កីឡា

មិត្តភាពអន្ដរជាតិ៖ កម្ពុជា ជួបម៉ុងហ្គោលីល្ងាចនេះ ដើម្បីត្រៀមប្រកួតជម្រុះ World Cup

ភ្នំពេញ៖ ក្រុមជម្រើសជាតិកម្ពុជា នឹងត្រូវប្រកួតមិត្តភាពអន្ដរជាតិ ជាមួយក្រុម ជម្រើសជាតិម៉ុងហ្គោលី នាវេលាម៉ោង ៦៖៣០នាទីល្ងាចនេះ នៅពហុកីឡដ្ឋានជាតិ ហើយលោក Felix G.Dalmas គ្រូបង្វឹកក្រុមគោព្រៃកម្ពុជា បានចាត់ទុកការប្រកួតនេះ គឺជាឱកាសល្អ ដើម្បីពង្រឹងសមត្ថភាព ត្រៀមជួបហុងកុង ក្នុងវគ្គជម្រុះពានរង្វាន់ បាល់ទាត់ពិភពលោក FIFA World Cup Qatar 2022 នាថ្ងៃទី១៩ ខែវិច្ឆិកាខាងមុខ ។

លោក Felix G.Dalmas បានថ្លែងក្នុងសន្និសីទមុនការប្រកួត កាលពីម្សិលមិញថា នេះគឺជាការប្រកួតមួយដ៏សំខាន់ ដើម្បីពង្រឹងសមត្ថភាពកូនក្រុមត្រៀមប្រកួតជើងទី២ ជាមួយហុងកុង នាថ្ងៃទី១៩-វិច្ឆិកា ។ ទោះបីការប្រមូលផ្ដុំលើកនេះ បានបែងចែកជា ២ក្រុម មួយសម្រាប់ត្រៀមប្រកួតជម្រុះ World Cup និងមួយទៀតត្រៀមប្រកួតស៊ីហ្គេម តែលោកបានអះអាងថា កម្ពុជាបានត្រៀមខ្លួនរួចរាល់ ដើម្បីបំពេញបេសកកម្មទាំងពីរ រួមទាំងការប្រកួតល្ងាចនេះ ។

គួរបញ្ជាក់ថា ក្រោយចប់ការប្រកួតមិត្តភាពអន្ដរជាតិល្ងាចនេះ ក្រុមទាំងពីរ នឹង ត្រូវបំពេញបេសកកម្មប្រកួតក្រៅដីរៀងៗខ្លួន ក្នុងវគ្គជម្រុះពានរង្វាន់ បាល់ទាត់ ពិភពលោក ឆ្នាំ២០២២ ដោយកម្ពុជា ត្រូវធ្វើដំណើរទៅតតាំងជាមួយ ក្រុមម្ចាស់ផ្ទះ ហុងកុង បន្ទាប់ពីប្រកួតជើងទី១ ស្មើគ្នា ១-១ ខណៈម៉ុងហ្គោលី ត្រូវជួបម្ចាស់ផ្ទះមីយ៉ាន់ម៉ា បន្ទាប់ពីយកឈ្នះ ១-០ កាលពីជើងទី១ ៕

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top
×