វិទ្យាស្ថានបច្ចេកវិទ្យា និងកសិកម្មកម្ពុជា ចុះអនុស្សរណៈយោគយល់គ្នា ជាមួយស្ថាប័ន ACCA និង BSA ដើម្បីផ្តល់ និងពង្រឹងគុណភាព បណ្តុះបណ្តាលវិជ្ជាជីវៈ គណនេយ្យធុរកិច្ច ហិរញ្ញវត្ថុ និងពន្ធដារ
ភ្នំពេញ៖ នៅរសៀលថ្ងៃអង្គារ ទី២៤ ខែកុម្ភៈ ឆ្នាំ២០២៦ វិទ្យាស្ថានបច្ចេកវិទ្យា និងកសិកម្មកម្ពុជា (CITA) បានចុះអនុស្សរណៈនៃការយោគយល់គ្នា (MoU) ជាមួយសមាគមគណនេយ្យករជំនាញ (ACCA) និងវិទ្យាស្ថានគណនេយ្យធុរកិច្ច (BSA) ដែលពិធីនេះប្រព្រឹត្តទៅក្រោមអធិបតី លោក ជា កុសល រដ្ឋលេខាធិការ តំណាងដ៏ខ្ពង់ខ្ពស់របស់លោកហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅសណ្ឋាគារ ហៃយ៉ាត់ រេជិនស៊ី រាជធានីភ្នំពេញ ។
ការចុះហត្ថលេខានាពេលនេះ គឺជាសក្ខីភាពនៃការប្តេជ្ញាចិត្តរួមគ្នាក្នុងការបណ្តុះបណ្តាល និងលើកកម្ពស់គុណភាព ធនធានមនុស្សក្នុងផ្នែកជំនាញ គណនេយ្យធុរកិច្ច ហិរញ្ញវត្ថុ និងពន្ធដារនៅកម្ពុជា។
ថ្លែងក្នុងនាម ជាអ្នកសង្កេតការណ៍មួយរូប និងក្នុងនាមក្រសួងដែលទទួលបន្ទុកវិស័យបណ្តុះបណ្តាល បច្ចេកទេសនិងវិជ្ជាជីវៈ លោកជា កុសល បានវាយតម្លៃខ្ពស់ ចំពោះគោលបំណង នៃអនុស្សរណៈទាំងពីរ ដែលផ្តោតលើការបណ្តុះបណ្តាលតាមស្តង់ដាអន្តរជាតិ ដើម្បីរៀបចំយុវជន ឱ្យមានសមត្ថភាពខ្ពស់ស្រប តាមតម្រូវការទីផ្សារការងារតំបន់ និងសកលលោក ហើយដែលកិច្ចសហការនេះក៏នឹងសង្កត់ធ្ងន់ លើការអនុវត្តជាក់ស្តែង ការធានាគុណភាពសិក្សា និងការបង្កើតស្ពានតភ្ជាប់រវាងការសិក្សានិងឧស្សាហកម្ម តាមរយៈកម្មវិធីតម្រង់ទិស និងការបង្កើតបណ្តាញទំនាក់ទំនងវិជ្ជាជីវៈ។
លោករដ្ឋលេខាធិការ ក៏បានបង្ហាញ នូវជំនឿយ៉ាងមុតមាំថា កិច្ចសហប្រតិបត្តិការនេះ នឹងក្លាយជាគ្រឹះដ៏រឹងមាំ ក្នុងការរួមចំណែកកសាងប្រព័ន្ធអេកូឡូស៊ី អប់រំបណ្តុះបណ្តាលបច្ចេកទេសនិងវិជ្ជាជីវៈ ប្រកបដោយបរិយាបន្ន និងនិរន្តរភាព ដែលនាំមកនូវផលប្រយោជន៍ដ៏មហាសាលដល់សង្គមជាតិទាំងមូល។
លោកស្រីឧកញ៉ា តាំង ជូលី ប្រធានក្រុមប្រឹក្សាភិបាលវិទ្យាស្ថានបច្ចេកវិទ្យា និង កសិកម្មកម្ពុជា បានលើកឡើងថា កិច្ចសហប្រតិបត្តិការនេះ ឆ្លុះបញ្ចាំងពីចក្ខុវិស័យរួមក្នុងការអភិវឌ្ឍជំនាញបច្ចេកទេសវិជ្ជាជីវៈឱ្យកាន់តែល្អប្រសើរ និងមានស្តង់ដាខ្ពស់ ជាពិសេសលើជំនាញគណនេយ្យធុរកិច្ច ហិរញ្ញវត្ថុ និងពន្ធដារ ។
ទន្ទឹមនេះលោកស្រី បញ្ជាក់បន្ថែមថា សិស្សដែលបញ្ចប់ការសិក្សាដោយជោគជ័យនឹងទទួលបានវិញ្ញាបនបត្ររួមដែលទទួលស្គាល់ដោយក្រសួងការងារ និងបណ្តុះបណ្តាលវិជ្ជាជីវៈ ព្រមទាំងការបញ្ជាក់គុណវុឌ្ឍិអន្តរជាតិពីស្ថាប័ន ACCA ផងដែរ។
តាមរយៈសកម្មភាពទាំងនេះ ភាគីពាក់ព័ន្ធមិនត្រឹមតែចូលរួមបណ្តុះបណ្តាលជំនាញប៉ុណ្ណោះទេ ប៉ុន្តែថែមទាំងបង្កើត នូវទំនុកចិត្ត និងអនាគតដ៏រុងរឿង សម្រាប់សិក្ខាកាមគ្រប់រូប ក្នុងគោលដៅបង្កើតសក្តានុពលធនធានមនុស្ស ប្រកបដោយចីរភាពដើម្បីចូលរួមអភិវឌ្ឍសង្គម និងសេដ្ឋកិច្ចជាតិ៕
