អគ្គលេខាធិការអង្គការសហប្រជាជាតិ ជំរុញឲ្យកម្ពុជា និងថៃ អត់ធ្មត់ និងសន្ទនាគ្នា ដើម្បីដោះស្រាយជម្លោះព្រំដែន
បរទេស៖ : ទាក់ទិននឹងរបាយការណ៍នៃការប៉ះទង្គិចប្រដាប់អាវុធជាថ្មីរវាងកម្ពុជា ថៃ អគ្គលេខាធិការអង្គការសហប្រជាជាតិ បានជំរុញឲ្យមានការអត់ធ្មត់ និងការសន្ទនាដើម្បីដោះស្រាយជម្លោះព្រំដែន។
នៅក្នុងសេចក្តីប្រកាសព័ត៌មានរបស់អង្គការសហប្រជាជាតិ នៅថ្ងៃទី៨ ខែធ្នូ ឆ្នាំ២០២៥ អគ្គលេខាធិការអង្គការសហប្រជាជាតិលោក Antonio Guterres មានការព្រួយបារម្ភចំពោះរបាយការណ៍នៃការប៉ះទង្គិចគ្នាដោយប្រដាប់អាវុធជាថ្មីរវាងកម្ពុជា និងថៃ ជាពិសេសការវាយប្រហារតាមអាកាសដែលបានរាយការណ៍ និងការចល័តឧបករណ៍ធុនធ្ងន់នៅតំបន់ព្រំដែន។ លោកជំរុញឱ្យភាគីទាំងពីរអត់ធ្មត់ និងចៀសវាងការកើនឡើងនៃភាពតានតឹងបន្ថែមទៀត ។
នៅក្នុងសេចក្តីប្រកាសព័ត៌មានដដែល បានឱ្យដឹងទៀតថា វិវាទព្រំដែនរវាងកម្ពុជានិងថៃ បានបណ្តាលឲ្យមានជនស៊ីវិលស្លាប់និងរបួសយ៉ាងច្រើនសន្ធឹកសន្ធាប់រួចមកហើយ ខូចខាតហេដ្ឋារចនាសម្ព័ន្ធស៊ីវិល និងការភៀសខ្លួននៅសងខាងព្រំដែន។ លោកអគ្គលេខាធិការសង្កត់ធ្ងន់ថា ភាគីទាំងពីរត្រូវតែការពារជនស៊ីវិល និងជួយសម្រួលដល់ការសង្គ្រោះមនុស្សធម៌។
អគ្គលេខាធិការអង្គការសហប្រជាជាតិបានរំលឹកឡើងវិញនូវការអំពាវនាវរបស់លោកដល់ភាគីឱ្យត្រឡប់ទៅក្របខ័ណ្ឌនៃសេចក្តីថ្លែងការណ៍រួមដែលបានចុះហត្ថលេខានៅទីក្រុងគូឡាឡាំពួរនៅថ្ងៃទី២៦ ខែតុលា ប្តេជ្ញាឡើងវិញចំពោះបទឈប់បាញ់ និងអនុវត្តវិធានការកាត់បន្ថយការកើនឡើងភាពតានតឹង និងការកសាងទំនុកចិត្ត។ លោកអំពាវនាវឲ្យភាគីទាំងពីរប្រើប្រាស់គ្រប់យន្តការទាំងអស់សម្រាប់ការសន្ទនា ដើម្បីស្វែងរកដំណោះស្រាយយូរអង្វែងនៃជម្លោះតាមរយៈមធ្យោបាយសន្តិវិធី។
អង្គការសហប្រជាជាតិ ត្រៀមខ្លួនរួចជាស្រេច ដើម្បីគាំទ្ររាល់កិច្ចខិតខំប្រឹងប្រែង សំដៅលើកកម្ពស់សន្តិភាព ស្ថិរភាព និងការអភិវឌ្ឍន៍ក្នុងតំបន់។
