កម្លាំងកងរាជអាធហត្ថខេត្តកំពង់ស្ពឺ ចុះអន្តរាគមន៍ឃាត់ខ្លួន បុរសម្នាក់ដែលធ្វើសកម្មភាពទាញកាំបិតដេញកាប់ម្តាយបង្កើតខ្លួនឯង បញ្ជូនទៅសាលាដំបូងខេត្ត
កំពង់ស្ពឺ៖ ដោយអនុវត្តតាមបទបញ្ជាយ៉ាងម៉ឺងម៉ាត់របស់ លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ និងមានការសម្របសម្រួលនីតិវិធីពីព្រះរាជអាជ្ញា អមសាលាដំបូងខេត្តកំពង់ស្ពឺ កាលពីថ្ងៃទី១៩ ខែកុម្ភៈ ឆ្នាំ២០២៦ នាវេលាម៉ោង១៣:១០នាទី កន្លងមកនេះ បន្ទាប់ពីបានទទួលនូវពាក្យបណ្តឹងពីជនរងគ្រោះឈ្មោះ សន ព្រឹម ភេទស្រី អាយុ៦៥ឆ្នាំ មានទីលំនៅបច្ចុប្បន្នភូមិអំពិលក្តា ឃុំវាលពន់ ស្រុកថ្ពង ខេត្តកំពង់ស្ពឺ កម្លាំងកងរាជអាធហត្ថខេត្តកំពង់ស្ពឺ បានធ្វើការចុះអន្តរាគមន៍បង្ក្រាបនិងឈានដល់ការឃាត់ខ្លួនជនសង្ស័យម្នាក់ ពាក់ព័ន្ធករណីហិង្សាក្នុងគ្រួសារនិងគំរាមកំហែងថានឹងសម្លាប់ ស្ថិតនៅក្នុងភូមិអំពិលក្តា ឃុំវាលពន់ ស្រុកថ្ពង ខេត្តកំពង់ស្ពឺ។
តាមការរៀបរាប់របស់ជនរងគ្រោះដែលត្រូវជាម្តាយបង្កើត បានបញ្ជាក់ថាជនសង្ស័យឈ្មោះ ផុន ទីន ត្រូវជាកូនបានធ្វើសកម្មភាពកាន់កាំបិតផ្គាក់ដេញកាប់រូបគាត់ ប៉ុន្តែគាត់រត់គេចទាន់ពេល តែបានបន្តទៅកាប់បំផ្លាញខ្សែរភ្លើងនៅក្នុងផ្ទះចោល គាត់បានបន្តរៀបរាប់ទៀតថាឲ្យតែនៅពេលស្រវឹងស្រាតែងតែកាន់កាំបិតផ្គាក់គំរាមកំហែង និងជេរប្រមាថម្តាយជាញឹកញាប់នាពេលកន្លងមក។ជាក់ស្តែងនៅពេលកម្លាំងកងរាជអាវុធហត្ថចុះដល់ទីតាំងកន្លែងកើតហេតុ ឃើញថាជនសង្ស័យមានភាពកោងកាច ដៃកាន់កាំបិតផ្គាក់ស្រែកគំរាមកំហែង និងជេរប្រមាថ ទៅលើសមត្ថកិច្ចថែមទៀត មើលទៅពិតជាក្លាហានខ្លាំងណាស់។
ក្រោមវិធានជំនាញរបស់កម្លាំងកងរាជអាវុធហត្ថ ជនសង្ស័យត្រូវបានបង្ក្រាបនិងឃាត់ខ្លួននៅនឹងកន្លែងកើតហេតុភ្លាមៗនិងចាប់យកវត្ថុតាងបានគឺកាំបិតផ្គាក់ចំនួន១ដើម ដែលជនសង្ស័យបានយកធ្វើសកម្មភាព។ជនសង្ស័យមានឈ្មោះ ផុន ទីន ភេទប្រុស អាយុ៣៦ឆ្នាំ មុខរបរមិនពិតប្រាកដ ទីលំនៅបច្ចុប្បន្នភូមិអំពិលក្តា ឃុំវាលពន់ ស្រុកថ្ពង ខេត្តកំពង់ស្ពឺ។
បច្ចុប្បន្នជនសង្ស័យខាងលើ ត្រូវបានកម្លាំងជំនាញកងរាជអាវុធហត្ថខេត្តកំពង់ស្ពឺ កសាងសំណុំរឿងបញ្ជូនទៅសាលាដំបូងខេត្តកំពង់ស្ពឺ ដើម្បីចាត់ការតាមនីតិវិធី ៕
