លោក ហួត ហាក់៖ ក្រៅពីតំបន់ឆ្នេរ កម្ពុជាមានសក្ដានុពល ទេសចរណ៍ធំធេងណាស់ សម្រាប់ការអភិវឌ្ឍវិស័យទេសចរណ៍
ភ្នំពេញ៖ លោក ហួត ហាក់ រដ្ឋមន្ត្រី ក្រសួងទេសចរណ៍ បានគូសបញ្ជាក់ថា ក្រៅពីតំបន់ឆ្នេរ កម្ពុជាមានសក្ដានុពល ទេសចរណ៍ធំធេងណាស់ សម្រាប់ការអភិវឌ្ឍវិស័យទេសចរណ៍ ដែលរួមមានអច្ឆរិយភាពវប្បធម៌ និងអច្ឆរិយភាពធម្មជាតិ និងផលិតផលទេសចរណ៍សម្បូរបែប ។
ការថ្លែងរបស់លោក ហួត ហាក់ ធ្វើឡើងក្នុងពិធីបើកព្រឹត្តិការណ៍ពិព័រណ៌ទេសចរណ៍ វប្បធម៌ និងពាណិជ្ជកម្ម ក្រោមប្រធានបទ «ទេសចរណ៍រីកលូតលាស់ក្នុងសន្តិភាព» ដែលព្រឹត្តិការណ៍នេះ ប្រព្រឹត្តទៅរយៈពេល៥ថ្ងៃ (ចាប់ពីថ្ងៃទី២២ ដល់ថ្ងៃទី២៦ ខែកុម្ភៈ ឆ្នាំ២០២៦) នៅខេត្តព្រះសីហនុ ក្នុងគោលបំណង ដើម្បីទាក់ទាញ ទេសចរឱ្យមកសម្រាកកម្សាន្ត និងស្នាក់នៅបានយូរ ជំរុញការផ្សព្វផ្សាយសក្តានុពល ទាក់ទាញទេសចរតំបន់ឆ្នេរ, ជំនួបរវាងផលិតករជាមួយអ្នកប្រើប្រាស់ ប្រតិបត្តិករទេសចរណ៍ និងការបង្កើតឱកាសដល់អ្នកវិនិយោគ ក៏ដូចជាប្រាស័យទាក់ទង (Networking) ផងដែរ។
ឆ្លៀតក្នុងឱកាសនេះលោករដ្ឋមន្ត្រី បានចូលរួមអបអរសាទរ ចំពោះសមិទ្ធផលជាច្រើនដែលខេត្តព្រះសីហនុ សម្រេចបាននាពេលកន្លងមក ក្នុងនោះរួមមាន៖ ជ័យលាភីជាទីក្រុងទេសចរណ៍គ្មានផ្សែងបារី, ជ័យលាភីផ្ការំដួល៣ទង នៅក្នុងចលនាប្រឡងប្រណាំង ទីក្រុងស្អាត និងកាលពីថ្មីៗនេះ កាលពីថ្ងៃទី៣០ ខែមករា ក្នុងអំឡុងវេទិកាទេស ចរណ៍អាស៊ាន ឆ្នាំ២០២៦ នៅទីក្រុងសេប៊ូ ប្រទេសហ្វីលីពីន ឯកឧត្តមរដ្ឋមន្ត្រី ក៏មានមោទនភាពដែលបានផ្តល់ជ័យលាភី ដែលកម្ពុជាឈ្នះពានរង្វាន់ ស្តង់ដាទេសចរណ៍អាស៊ាន ចំនួន២៧ ក្នុងនោះខេត្តព្រះសីហនុ ឈ្នះពានរង្វាន់៖ ជ័យលាភីជាទីក្រុងស្អាតអាស៊ាន, ពានរង្វាន់បន្ទប់ប្រជុំស្អាតអាស៊ាន, ពានរង្វាន់ទីតាំងពិព័រណ៍ស្អាតអាស៊ាន, ពានរង្វាន់ទីតាំងសន្និសិទស្អាតអាស៊ាន, ពានរង្វាន់ការអនុវត្តទីក្រុង ប្រកបដោយចីរភាពអាស៊ាន។
