កម្ពុជា-ចិន រៀបចំពិធីជប់លៀង “រាត្រីនៃកិច្ចសហប្រតិបត្តិការឡានឆាង-មេគង្គ” ដើម្បីអបអរសាទរការប្រារព្ធខួបលើកទី១០ និងទិវាសប្តាហ៍នៃកិច្ចសហប្រតិបត្តិការមេគង្គ-ឡានឆាង ឆ្នាំ២០២៦
ភ្នំពេញ៖ នាថ្ងៃទីទី ២០ ខែមីនា ឆ្នាំ២០២៦ នៅសណ្ឋាគារ Rosewood លោក ប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា និងលោក Wang Wenbin ឯកអគ្គរដ្ឋទូតចិនប្រចាំព្រះរាជាណាចក្រកម្ពុជា បានអញ្ជើញជាអធិបតីក្នុងពិធីជប់លៀង “រាត្រីនៃកិច្ចសហប្រតិបត្តិការឡានឆាង-មេគង្គ” ដើម្បីអបអរសាទរការប្រារព្ធខួបលើកទី១០ និងទិវាសប្តាហ៍នៃកិច្ចសហប្រតិបត្តិការមេគង្គ-ឡានឆាង ឆ្នាំ២០២៦ ពិធីនេះសហការរៀបចំដោយក្រសួងការបរទេស និងសហប្រតិបត្តិការអន្តរជាតិ និងស្ថានទូតចិនប្រចាំកម្ពុជា។
ពិធីជប់លៀងនេះ ក៏មានការអញ្ជើញចូលរួមពីមន្រ្តីជាន់ខ្ពស់ រាជរដ្ឋាភិបាលកម្ពុជា រួមមាន លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ក្រុមប្រឹក្សាអភិវឌ្ឍន៍កម្ពុជា និងមន្ត្រីជាន់ខ្ពស់ មកពីក្រសួងស្ថាប័នពាក់ព័ន្ធនានា ព្រមទាំងតំណាងស្ថានទូត នៃប្រទេសសមាជិកមេគង្គ-ឡានឆាង ដែលនេះបង្ហាញពីភាពជោគជ័យជាបន្តបន្ទាប់ និងភាពជាដៃគូដ៏យូរអង្វែងនៃកិច្ចសហប្រតិបត្តិការមេគង្គ-ឡានឆាង ដើម្បីជំរុញសន្តិភាព ស្ថិរភាព និងវឌ្ឍនភាពរួមគ្នា ក្នុងចំណោមប្រទេសសមាជិកទាំងប្រាំមួយ។
លោក ប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា បានមានប្រសាសន៍ថា ប្រារព្ធសប្តាហ៍ MLC ឆ្នាំ២០២៦ និងជាពិសេសខួបលើកទី១០ នៃកិច្ចសហប្រតិបត្តិការមេគង្គ-ឡានឆាង ជាព្រឹត្តិការណ៍ដ៏សំខាន់មួយនៅក្នុងដំណើររួមគ្នារបស់យើងឆ្ពោះទៅរកសន្តិភាព វិបុលភាព និងភាពសុខដុមរមនា។ យើងប់ផ្តើមដើម្បីអបអរសាទរ ដោយស្មោះស្ម័គ្រចំពោះសាធារណរដ្ឋប្រជាមានិតចិន ចំពោះការរៀបចំសមាជប្រជាជនទូទាំងប្រទេស និងសន្និសីទប្រឹក្សានយោបាយប្រជាជនចិនដោយជោគជ័យ។ គូសបញ្ជាក់ពីការប្តេជ្ញាចិត្ត ជាបន្តបន្ទាប់របស់ប្រទេសចិន ចំពោះនវានុវត្តន៍ ទំនើបកម្ម និងការអភិវឌ្ឍប្រកបដោយ ការរួមបញ្ចូលនិងគោលការណ៍ ដែលជំរុញទំនុកចិត្ត និងសុទិដ្ឋិនិយមនៅទូទាំងតំបន់របស់យើង និងលើសពីនេះ។
