ហាផ្ទុះគ្រាប់មីនប្រឆាំងមនុស្សរបួសដាច់ជេីងម្ខាងនិងរងរបួសដៃព្រមទាំងផ្ទៃមុខ ជនជាតិចិនម្នាក់ភេទប្រុស វេលាម៉ោងប្រមាណ៣:២០នាទីព្រឹកទៀបភ្លឺ នៅថ្ងៃទី២៩ ខែវិច្ឆិកា ឆ្នាំ២០២៥ នៅភូមិសាស្រ្តចម្ការមីនកម្ពុជាលេខBS:22575 ក្បែរបង្គោលសីមាលេខ៤៨ ស្ថិតនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
លោកបន្ថែមថា ក្រោយឧបទ្ទវហេតុគ្រោះថ្នាក់ផ្ទុះមីនជនជាតិចិនម្នាក់នេះភ្លាម ខាងភាគីថៃបានបំពងសំឡេង វាយប្រហារលាបពណ៌កម្ពុជាថា ជនជាតិចិនលួចឆ្លងដែនពីកម្ពុជាទៅថៃ និងជាពិសេស ចោទប្រកាន់ថា កម្ពុជាមិនសហកាដោះមីនតាមបណ្តោយព្រំដែនជាដេីម…។
លោកបញ្ជាក់ថា ដោយការចោទប្រកាន់ទាំងឡាយនោះ បានបន្សល់នូវចម្ងល់និងភស្តុតាងមួយចំនួន គួរពិចារណាស្វែងយល់ការពិតយ៉ាងច្រើន។ សុំបញ្ជាក់តំបន់នេះជាចម្ការមីនចាស់របស់កម្ពុជា សំណល់សង្គ្រាមដោយមានភស្តុតាងច្បាស់លាស់ ទាំងប្រភេទគ្រាប់មីន ភូមិសាស្ត្រមានទំនប់ជីក មានលេណដ្ឋានកងទ័ព មានរបងបន្លាលួសចាស់និងជាព្រៃក្រាស់ ។ ការដាក់គ្រាប់មីនបានកើតឡើង តាំងពីក្នុងពាក់កណ្តាលទសវត្សរ៍១៩៨០ដល់ដើមទសវត្សរ៍១៩៩០។
លោក ហេង រតនា សង្កត់ធ្ងន់ថា «ករណីផ្ទុះមីនជនជាតិចិនម្នាក់នេះ ធ្វើឱ្យមនុស្សម្នាទាំងឡាយនឹកឃើញព្រឹត្តិការណ៍ប្រវត្តិសាស្ត្រ ដែលទាហ៊ានថៃ បានដឹកជនភៀសខ្លួនកម្ពុជា ដែលមានឯកសារខ្លះបានបញ្ជាក់ថា មានចំនួនប្រមាណជាង៤៣.០០០នាក់មានទាំងទារក ក្មេងចាស់ប្រុសស្រី យកមកចាក់ចោលនៅតំបន់ភ្នំខ្មោច ដោយបង្ខំឱ្យដើរឆ្លងកាត់ ចម្ការមីនមកកម្ពុជាវិញ បណ្តាលឱ្យជាន់គ្រាប់មីន របួសនិងស្លាប់យ៉ាងច្រើន»។
លោកបន្តថា អ្នកខ្លះមានចម្ងល់ថា “ថៃតែងតែជាន់មីនថ្មី ហេតុអ្វីចិនជាន់មីនចាស់”? នេះជារឿងរ៉ាវប្រវត្តិសាស្ត្រ ត្រូវតែរំលឹកចងចាំនិងមិនអាចបំភ្លេចបាន!! ៕