ជាមួយគ្នានេះ លោករដ្ឋមន្ត្រី បានថ្លែងគូសរំលេចពីភាព សម្បូរបែប នៃធនធាន វប្បធម៌ ប្រវត្តិសាស្រ្ត និងធម្មជាតិ នៅតាមបណ្តាឆ្នេរសមុទ្រ និងកោះនានា គឺជាឧត្តមភាពប្រកួតប្រជែង ក្នុងការអភិវឌ្ឍវិស័យទេសចរណ៍ និងបានធ្វើឱ្យតំបន់ឆ្នេរសមុទ្រកម្ពុជា ទទួលបានប្រជាប្រិយភាព ព្រមទាំងមានកំណើនភ្ញៀវទេសចរជាតិ និងអន្តរជាតិ ជាបន្តបន្ទាប់ឥតដាច់ និងចូលរួមចំណែកធ្វើឱ្យតំបន់ឆ្នេរសមុទ្រកម្ពុជា ក្លាយជាប៉ូលសេដ្ឋកិច្ចទី២ បន្ទាប់ពីរាជធានីភ្នំពេញ ស័ក្តិសមនឹងកិត្តិនាម «តារារះនាទិសនរតី» និងសមាជិកក្លឹបឆ្នេរសមុទ្រដែលស្អាតបំផុត លើសកលលោក។ ជាពិសេសការសម្រេចឱ្យបាន នូវចក្ខុវិស័យរបស់រាជរដ្ឋាភិបាល នីតិកាលទី៧ នៃរដ្ឋសភា ក្នុងការអភិវឌ្ឍខេត្តព្រះសីហនុ ទៅជាតំបន់សេដ្ឋកិច្ចពិសេសគំរូពហុបំណង ដោយប្រែក្លាយក្រុងព្រះសីហនុ ទៅជាមជ្ឈមណ្ឌលសេដ្ឋកិច្ចដ៏សំខាន់ ជំរុញកំណើនសេដ្ឋកិច្ច ការអភិវឌ្ឍសង្គម និងការការពារបរិស្ថានប្រកបដោយនិរន្តរភាព។
លោករដ្ឋមន្ត្រី ហួត ហាក់ បានសង្កត់ធ្ងន់ថា ក្រៅពីតំបន់ឆ្នេរ កម្ពុជាមានសក្ដានុពលទេសចរណ៍ធំធេងណាស់ សម្រាប់ការអភិវឌ្ឍវិស័យទេសចរណ៍ ដែលរួមមានអច្ឆរិយភាព វប្បធម៌ និងអច្ឆរិយភាពធម្មជាតិ និងផលិតផលទេស ចរណ៍សម្បូរបែប ក្នុងនោះមានដូចជា ៖ ទេសចរណ៍បេតិកភណ្ឌវប្បធម៌, ប្រវត្តិសាស្រ្ត, ធម្មជាតិ, អេកូទេសចរណ៍ និងទេសចរណ៍សហគមន៍, ទេសចរណ៍សមុទ្រ, ទេសចរណ៍តាមដងទន្លេ, ទេសចរណ៍ជនបទនិងកសិ-ទេសចរណ៍, ទេសចរណ៍ធុរកិច្ច, ទេសចរណ៍កីឡា, ទេសចរណ៍ម្ហូបអាហារ (ប្រចាំខេត្ត, តំបន់), ទេសចរណ៍បែបផ្សងព្រេង, ទេសចរណ៍ម៉ាយ(MICE Tourism) ។ល។
បន្ថែមលើនេះ លោករដ្ឋមន្ត្រីក៏បានគូសរំលេចបន្ថែមថា វិស័យទេសចរណ៍ ជាវិស័យដែលមានភាពប្រទាក់ក្រឡា ដែលទាមទារឱ្យមានការចូលរួមពីគ្រប់ភាគី ទាំងរដ្ឋនិងឯកជន, ទាំងថ្នាក់ជាតិ, ក្រោមជាតិ, និងកិច្ចសហការអន្តរជាតិ ដោយឈរលើអភិក្រម «ជវភាពនៃប្រព័ន្ធតួអង្គតែមួយ» និងគោលការណ៍គ្រឹះ «ទេសចរណ៍ផ្សារភ្ជាប់នឹងទឹកដី», និងដើម្បីរក្សាឧត្តមភាពប្រកួតប្រជែងខ្ពស់ជាងមុន និងរក្សាកេរ្តិ៍ឈ្មោះកម្ពុជា ជាគោលដៅទេសចរណ៍សុវត្ថិភាព ផ្តល់ភាពកក់ក្តៅ ស្អាត និងបៃតង (Cambodia is a safe, warm, clean and green destination)៕
