ធនាគារជាតិនៃកម្ពុជា NBC បានចេញប្រកាសជាផ្លូវការស្តីពី ការផ្តល់សន្និធិយីភាពបន្ទាន់ Emergency Liquidity Assistance – ELA
ភ្នំពេញ៖ ធនាគារជាតិនៃកម្ពុជា NBC បានចេញប្រកាសជាផ្លូវការស្តីពី ការផ្តល់សន្និធិយីភាពបន្ទាន់ Emergency Liquidity Assistance – ELA សំដៅគាំទ្រដល់គ្រឹះស្ថានធនាគារ និងហិរញ្ញវត្ថុទទួលប្រាក់បញ្ញើ ដែលជួបប្រទះបញ្ហាកង្វះសាច់ប្រាក់បណ្តោះអាសន្ន ដើម្បីរក្សាសន្តិសុខ និងស្ថិរភាពហិរញ្ញវត្ថុជារួមនៅក្នុងប្រទេស។
យន្តការគាំទ្រ និងនិយមន័យសំខាន់ៗ
យោងតាមប្រកាសដែលចុះហត្ថលេខាដោយ លោកជំទាវ ជា សិរី អគ្គភិបាលធនាគារជាតិនៃកម្ពុជា កាលពីថ្ងៃទី២០ ខែមីនា ឆ្នាំ២០២៦ យន្តការនេះត្រូវបានបង្កើតឡើងក្នុងនាមធនាគារជាតិជា «អ្នកឱ្យខ្ចីចុងក្រោយ» (Lender of Last Resort)។ ក្នុងនោះមានឧបករណ៍សំខាន់ៗចំនួនពីររួមមាន:
ELA: ការផ្តល់សាច់ប្រាក់បន្ទាន់សម្រាប់គ្រឹះស្ថានដែលមានសោធនភាព (Solvency) ប៉ុន្តែខ្វះខាតសាច់ប្រាក់។
MLF (Marginal Lending Facility): ឧបករណ៍ផ្តល់សន្និធិយីភាពរយៈពេលខ្លី (Overnight) ជាប្រាក់រៀល ដើម្បីសម្រួលដល់ការគ្រប់គ្រងសាច់ប្រាក់ប្រចាំថ្ងៃ។
ដើម្បីអាចទទួលបានសន្និធិយីភាពបន្ទាន់នេះ គ្រឹះស្ថានហិរញ្ញវត្ថុត្រូវបំពេញតាមលក្ខខណ្ឌតឹងរ៉ឹង រួមមាន៖
- ត្រូវតែជាគ្រឹះស្ថានដែលមាន សោធនភាព (មានដើមទុនគ្រប់គ្រាន់តាមកំណត់ក្នុងរយៈពេល ៦ខែចុងក្រោយ)។
- មាន ទ្រព្យបញ្ចាំ ដែលអាចទទួលយកបាន (ដូចជា មូលបត្ររដ្ឋ ជាដើម)។
- ត្រូវបង្ហាញពីផែនការច្បាស់លាស់ក្នុងការដោះស្រាយបញ្ហាសាច់ប្រាក់ និងការសងត្រឡប់មកវិញ។
- គ្រឹះស្ថានជាបុត្រសម្ព័ន្ធធនាគារបរទេស ត្រូវស្វែងរកការគាំទ្រពីក្រុមហ៊ុនមេជាមុនសិន។
ការផ្តល់ឥណទាននេះនឹងត្រូវអនុវត្តតាមអត្រាការប្រាក់ដែលកំណត់ដោយធនាគារជាតិ៖
ប្រាក់រៀល៖ អត្រាការប្រាក់ MLF + ២%។
ប្រាក់ដុល្លារអាមេរិក៖ ផ្អែកលើអត្រា MLF, SOFR និងការបន្ថែមភាគរយជាក់ស្តែង (Premium)។
រយៈពេលនៃការផ្តល់ ELA ជាដំបូងគឺ ៦ខែ ហើយអាចបន្តបាន ៦ខែទៀត ផ្អែកលើការវាយតម្លៃជាក់ស្តែង។
ក្នុងអំឡុងពេលទទួលបានជំនួយសាច់ប្រាក់នេះ គ្រឹះស្ថានត្រូវជាប់កម្រិតលើសកម្មភាពមួយចំនួនដូចជា ហាមបែងចែកភាគលាភ, ហាមតម្លើងប្រាក់បៀវត្សរ៍ដល់ថ្នាក់ដឹកនាំខ្ពស់, និងហាមការវិនិយោគថ្មីៗ។ រាល់ព័ត៌មាននៃការស្នើសុំ និងការអនុវត្តត្រូវរក្សាជាការសម្ងាត់បំផុត ដើម្បីជៀសវាងការបាត់បង់ទំនុកចិត្តពីសាធារណជន។
ការដាក់ចេញនូវប្រកាសនេះ បង្ហាញពីជំហានយុទ្ធសាស្ត្ររបស់ធនាគារជាតិនៃកម្ពុជា ក្នុងការរៀបចំក្របខ័ណ្ឌការពារមុន (Safety Net) ដើម្បីធានាថាប្រព័ន្ធធនាគារកម្ពុជានៅតែរឹងមាំ ទោះស្ថិតក្នុងស្ថានភាពសេដ្ឋកិច្ចប្រែប្រួលក៏ដោយ។
ដោយ៖ សយ រិទ្ធី
