ភ្នំពេញ ៖ លោក ថោង ខុន រដ្ឋមន្ដ្រីក្រសួងទេសចរណ៍ បានបន្ដណែនាំមន្ទីរ ទេសចរណ៍រាជធានី-ខេត្ត ត្រូវពង្រឹងការអនុវត្ត វិធានការនានារបស់ រាជរដ្ឋាភិបាល ក្រសួងសុខាភិបាល និងវិធានសុវត្ថិភាព ទេសចរណ៍ សម្រាប់អាជីវកម្មសេវាកម្មភោជនី យដ្ឋាន និងអាហារដ្ឋានទេសចរណ៍។
តាមសារាចរណែនាំរបស់ ក្រសួងទេសចរណ៍ កាលពីថ្ងៃទី៣១ ខែឧសភា ឆ្នាំ២០២១ លោក ថោង ខុន បានថ្លែងថា មន្ទីរ ទេសចរណ៍រាជធានីភ្នំពេញ ត្រូវសហការជាមួយរដ្ឋបាលរាជធានីភ្នំពេញ និងរដ្ឋបាលខេត្តកណ្តាល និង អាជ្ញាធរមូលដ្ឋាន ត្រូវជូនដំណឹង អំពីគោលការណ៍អនុញ្ញាត ឱ្យបើកដំណើរការប្រតិបត្តិការ អាជីវកម្មភោជនីយដ្ឋានជាធម្មតាឡើងវិញនេះ ឱ្យដល់គ្រប់មូលដ្ឋាន អាជីវកម្មទាំងអស់។
លោក បញ្ជាក់ថា «មន្ទីរទេសចរណ៍រាជធានី-ខេត្ត ត្រូវបន្តសហការជាមួយរដ្ឋបាលខេត្ត និង អាជ្ញាធរមូលដ្ឋាន ពិនិត្យ និងពង្រឹងបន្ថែមទៀត នូវការអនុវត្តវិធាន សុវត្ថិភាពទេសចរណ៍ ចំពោះគ្រប់អាជីវកម្មសេវាកម្មស្នាក់នៅទេសចរណ៍ ភោជនីយដ្ឋាននិងអាហារដ្ឋាន ទេសចរណ៍។ ដោយឡែក ចំពោះមូលដ្ឋានអាជីវកម្មខាងលើ ដែលស្ថិតនៅក្នុង តំបន់ដែល បានដាក់ចេញវិធានការបិទខ្ទប់ មន្ទីរទេសចរណ៍រាជធានី-ខេត្ត ត្រូវបន្តសហការជាមួយរដ្ឋបាលខេត្ត និងអាជ្ញាធរមូលដ្ឋាន បន្តពង្រឹងនូវរាល់វិធានការជាធរមាន»។
លោករដ្ឋមន្ដ្រី បន្ដថា ត្រូវបន្តពង្រឹងការអនុវត្តឱ្យបានយ៉ាងខ្ជាប់ខ្ជួន និងម៉ឺងម៉ាត់នូវវិធានការទាំងឡាយ ដែលបានដាក់ ចេញដោយក្រសួងសុខាភិបាល និងវិធានសុវត្ថិភាពទេសចរណ៍ របស់ក្រសួងទេសចរណ៍ ទប់ស្កាត់ការឆ្លងរាលដាល នៃជំងឺកូវីដ-១៩ ពិសេសវិធានការ «៣ការពារ និង ៣កុំ»៕
