តួកគី ឃុំខ្លួនមនុស្ស ៣០នាក់បន្ថែមទៀត សង្ស័យពាក់ព័ន្ធនឹងរដ្ឋប្រហារឆ្នាំ២០១៦

អង់ការ៉ា ៖ ប៉ូលីសតួកគីបានឃុំខ្លួន ជនសង្ស័យយ៉ាងហោចណាស់ ៣០ នាក់ កាលពីថ្ងៃសុក្រជុំវិញការចោទប្រកាន់ របស់ពួកគេ ចំពោះបណ្តាញ ដែលត្រូវបានចោទប្រកាន់ថា បានរៀបចំការប៉ុនប៉ងធ្វើរដ្ឋប្រហារ ក្នុងឆ្នាំ២០១៦ នេះបើយោងតាមការចុះផ្សាយ របស់ទីភ្នាក់ងារ សារព័ត៌មានចិនស៊ិនហួ។

ដីកាឃុំខ្លួនត្រូវបានចេញ សម្រាប់អតីតនិស្សិតបណ្ឌិតសភា ប៉ូលីសចំនួន ៤៦ នាក់នៅទូទាំងទីក្រុងចំនួន ៦ ហើយទាហាន ដែលកំពុងបំពេញ កាតព្វកិច្ចក៏ស្ថិតក្នុងចំណោមអ្នក ដែលត្រូវបានឃាត់ខ្លួនផងដែរ ។ គួរបញ្ជាក់ថា សារព័ត៌មានរដ្ឋ TRT បានរាយការណ៍ថា ៩នាក់នៃជនសង្ស័យ ស្ថិតនៅក្រៅប្រទេស។

ជនសង្ស័យត្រូវបានគេចោទ ប្រកាន់ថា ជាសមាជិកនៃចលនាហ្គូឡែន ដែលរដ្ឋាភិបាលតួកគីចោទប្រកាន់ថា បានជ្រៀតចូលក្នុងការិយាធិបតេយ្យរបស់រដ្ឋ ហើយបន្ទាប់មកបានប៉ុនប៉ង ធ្វើរដ្ឋប្រហារនៅថ្ងៃទី១៥ ខែកក្កដា ឆ្នាំ ២០១៦ ។

ទីក្រុងអង់ការ៉ា បានឲ្យដឹងថា អ្នកកាន់សាសនាអ៊ីស្លាម ដែលមានមូលដ្ឋាន នៅសហរដ្ឋអាមេរិក គឺលោក Fethullah Gulen នៅពីក្រោយការប៉ុនប៉ង ធ្វើរដ្ឋប្រហារ ដែលក្នុងនោះមនុស្ស ២៥០ នាក់ត្រូវបានសម្លាប់ ។

គួរបញ្ជាក់ថា រដ្ឋាភិបាលតួកគី បានធ្វើការបង្រ្កាបយ៉ាងខ្លាំង ទៅលើជនសង្ស័យ ដែលមានទំនាក់ទំនងជាមួយបណ្តាញខាងលើនេះ បន្ទាប់ពីការធ្វើរដ្ឋប្រហារត្រូវបរាជ័យ ៕
ដោយ ឈូក បូរ៉ា