ភ្នំពេញ៖ លោក សយ សុភាព អ្នកកាសែតជើងចាស់ បានលើកឡើងថា ជីវិតនយោបាយ លោក សម រង្ស៊ី ដល់ទីបញ្ចប់ រីឯជីវភាពសេដ្ឋកិច្ចគ្រួសារ សល់៥$។ ការលើកឡើងបែបនេះបន្ទាប់ពីលោក សម រង្ស៊ី អតីតមេបក្សប្រឆាំង បានប្រកាសបើកលក់ ប័ណ្ណនាឡិកាក្នុងតម្លៃ ៥ ដុល្លារ១សន្លឹក ដើម្បីរួមចំណែកប្រមូលថវិកា ពីការលក់ប័ណ្ណនេះជួយដល់ប្រជាពលរដ្ឋកម្ពុជា ជួបការលំបាកក្នុងអំឡុងពេលវិបត្តិជំងឺកូវីដ១៩។
តាមរយៈបណ្ដាញទំនាក់ទំនង សង្គមហ្វេសប៊ុក នៅយប់ថ្ងៃទី១៩ ខែឧសភា ឆ្នាំ២០២១នេះ លោក សយ សុភាព អគ្គនាយកមជ្ឈមណ្ឌលសារព័ត៌មានដើមអម្ពិល បានលើកឡើងថា «ជាម៉ាក្រូនយោបាយ លោក សមរង្ស៊ី បានចប់តាំងពីមុនគណបក្សសង្រ្គោះជាតិរំលាយម្ល៉េះ គឺ លោកបានលាលែង ដោយប្រគល់ឱ្យលោក កឹម សុខា ជាប្រធានគណបក្ស»។
លោក សយ សុភាព សង្កត់ធ្ងន់ថា «សម្រាប់ពេលនេះដល់រឿងជីវភាព គ្រួសារវិញម្តង គឺលោកសមរង្ស៊ី ពពាយនាយ លក់នាឡិកាដៃ របស់គាត់កំពុងពាក់រាល់ថ្ងៃ ត្រឹមតំលៃតែ៥ដុល្លារ។ មានន័យថាលោកបោសក្តិតខោហើយ។ ដូច្នេះអ្នកនៅសល់កេរ្ត៍ អាចបន្តអាជីពបានខ្លះ ក្នុងជីវភាពនយោបាយ តែហ៊ានរបូត មាត់ អួតលិចអួតកើត អាចដូច លោកសម រង្ស៊ីដែរ កុំឱ្យភ្លាត់ឱ្យសោះ»។
លោកបញ្ជាក់ថា នេះហើយអាមេរិកនិយម លោកខាងលិចនិយម ដល់ពេលគេធិបសន្លឹកនយោបាយហើយដូរតួសម្តែង បើមិនដូច្នេះពួកគេមិនដល់គោលដៅដែលចង់បាន៕
