ក្រសួងមហាផ្ទៃ ៖ មានពលរដ្ឋភៀសសឹក ៤៥៧នាក់ទៀត បន្តវិលត្រឡប់ ទៅលំនៅឋានវិញ
ភ្នំពេញ ៖ ក្រសួងមហាផ្ទៃ បានឱ្យដឹងថា មានពលរដ្ឋភៀសសឹកចំនួន ៤៥៧នាក់បន្ថែមទៀត បន្តវិលត្រឡប់ទៅលំនៅឋានវិញ ខណៈមានពលរដ្ឋភៀសសឹកចំនួន ៤៧.៧១៤នាក់ទៀត ពុំទាន់អាចវិលទៅលំនៅឋានវិញ។
យោងតាមសេចក្តីប្រកាសព័ត៌មាន ស្តីពី ស្ថានភាពពលរដ្ឋភៀសសឹក ផលប៉ះពាល់លើតំបន់ស៊ីវិលកម្ពុជា គិតពីម៉ោង ៦ព្រឹក ថ្ងៃទី៣ ដល់ម៉ោង ៦ព្រឹក ថ្ងៃទី៤ ខែមីនា ឆ្នាំ២០២៦ ក្រសួងមហាផ្ទៃ នៃរាជរដ្ឋាភិបាលកម្ពុជា ថា ចាប់តាំងពីបទឈប់បាញ់រវាងកម្ពុជា និងថៃ ជាធរមាន កាលពីថ្ងៃទី២៧ ខែធ្នូ ឆ្នាំ២០២៥មក ភាគីថៃមិនត្រឹមតែពុំបានអនុវត្តតាមសេចក្តីប្រកាសរួមនៃកិច្ចប្រជុំ ពិសេសលើកទី៣ នៃគណៈកម្មាធិការព្រំដែនទូទៅ (GBC) ប៉ុណ្ណោះ ប៉ុន្តែថែមទាំងបានកំពុងធ្វើសកម្មភាពផ្ទុយពីការ ព្រមព្រៀងដែលមានលោក ដូណាល់ ត្រាំ ប្រធានាធិបតីសហរដ្ឋអាម៉េរិក និងលោក អាន់វ៉ា អ៊ីប្រាហ៊ុម នាយករដ្ឋមន្ត្រីនៃប្រទេសម៉ាឡេស៊ី និងជាអតីតប្រធានអាស៊ាន ទៀតផង។
ក្រសួង បន្ដថា ទោះបីជាភាគីទាំងពីរ ពុំបានផ្ទុះអាវុធដាក់ គ្នាក៏ដោយ ប៉ុន្តែ ក្រសួងមហាផ្ទៃ បានបន្តកត់ត្រាទុក រាល់សកម្មភាពមិនស្មោះត្រង់របស់ភាគីថៃ ព្រមទាំងបន្តយកចិត្ត ទុកដាក់ដោះស្រាយផលប៉ះពាល់លើប្រជាពលរដ្ឋ និងតំបន់ស៊ីវិលយ៉ាងយកចិត្តទុកដាក់បំផុត។
ក្នុងស្ថានភាពនេះ ក្រសួងមហាផ្ទៃ នៃរាជរដ្ឋាភិបាលកម្ពុជា បានគូសបញ្ជាក់ថា «មានពលរដ្ឋភៀសសឹក៤៥៧នាក់បន្ថែមទៀត បានបន្តវិលត្រឡប់ទៅលំនៅឋានវិញ។ ដូច្នេះ ក្នុងចំណោមពលរដ្ឋភៀសសឹកសរុបជាង៦សែន៤ម៉ឺននាក់ មានជាង៦សែននាក់ ឬជិត ៩៣% បានវិលត្រឡប់ទៅលំនៅឋានវិញ។ នៅមានពលរដ្ឋចំនួន៤៧.៧១៤នាក់ទៀត (ស្ត្រី២៥.០៤៧នាក់ និង កុមារ១៥.៨៥៧នាក់) ពុំទាន់អាចវិលទៅលំនៅឋានវិញ»៕
