ភ្នំពេញ៖ ការបង្កើតចលនាតស៊ូនៅក្រៅប្រទេស របស់ក្រុមប្រឆាំងដឹកនាំដោយ លោក សម រង្ស៊ី ដែលប៉ុនប៉ងផ្លួលរំលំរាជរដ្ឋាភិបាលស្របច្បាប់ ត្រូវបានអ្នកវិភាគនិងអ្នកតាមដានព្រឹត្តិការណ៍សង្គម នយោបាយកម្ពុជា បង្ហាញនូវទស្សនៈស្រដៀងៗគ្នាថា គ្មាននាំចំណេញដល់ជាតិ ធ្វើឱ្យមានការបែកបាក់ និងជាការផ្ដល់ឱកាសសម្រាប់បរទេសជ្រៀតជ្រែកចូលកិច្ចការផ្ទៃក្នុងកម្ពុជា ដើម្បីប្រកួតប្រជែងភូមិសាស្រ្តនយោបាយ។ភ្នំពេញ៖ ការបង្កើតចលនាតស៊ូនៅក្រៅប្រទេស របស់ក្រុមប្រឆាំងដឹកនាំដោយ លោក សម រង្ស៊ី ដែលប៉ុនប៉ងផ្លួលរំលំរាជរដ្ឋាភិបាលស្របច្បាប់ ត្រូវបានអ្នកវិភាគនិងអ្នកតាមដានព្រឹត្តិការណ៍សង្គម នយោបាយកម្ពុជា បង្ហាញនូវទស្សនៈស្រដៀងៗគ្នាថា គ្មាននាំចំណេញដល់ជាតិ ធ្វើឱ្យមានការបែកបាក់ និងជាការផ្ដល់ឱកាសសម្រាប់បរទេសជ្រៀតជ្រែកចូលកិច្ចការផ្ទៃក្នុងកម្ពុជា ដើម្បីប្រកួតប្រជែងភូមិសាស្រ្តនយោបាយ។
ក្នុងវេទិកាតុមូល ស្ដីអំពី «ការបង្កើតចលនាតស៊ូនៅក្រៅប្រទេស» ដែលរៀបចំដោយរាជ្យបណ្ឌិតសភាកម្ពុជា នៅព្រឹកថ្ងៃទី៦ ខែធ្នូ ឆ្នាំ២០២៤ លោកបណ្ឌិត គិន ភា ក្នុងនាមជាអ្នកតាមដានព្រឹត្តិការណ៍សង្គម បានចាត់ទុកការបង្កើតចលនាតស៊ូនៅក្រៅប្រទេសនេះ គឺមាននិន្នាការរុញកម្ពុជា ឱ្យធ្លាក់ចូលក្នុងអន្ទាក់បដិវត្តន៍ពណ៍។
លោកបណ្ឌិត គិន ភា បញ្ជាក់ថា «ការបង្កើតចលនាតស៊ូនៅក្រៅប្រទេស គឺជាការងាយរុញឱ្យកម្ពុជាធ្លាក់ចូលក្នុងអន្ទាក់បដិវត្តន៍ពណ៍ ដែលប្រជាពលរដ្ឋភាគច្រើនមិនបានដឹងអំពីអន្ទាក់របស់អ្នកនយោបាយ ហើយអ្នកនយោបាយ ក៏មិនបានដឹងអំពីអន្ទាក់របស់មហាអំណាចដែល គឺចេះតែរុញតៗគ្នា ចុងក្រោយសោដនាកម្មត្រូវធ្លាក់លើប្រជាពលរដ្ឋ»។
ចំពោះលោកបណ្ឌិត មាស នី អ្នកវិភាគនិងស្រាវជ្រាវការអភិវឌ្ឍសង្គម បានលើកឡើងថា ការបង្កើតចលនាតស៊ូនៅក្រៅប្រទេស អាចប្រឈមនឹងបញ្ហាច្រើន រួមមានទាំងការឯកភាពផ្ទៃក្នុង កត្ដាភូមិសាស្រ្តនយោបាយ និងការគាំទ្រពីមជ្ឈដ្ឋានអន្តរជាតិផងដែរ។
លោកបណ្ឌិត មាស នី បញ្ជាក់ថា «ចលនាតស៊ូនីមួយៗ បើចង់ខ្លាំង ទាល់តែមានយុទ្ធសាស្រ្តជាបណ្ដោះអាសន្ន យុទ្ធសាស្រ្តអន្តរកាល … ការគ្រប់គ្រងប្រទេសមួយមិនមែនចាំដល់ពេលឈ្នះបានគិតនោះទេ»។
ដោយឡែក លោក វណ្ណ ប៊ុនណា ប្រធានផ្នែកស្រាវជ្រាវនិងតស៊ូមតិនៃសមាគមបណ្ដាញយុវជន (CYN) បានលើកឡើងថា ការផ្លាស់ប្ដូរអំណាចណា ដែលខុសពីរបបប្រជាធិបតេយ្យ គឺនឹងនាំឱ្យកម្ពុជាបែកបាក់ និងវិលទៅរកភាពបរាជ័យសារជាថ្មី។
លោក វណ្ណ ប៊ុនណា បានលើកឡើងថា ការបង្កើតចលនាជាតិតស៊ូនៅក្រៅប្រទេស សុទ្ធសឹងតែជាសមាជិករបស់អតីតគណបក្សសង្គ្រោះជាតិ ដែលត្រូវការសង្វៀនក្នុងការប្រកួតប្រជែងនយោបាយ។
ក្នុងវេទិកាតុមូលដដែលនេះ លោកបណ្ឌិត សុខ ទូច ប្រធានរាជ្យបណ្ឌិតសភាកម្ពុជា ក៏បានធ្វើការជំរុញឱ្យរាជរដ្ឋាភិបាលកម្ពុជា ដឹកនាំដោយសម្ដេចធិបតី ហ៊ុន ម៉ាណែត ប្តឹងមេដឹកនាំបង្កើតចលនាតស៊ូនៅក្រៅប្រទេស ដែលប៉ុនប៉ងផ្ដួលរំលំរាជរដ្ឋាភិបាលស្របច្បាប់ តាមរូបភាពនៃបដិវត្តន៍ពណ៍។
លោកបណ្ឌិត សុខ ទូច បានលើកឡើងថា រដ្ឋធម្មនុញ្ញជាច្បាប់កំពូល ហើយបើមានអ្នកណាហ៊ានរំលោភ រដ្ឋាភិបាលត្រូវមានសិទ្ធប្រើកងកម្លាំងគ្រប់បែបយ៉ាង ដើម្បីការពាររដ្ឋធម្មនុញ្ញ។
លោកបណ្ឌិត សុខ ទូច បញ្ជាក់ថា «ប្រសិនខ្ញុំជានាយករដ្ឋមន្រ្តី ខ្ញុំប្ដឹងតែម្ដង ប្ដឹងទៅអាប្រទេសណាឱ្យឈរអានឹងទី១ ទី២កំទេចចោលម៉ង»។
ក្នុងរយៈពេលចុងក្រោយនេះ លោក សម រង្ស៊ី ដែលរាជរដ្ឋាភិបាលចាត់ទុកជាមេឧទ្ទាមខុសច្បាប់ បាននឹងកំពុងបង្ករភាពវឹកវរ តាមរយៈការប្រកាសបង្កើតចលនាជាតិតស៊ូ នៅក្រៅប្រទេស ដោយបានដាក់ចេញនូវយុទ្ធសាស្រ្តផ្ការីក តាមរូបភាពបដិវត្តន៍ពណ៍៕
