ភ្នំពេញ ៖ ព្រឹត្តិការណ៍ Cambodia Elephant Trail 2023 បានបញ្ចប់ដោយជោគជ័យ នឹង ទទួលបានការគាំទ្រ យ៉ាងផុសផុល ដោយមានអត្តពលិក ចូលរួមរត់ប្រណាំង ចំនួន៤៣៨នាក់ មកពី២៦ប្រទេសផ្សេងគ្នា លើពិភពលោក នៅឧទ្យានជាតិ ព្រះសុរាម្រិតកុសុមៈគិរីរម្យ ។
ព្រឹត្តិការណ៍ Cambodia Elephant Trail 2023 បានរៀបចំ ឡើងដោយក្លឹបអ្នករត់ KKRC និងទទួលបានការគាំទ្រ ពីរដ្ឋបាលខេត្តកំពង់ស្ពឺ និងសហព័ន្ធ កីឡាឧបសគ្គកម្ពុជា ។ ព្រឹត្តិការណ៍រត់ប្រណាំង Cambodia Elephant Trail ឆ្នាំទី៣ បានរៀបចំឡើង ក្នុងគោលបំណងបំផុស ស្មារតីដល់សាធារណជន ក្នុងការចូលរួមលេងកីឡា និង ចូលរួមផ្សព្វផ្សាយមេត្រីភាពបរិស្ថាន អំពីតំបន់ទេសចរណ៍ ធម្មជាតិ ដោយផ្សារភ្ជាប់ កីឡាជាមួយការ ស្រលាញ់បរិស្ថាន ។
លោកឃី សុភា តំណាងក្រុមការងារ រៀបចំព្រឹត្តការណ៍ បានបញ្ជាក់ថា ព្រឹត្តិការណ៍រត់ប្រណាំងឆ្នាំនេះ ទទួលបានការគាំទ្រ និងមានអ្នកចូលរួម កើនឡើង ទ្វេដង បើធៀបនឹងឆ្នាំមុនៗ ។ លោកបានបន្តថា អ្នកចូលរួម ភាគច្រើនបង្ហាញក្តីសប្បាយ រីករាយ ជាមួយបទពិសោធន៍ថ្មី ក្នុងការរត់ប្រណាំង បែបធម្មជាតិៗ ឡើងភ្នំ ចុះភ្នំ កាត់ឧបសគ្គផ្លូដី គ្រួស ថ្ម រអិល ឆ្លងស្ពាន ឆ្លងអូរ និងព្រៃព្រឹក្សា ខុសពីព្រឹត្តការណ៍ រត់ប្រណាំងបែបម៉ារ៉ាតុង ផ្សេងៗដែល ពួកគាត់លោក ធ្លាប់បានចូលរួមកន្លងមក ។ ចំពោះវិញ្ញាសារត់ប្រណាំងឆ្នាំនេះ មានចំនួន ៥ ផ្សេងៗគ្នា រួមមាន រត់កម្សាន្ត ៣គីឡូម៉ែត្រ, ការរត់ប្រណាំង ១០គីឡូម៉ែត្រ, ការរត់ប្រណាំង ៣២គីឡូម៉ែត្រ, ការរត់ប្រណាំង ៤២គីឡូម៉ែត្រ និងការរត់ប្រណាំង ៧០គីឡូម៉ែត្រ ។
គួរបញ្ជាក់ថា ព្រឹត្តិការណ៍ Cambodia Elephant Trail 2023 រៀបចំឡើងដោយក្លឹបអ្នករត់ KKRC ទទួលបានការគាំទ្រ និងសហការពីរដ្ឋបាល ខេត្តកំពង់ស្ពឺ, សហព័ន្ធកីឡាឧបសគ្គកម្ពុជា និងដៃគូសហការឧបត្ថម្ភ ទឹកពិសា វីតាល់ និងមីជាតិ ក្នុងនោះក៏មានអ្នកឧបត្ថម្ភ និងដៃគូសហការ ជាច្រើនទៀតផងដែរ ៕
