ទំហំទឹកចិត្ត ធំជាងទំហំទឹកប្រាក់! លោក ម៉េង ស្រ៊ុន អញ្ជើញដឹកនាំក្រុមការងារកងរាជអាវុធហត្ថខេត្តកំពង់ស្ពឺ ចុះសួសុខទុក្ខភរិយារបស់ លោក ឈឺន ឈុង ដែលកំពុងសម្រាកលំហែមាតុភាព
កំពង់ស្ពឺ៖ នាថ្ងៃទី៨ ខែធ្នូ ឆ្នាំ២០២៥ លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ បានអញ្ជើញដឹកនាំក្រុមការងារកងរាជអាវុធហត្ថខេត្តកំពង់ស្ពឺ និងក្រុមការងារសហភាពសហព័ន្ធយុវជនកម្ពុជាខេត្តកំពង់ស្ពឺ (ស.ស.យ.ក.កំពង់ស្ពឺ) ចុះសួសុខទុក្ខលោកស្រី សុខ ធារ៉ា អាយុ២៤ឆ្នាំ ត្រូវជាភរិយារបស់ លោកព្រឹន្ទបាលទោ ឈឺន ឈុង ជាសមាជិក្រុមទី២ នៃកងអនុសេនាធំចល័តអាវុធហត្ថខេត្តកំពង់ស្ពឺ ដែលកំពុងសម្រាកលំហែមាតុភាព(ឆ្លងទន្លេឫសម្រាល់កូន)នៅមន្ទីរពេទ្យបង្អែកខេត្តកំពង់ស្ពឺ ស្នាក់នៅអាគារផ្នែកសម្ភពនឹងរោគស្រ្តី(ក)នៅបន្ទប់លេខ១។
ក្នុងពេលនោះដែរ លោកឧត្តមសេនីយ៍ត្រី មេបញ្ជាការ រួមនិងក្រុមការងារបានសំណេះសណ្តាល ព្រមទាំងចូលរួមអបអរសាទរចំពោះ លោកព្រឹន្ទបាលទោ ឈឺន ឈុង និងក្រុមគ្រួសារ ដែលទទួលបានសមាជិកថ្មី ប្រកបដោយសុខភាពល្អទាំងម្តាយនិងទារកផងដែរ។ជាពិសេសក៏បាននាំយកនូវថវិកាចំនួន២០០,០០០រៀល និងសម្ភារៈមួយចំនួនមានដូចជា៖អង្ករចំនួន ០២ ការ៉ុង, មីចំនួន ០២កេស និងទឹកសុទ្ធចំនួន០២កេសជាចំណងថែមទៀតផង។
ជាចុងក្រោយ លោកព្រឹន្ទបាលទោ ឈឺន ឈុង និងទាំងភរិយា ព្រមទាំងក្រុមគ្រួសារ បានគោរពថ្លែងអំណរគុណយ៉ាងជ្រាលជ្រៅបំផុតចំពោះ លោកមេបញ្ជាការ ដែលបានចំណាយពេលវេលាដ៏មានតម្លៃ អញ្ជើញចុះមកដោយផ្ទាល់ និងបានជួនពរជ័យសេរីមង្គលដល់ លោកឧត្តមសេនីយ៍ត្រី ម៉េង ស្រ៊ុន មេបញ្ជាការ និងក្រុមគ្រួសារ បុត្រា បុត្រី ព្រមទាំងក្រុមការងារទាំងអស់ សូមអោយមានជន្មាយុយឺនយូរ ជួបប្រទះតែសេចក្តីសុខ សេចក្តីចម្រើន មានសុភមង្គលក្នុងក្រុមគ្រួសារ មានសុខភាពល្អបរិបូរណ៍ និងសូមប្រកបដោយពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕
