យូអិន៖ អគ្គលេខាធិការអង្គការសហប្រជាជាតិលោក Antonio Guterres បានលើកឡើងថាកិច្ចសហប្រតិបត្តិការរវាងចិន និងសហរដ្ឋអាមេរិកគឺមានសារៈសំខាន់ហើយបានសម្តែងក្តីសង្ឃឹមថាប្រទេសធំៗ នឹងប្តេជ្ញាបញ្ចេញឧស្ម័នផ្ទះកញ្ចក់ក្នុងកម្រិតសូន្យនៅពាក់កណ្តាលសតវត្សរ៍នេះ។
អគ្គលេខាធិការរូបនេះបានឲ្យដឹងនៅក្នុងសន្និសីទកាសែតមួយ ដើម្បីដាក់ចេញនូវរបាយការណ៍ ស្តីពីស្ថានភាពអាកាសធាតុសកលឆ្នាំ២០២០ ថា“កិច្ចសហប្រតិបត្តិការចិន – អាមេរិក មានសារៈសំខាន់ណាស់ វាមានសារៈសំខាន់ សម្រាប់កិច្ចព្រមព្រៀងទីក្រុងប៉ារីស។ វានៅតែមានសារៈសំខាន់នៅថ្ងៃនេះ រួមជាមួយដៃគូសំខាន់ៗដទៃទៀត” ។
ឆ្លើយតបទៅនឹងសំនួរទាក់ទងនឹងសេចក្តីថ្លែងការណ៍រួមដែលចេញកាលពីថ្ងៃអាទិត្យ ដោយប្រទេសចិន និងសហរដ្ឋអាមេរិក ស្តីពីការទប់ទល់នឹងការប្រែប្រួលអាកាសធាតុ បន្ទាប់ពីកិច្ចពិភាក្សានៅទីក្រុងសៀងហៃ។
សេចក្តីថ្លែងការណ៍នេះត្រូវបានធ្វើឡើងបន្ទាប់ពីកិច្ចពិភាក្សារវាងលោក Xie Zhenhua ប្រេសិតពិសេសរបស់ចិន ទទួលបន្ទុកកិច្ចការប្រែប្រួលអាកាសធាតុនិងប្រេសិតពិសេសប្រធានាធិបតីទទួលបន្ទុកអាកាសធាតុលោក John Kerry ចាប់ពីថ្ងៃព្រហស្បតិ៍ ដល់ថ្ងៃសុក្រ នៅទីក្រុងសៀងហៃ ប្រទេសចិន។
ឆ្លើយតបទៅនឹងសំណួរអំពីការរំពឹងទុករបស់លោក សម្រាប់កិច្ចប្រជុំកំពូលអាកាសធាតុជាក់ស្តែងនាសប្តាហ៍នេះ មន្ត្រីជាន់ខ្ពស់អង្គការសហប្រជាជាតិបានលើកឡើងថា“ក្តីសង្ឃឹមរបស់ខ្ញុំ គឺថានៅក្នុងកិច្ចប្រជុំកំពូលនៅសប្តាហ៍នេះ ប្រទេសមួយចំនួន ដែលជាប្រទេសសំខាន់បំផុតទាក់ទងនឹងការប្រែប្រួលអាកាសធាតុនឹងអាចប្តេជ្ញាថានឹងបំភាយឧស្ម័នផ្ទះកញ្ចក់ក្នុងកម្រិតសូន្យនៅពាក់កណ្តាលសតវត្សរ៍ ហើយប្តេជ្ញាកាត់បន្ថយការបំភាយយ៉ាងខ្លាំង សម្រាប់ទសវត្ស បន្ទាប់ក្នុងបរិបទនៃការពិនិត្យឡើងវិញនៃវិភាគទាន ដែលបានកំណត់ថ្នាក់ជាតិ ហើយនេះពិតជាសំខាន់ណាស់នៅក្នុងកិច្ចប្រជុំកំពូលនេះ៕
ដោយ ឈូក បូរ៉ា
