អាជ្ញាធរមីនកម្ពុជា ៖ គ្រាប់បែកចង្កោម M46 ដែលយោធាថៃ ប្រើប្រាស់មកលើកម្ពុជា វាមិនមែនគ្រាន់តែជាអាវុធនោះទេ វាជាអន្ទាក់ សម្រាប់ជនស៊ីវិល
ភ្នំពេញ ៖ លោក លី ធុជ ទេសរដ្ឋមន្រ្តី អនុប្រធានទី១ អាជ្ញាធរមីនកម្ពុជា បានឲ្យដឹងថា គ្រាប់បែកចង្កោម M46 ដែលយោធាថៃប្រើប្រាស់មកលើកម្ពុជា វាមិនមែនគ្រាន់តែជាអាវុធនោះទេ វាជាអន្ទាក់សម្រាប់ជនស៊ីវិល ព្រមទាំងងាយនឹងផ្ទុះផងដែរ ។
តាមរយៈបណ្ដាញសង្គមហ្វេសប៊ុក នាថ្ងៃទី២៤ ខែធ្នូ ឆ្នាំ២០២៥ លោកទេសរដ្ឋមន្រ្តី លី ធុជ បានគូសបញ្ជាក់ថា «នេះគឺជាគ្រាប់បែកចង្កោម M46 ដែលយោធាថៃប្រើប្រាស់មកលើកម្ពុជា។ វាមិនមែនគ្រាន់តែជាអាវុធនោះទេ វាជាអន្ទាក់សម្រាប់ជនស៊ីវិល ។ គ្រាប់ប្រភេទនេះងាយនឹងផ្ទុះ។ ការប៉ះស្រាលៗ រំញ័រតិចតួច ការចង់ដឹងចង់ឃើញ របស់កុមារ ឧបករណ៍របស់កសិករនៅក្នុងដី មួយណាក៏អាចបង្កឱ្យមានគ្រោះថ្នាក់ដល់ជីវិតផងដែរ»។
លោកទេសរដ្ឋមន្ដ្រី បន្ដថា «គ្រាប់ទាំងនេះខ្ចាត់ខ្ចាយពាសពេញដីរបស់យើង – កសិដ្ឋានរបស់យើង ព្រៃរបស់យើង ភូមិរបស់យើង – ហើយនៅទីនោះជាយូរបន្ទាប់ពីការបាញ់ផ្លោងរួច។ មើលមិនឃើញ គ្មានស្លាកស្នាម និងនៅរង់ចាំ»។
លោកទេសរដ្ឋមន្ដ្រី បន្ថែមថា សម្រាប់កសិករកម្ពុជា វាមានន័យថា ជាការភ័យក្លាចជាប្រចាំថ្ងៃ ដោយគ្រាន់តែចង់ចិញ្ចឹមគ្រួសាររបស់ខ្លួន។ សម្រាប់កុមារកម្ពុជា វាគឺជាឃាតករដែលបន្លំខ្លួនជាប្រដាប់លេង ឬជាសំណល់ធម្មតា។វាមិនមែនជាការការពារទេ។ វាមិនមែនជាឧបទ្ទវហេតុទេ។ វាគឺជាការគំរាមកំហែងដល់ផ្ទៃដី និងជីវិតរបស់ប្រជាជនកម្ពុជា។
អាជ្ញាធរមីន បន្ដទៀតថា «កម្ពុជាស្គាល់អាវុធទាំងនេះ ។ យើងធ្លាប់រងទុក្ខពីពួកវាពីមុនមក។ យើងដឹងច្បាស់ពីអ្វី ដែលពួកគេធ្វើ ហើយយើងដឹងថាអ្នកណាជាអ្នករងគ្រោះ – ជនស៊ីវិលស្លូតត្រង់ សម្រាប់ឆ្នាំខាងមុខ។ ការប្រើប្រាស់គ្រាប់បែកចង្កោម មិនមែនគ្រាន់តែជាការ វាយប្រហារនៅថ្ងៃនេះទេ។ វាគឺជាការវាយប្រហារ ទៅលើអនាគតរបស់ប្រទេសកម្ពុជា។ ពិភពលោកត្រូវតែឃើញរឿងនេះ ហើយមិនត្រូវនៅស្ងៀមឡើយ»។