ឧបនាយករដ្ឋមន្ត្រី បានបញ្ជាក់ថា ក្នុងរយៈពេលមួយទសវត្សរ៍កន្លងមកនេះ កិច្ចសហប្រតិបត្តិការមេគង្គ-ឡានឆាងបានវិវត្តទៅជាវេទិកាថាមវន្ត និងផ្តោតលើលទ្ធផល ដោយលើកកម្ពស់ការសន្ទនា ការអភិវឌ្ឍ និង ទំនុកចិត្តគ្នាទៅវិញទៅមកក្នុងចំណោមប្រទេសរបស់យើង។ កិច្ចសហប្រតិបត្តិការ របស់យើងបានផ្តល់នូវវឌ្ឍនភាពជាក់ស្តែង នៅទូទាំងវិស័យអាទិភាពជាច្រើន រួមទាំងការគ្រប់គ្រងធនធានទឹក ប្រកបដោយចីរភាព ការតភ្ជាប់ហេដ្ឋារចនាសម្ព័ន្ធ ការសម្របសម្រួលពាណិជ្ជកម្ម និងការផ្លាស់ប្ដូររវាងប្រជាជន និងប្រជាជន។
លោក Wang Wenbin ឯកអគ្គរដ្ឋទូតចិនប្រចាំព្រះរាជាណាចក្រកម្ពុជា ក៏មានប្រសាសន៍ថា ពិធីជប់លៀង ដើម្បីអបអរសាទរខួបលើកទី១០ នៃកិច្ចប្រជុំថ្នាក់ដឹកនាំសហប្រតិបត្តិការឡានឆាង-មេគង្គលើកទីមួយ និង “សប្តាហ៍ឡានឆាង-មេគង្គ”។ ១០ ឆ្នាំកន្លងមកនេះ ចាប់តាំងពីកិច្ចប្រជុំថ្នាក់ដឹកនាំ សហប្រតិបត្តិការឡានឆាង-មេគង្គលើកទីមួយ ក្នុងឆ្នាំ ២០១៦ គឺជា “ទសវត្សរ៍មាស” នៃការអភិវឌ្ឍយ៉ាងឆាប់រហ័ស និងលទ្ធផលផ្លែផ្កាសម្រាប់កិច្ចសហប្រតិបត្តិការឡានឆាង-មេគង្គ។ ក្រោមការណែនាំ ជាយុទ្ធសាស្ត្ររបស់មេដឹកនាំ នៃប្រទេសទាំងប្រាំមួយ ប្រទេសចិន និងប្រទេសមេគង្គទាំងប្រាំ បានប្រកាសជាបន្តបន្ទាប់អំពីការបង្កើតសហគមន៍ទ្វេភាគី នៃអនាគតរួម ដោយសម្រេចបាននូវការគ្របដណ្តប់ពេញលេញ នៃសហគមន៍ទ្វេភាគី និងពហុភាគីនៃអនាគតរួមនៅក្នុងតំបន់ឡានឆាង-មេគង្គ។ យន្តការសហប្រតិបត្តិការ ឡានឆាង-មេគង្គ (LMC) ត្រូវបានកែលម្អជាបន្តបន្ទាប់ ដោយបង្កើតក្របខណ្ឌសហប្រតិបត្តិការ ដ៏ទូលំទូលាយ រួមទាំងកិច្ចប្រជុំថ្នាក់ដឹកនាំ កិច្ចប្រជុំរដ្ឋមន្ត្រីការបរទេស កិច្ចប្រជុំមន្ត្រីជាន់ខ្ពស់ និងក្រុមការងាររួមគ្នា ដែលធ្វើឲ្យវាក្លាយជាយន្តការសហប្រតិបត្តិការអនុតំបន់ដ៏ស្វាហាប់ និងមានជោគជ័យបំផុត។
លោក ឯកអគ្គរដ្ឋទូតចិន បានបញ្ជាក់ថា LMC បានចូលដល់ដំណាក់កាលនៃការអភិវឌ្ឍយ៉ាងឆាប់រហ័ស និងទូលំទូលាយ ដោយកិច្ចសហប្រតិបត្តិការក្នុងវិស័យអាទិភាពទាំងប្រាំកាន់តែស៊ីជម្រៅ និងកាន់តែជាក់ស្តែង។ ការកសាងខ្សែក្រវ៉ាត់អភិវឌ្ឍន៍សេដ្ឋកិច្ចឡានឆាង-មេគង្គមានវឌ្ឍនភាពរលូន “ទិដ្ឋាការឡានឆាង-មេគង្គ” សម្រួលដល់ការធ្វើដំណើរញឹកញាប់ កិច្ចសហប្រតិបត្តិការអនុវត្តច្បាប់ពង្រឹងសន្តិសុខ និងអារម្មណ៍នៃការជាកម្មសិទ្ធិរបស់គ្រួសារឡានឆាង-មេគង្គបានចាក់ឫស។ ល្បឿន និងទំហំនៃកិច្ចសហប្រតិបត្តិការ LMC គឺមិនធ្លាប់មានពីមុនមកក្នុងប្រវត្តិសាស្ត្រនៃកិច្ចសហប្រតិបត្តិការអន្តរជាតិ និងតំបន់ ដែលបង្ហាញយ៉ាងពេញលេញអំពីភាពរស់រវើក ភាពស្អិតរមួតដ៏រឹងមាំ និងសកម្មភាពដ៏លេចធ្លោរបស់វា៕
