ភ្នំពេញ៖ អ្នកនាំពាក្យក្រសួងមហាផ្ទៃ បានឆ្លើយតបទៅនឹង អង្គការសង្គមស៊ីវិល និងប្រជាពលរដ្ឋមួយចំនួនតូចថា ក្រសួងតែងយកចិត្តទុកដាក់ អនុវត្តជាប្រចាំនូវតួនាទី ភារកិច្ចរបស់ខ្លួន ដោយគ្មានការរើសអើង ចំពោះឋានៈបុគ្គល នៅក្នុងសង្គម ឬប្រភេទបទល្មើសណាមួយឡើយ ក្នុងគោលដៅធ្វើយ៉ាងណា រក្សាសន្តិសុខ និងសណ្តាប់ធ្នាប់សាធារណៈ។
កាលពីពេលថ្មីៗនេះ អង្គការសង្គមស៊ីវិល និងប្រជាពលរដ្ឋមួយចំនួនតូច បានស្នើក្រសួងមហាផ្ទៃ ឲ្យមានចំណាត់ការផ្លូវ ច្បាប់ លើបទល្មើស និងអំពើមិនគប្បីនានា ដែលប្រព្រឹត្តដោយបុគ្គលមានធនធាន និងមន្ដ្រីរាជការសាធារណៈ មួយចំនួន ក្នុងរយៈពេលកន្លងមក ព្រមទាំង ស្នើឲ្យមានអន្ដរាគមន៍ សំដៅលុបបំបាត់វប្បធម៌ និទណ្ឌភាព និងវប្បធម៌បន្ទោសជនរងគ្រោះ ដើម្បីគាំពារដល់ស្ដ្រីនិងយុត្តិធម៌សង្គម។
ក្នុងសេចក្ដីប្រកាសព័ត៌មាន នាថ្ងៃទី២៤ ខែឧសភា ឆ្នាំ២០២១ អ្នកនាំពាក្យក្រសួងមហាផ្ទៃ បានបញ្ជាក់ថា « ក្នុងនាមជាស្ថាប័នអនុវត្តច្បាប់ ក្រសួងមហាផ្ទៃ តែងយកចិត្តទុកដាក់ អនុវត្តជាប្រចាំនូវតួនាទីភារកិច្ច និងការទទួលខុសត្រូវ នៅក្នុងដែន សមត្ថកិច្ចដែលកំណត់ដោយច្បាប់ និងលិខិតបទដ្ឋានគតិយុត្ត ជាធរមាន ដោយគ្មានការរើសអើងចំពោះ ឋានៈបុគ្គលនៅក្នុងសង្គម ឬប្រភេទបទល្មើស ណាមួយនោះឡើយ ក្នុងគោលដៅធ្វើយ៉ាងណា ខិតខំថែរក្សា សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គមជូនជាតិ និងប្រជាជនបានល្អប្រសើរ ក្នុងន័យ រួមចំណែកជំរុញ ដល់ការអភិវឌ្ឍសេដ្ឋកិច្ចសង្គម ប្រកបដោយនិរន្តរភាព» ។
អ្នកនាំពាក្យ បន្ដថា រាល់ករណីបទល្មើស ដែលកើតមានកន្លងមក ទោះពាក់ព័ន្ធនឹងពលរដ្ឋទូទៅក្តី ឬកងកម្លាំងអនុវត្ត ច្បាប់ក្តី ក្រសួងមហាផ្ទៃ តែងចាត់វិធានការយ៉ាងម៉ឺងម៉ាត់ ដោយគ្មានការលើកលែង ឬយោគយល់នោះឡើយ ជាក់ស្ដែង ក្នុងចំណោមទណ្ឌិត និងពិរុទ្ធជន ដែលត្រូវបានផ្តន្ទាទោស ក៏មានអតីតមន្ត្រីជាន់ខ្ពស់ ជាច្រើនផងដែរ ។
ជាងនេះទៅទៀត អ្នកនាំពាក្យ ក្រសួងមហាផ្ទៃ ក៏បានបញ្ជាក់ថា តាមរយៈការអនុវត្តតួនាទីភារកិច្ចរបស់ខ្លួន នៅក្នុងឆ្នាំ២០២០កន្លងទៅនេះ ទោះបីជាប្រឈមមុខ នឹងស្ថានភាពនៃជំងឺកូវីដ-១៩ អាជ្ញាធរមានសមត្ថកិច្ច និងកងកម្លាំងអនុវត្តច្បាប់ នៅតែបន្តខិតខំ និងមាន ការប្តេជ្ញាចិត្តយ៉ាងមោះមុត បំពេញបេសកកម្មតស៊ូបង្ក្រាបបទល្មើសព្រហ្មទណ្ឌគ្រប់ប្រភេទបានស្មើនឹង ៩០% នៃចំនួនបទល្មើសដែលកើតឡើង ព្រមទាំងបានម្ចាស់ការ និងសហការបញ្ជូនករណី បទល្មើសទៅតុលាការ ចំនួន២,៩៤០ករណី មនុស្ស៤,២២៧នាក់ ក្នុងនោះ ពាក់ព័ន្ធនឹងបទល្មើសរំលោភសេពសន្ថវៈ ២៨០ករណី មនុស្ស ២៩០នាក់។
ទន្ទឹមនឹងការខិតខំបំពេញ ភារកិច្ចរបស់ខ្លួន ក្រសួងមហាផ្ទៃ ក៏បានបន្តយកចិត្តទុកដាក់ និងអនុវត្ត យ៉ាងម៉ឺងម៉ាត់ចំពោះរាល់ករណី ដែលពាក់ព័ន្ធនឹងអំពើល្មើស ការប្រើប្រាស់តួនាទី បំពានសិទ្ធិអំណាច និង ការប្រព្រឹត្តមិនគប្បី របស់មន្ត្រីរាជការ ឬកងកម្លាំងអនុវត្តច្បាប់ ដោយអនុវត្តយ៉ាងខ្ជាប់ខ្ជួនស្របតាមច្បាប់ បទបញ្ញត្តិ និងលក្ខន្តិកៈនានាជាធរមាន តាមរូបភាពជាព្រមាន ការដាក់ពិន័យ ការបន្ថយឋានន្តរស័ក្តិ ការដកហូតមុខតំណែង និងការផ្តន្ទាទោស ដោយស្ថាប័នតុលាការជាដើម៕
