កីឡា

សម្តេចពិជ័យសេនា ទៀ បាញ់ អញ្ជើញចូលរួម ក្នុងសន្និបាត បូកសរុបលទ្ធផលការងារ CAMSOC ឆមាសទី១ ២០២១

ភ្នំពេញ ៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួង ការពារជាតិ និងជាប្រធានគណៈកម្មាធិការជាតិ រៀបចំការប្រកួតកីឡាSEA GAMES ២០២៣ “CAMSOC”អញ្ជើញចូលរួម ក្នុងសន្និបាតបូក សរុបលទ្ធផលការងារ ឆមាសទី១ ឆ្នាំ២០២១ និងលើកទិសដៅបន្ត របស់គណៈកម្មាធិការជាតិ រៀបចំការប្រកួតកីឡាSEA GAMES លើកទី៣២ ឆ្នាំ២០២៣ តាមប្រព័ន្ធវីដេអូ Zoom នៅព្រឹកថ្ងៃទី១៧ ខែសីហា ឆ្នាំ២០២១នេះ ។

ក្នុងសន្និបាតបូក សរុបលទ្ធផលការងារ ឆមាសទី១ ឆ្នាំ២០២១ និងលើកទិសដៅបន្ត របស់គណៈកម្មាធិការជាតិ រៀបចំការ ប្រកួតកីឡា SEA GAMES លើកទី៣២ ឆ្នាំ២០២៣ និងបើកយុទ្ធនាការអប់រំសង្គម ន SEA Games-ASEAN Para Games 2023 ។ លោក គង់ សោភ័ណ្ឌ អភិបាល នៃគណៈអភិបាល ខេត្តកណ្តាល ព្រមទាំងលោកអភិបាលរងខេត្ត មន្ត្រីពាក់ព័ន្ធ និងមន្ទីរអប់រំយុវជន និងកីឡាខេត្តក៏ចូលរួមដែរ ។

យោងតាមរបាយការណ៍ បូកសរុបលទ្ធផលការងារ ឆមាសទី១ ឆ្នាំ២០២១ និងលើកទិសដៅបន្ត របស់គណៈកម្មាធិការជាតិ រៀបចំការ ប្រកួតកីឡា SEA GAMES លើកទី៣២ ឆ្នាំ២០២៣ បានបញ្ជាក់ថា សម្រាប់ការអភិវឌ្ឍសមត្ថភាព កីឡាកតាមរយៈកិច្ចព្រមព្រៀង រវាងរដ្ឋាភិបាលចិន និងរាជរដ្ឋាភិបាលកម្ពុជា យើងបានត្រៀមបញ្ជូនកីឡាករ ជម្រើសជាតិទៅហ្វឹកហាត់ នៅប្រទេសចិន ចំនួន១២ប្រភេទកីឡារួមមាន៖ កីឡាចំបាប់ កាយសម្ព័ន្ធ ហែលទឹក អត្តពលកម្ម វាយកូនលើតុ វាយសី វូស៊ូ បាល់បោះ បាល់ទះ បាញ់កាំភ្លើង បាល់ទាត់នារី និងកីឡាលើកទម្ងន់ ។

ដោយឡែក ចំពោះប្រភេទកីឡាផ្សេងៗទៀត គណៈកម្មាធិការជាតិក៏បាន បញ្ចូនចេញទៅហ្វឹកហាត់ និងត្រៀមចេញទៅហ្វឹកហាត់ នៅក្រៅប្រទេសដូចជា៖ កីឡាការ៉ាតេ ទៅហ្វឹកហាត់នៅអ៊ីរ៉ង់ និងជប៉ុន ។ កីឡាប្រណាំងកង និងកីឡាប្រដាល់សកល ទៅហ្វឹកហាត់នៅបារាំង ។ កីឡាគុនដាវ ត្រៀមទៅរុស្ស៊ី ឬបារាំង ។ កីឡាទ្រីយ៉ាត្លុង និងក្រុមកីឡាបាល់គប់ក្នុងទឹក ទៅហ្វឹកហាត់ នៅសឹង្ហបុរី ។

ចំពោះកីឡាករ កីឡាការិនីកូនខ្មែរនៅក្រៅប្រទេស ក៏បាននឹងកំពុងខិតខំប្រឹងប្រែងហ្វឹកហាត់ និង ចូលរួមប្រកួតនៅក្រៅប្រទេស ដើម្បីបង្កើនគុណផលកីឡាកម្រិត ខ្ពស់រួមមាន ជីជិតស៊ូ ហែលទឹក ប្រណាំងកង់ បាល់បោះ គុនដាវ នៅអាមេរិក, ហុកគឺ នៅឥណ្ឌា, ម៉ូតូទឹក នៅថៃ, ប្រដាល់សកល នៅ វៀតណាម ។

ជាមួយគ្នានេះ ក្រសួងអប់រំ យុវជន និងកីឡា ក៏បានយកចិត្តទុកដាក់ធ្វើកំណែទម្រង់ សំដៅលើកកម្ពស់ការ បណ្តុះបណ្តាលធនធានមនុស្ស ក្រុមជម្រើសជាតិ ដើម្បីបង្កើនគុណផលកីឡាដណ្តើមមេដាយ និងវិនិច្ឆ័យការ ប្រកួតតាមស្មារតី និងខ្លឹមសារកំណត់ក្នុងផែនការមេឆ្ពោះទៅធ្វើជាម្ចាស់ផ្ទះនៃការប្រកួតកីឡា SEA Games លើកទី៣២ ឆ្នាំ២០២៣ ដោយសហការយ៉ាងជិតស្និទ្ធ ជាមួយសហព័ន្ធកីឡាជាតិ គណៈកម្មាធិការជាតិអូឡាំពិក កម្ពុជា និងគណៈកម្មាធិការជាតិប៉ារ៉ា ឡាំពិកកម្ពុជា ប្រកបដោយការទទួលខុសត្រូវខ្ពស់ នៅក្នុងបរិបទការរីករាល វោលជម្ងឺកូវីដ- ១៩។

សូមបញ្ជាក់ដែរថា គណៈកម្មាធិការជាតិប៉ារ៉ាឡាំពិកកម្ពុជា ក៏បានជ្រើសរើសជម្រើសជាតិ ជនពិការចំនួន៧៧នាក់ ដើម្បីធ្វើការហ្វឹកហាត់ លើប្រភេទកីឡាបាញ់ធ្នូ អត្តពលកម្ម ហែលទឹក បាល់បោះជិះរទេះ បាល់បោះ ជនពិការ លើកទម្ងន់ វាយកូនឃ្លីលើតុ បូស្យា និងបានចុះឈ្មោះគ្រូបង្វឹក ជម្រើសជាតិចំនួន០៥នាក់ ទទួលការបណ្តុះបណ្តាលខ្នាត អន្តរជាតិ តាមប្រព័ន្ធអនឡាញ លើប្រភេទកីឡាបាល់បោះជិះរទេះ អត្តពលកម្ម និងបាល់ទះអង្គុយផងដែរ ៕

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top