វ៉ាស៊ីនតោន៖ ក្រុមហ៊ុនផលិតវ៉ាក់សាំងការពារជំងឺកូវីដ-១៩ Moderna បានស្នើសុំឱ្យរដ្ឋបាលចំណីអាហារ និងឱសថអាមេរិក (FDA) អនុញ្ញាតឱ្យប្រើវ៉ាក់សាំងការពារជំងឺកូវីដ១៩ ដូសជំរុញ ឬដូសទី ៣ របស់ខ្លួន នេះបើយោងតាមការចុះផ្សាយរបស់ទីភ្នាក់ងារសារព័ត៌មានសិង្ហបុរី។
រដ្ឋបាលចំណីអាហារ និងឱសថអាមេរិក FDA កំពុងពិចារណាលើការចាក់វ៉ាក់សាំង Pfizer-BioNTech ប៉ុន្តែរហូតមកដល់ពេលនេះអនុញ្ញាតឱ្យតែមនុស្ស ដែលមានប្រព័ន្ធការពារខ្សោយ ចុះខ្សោយ ដើម្បីទទួលបានថ្នាំវ៉ាក់សាំង Moderna ឬ Pfizer ក្នុងកម្រិតដូសទី៣។
ទីភ្នាក់ងារនេះបានឲ្យដឹងនៅថ្ងៃពុធនេះថា ក្រុមទីប្រឹក្សារបស់ខ្លួននឹងជួបប្រជុំ ដើម្បីពិភាក្សាអំពីការដាក់ពាក្យសុំចាក់វ៉ាក់សាំងដូសជំរុញ Pfizer នៅថ្ងៃទី១៧ ខែកញ្ញា ប៉ុន្តែវាមិនច្បាស់នោះទេថាតើពួកគេនឹងពិភាក្សាអំពី Moderna ដែរ ឬទេ។
Moderna បានឲ្យដឹងថា ខ្លួនបានបញ្ជូនទិន្នន័យដំបូង សម្រាប់ការប្រើប្រាស់វ៉ាក់សាំងពីរដូសរបស់ខ្លួន។ វ៉ាក់សាំង Moderna ដើមមាន mRNA ១០០ មីក្រូក្រាម ក្នុងមួយដូស។ លោក Stéphane Bancel នាយកប្រតិបត្តិក្រុមហ៊ុន Moderna បានឲ្យដឹងនៅក្នុងសេចក្តីថ្លែងការណ៍មួយថា អ្នកទទួលកម្រិតដូស ៥០ មីក្រូក្រាម មានការឆ្លើយតបអង្គបដិប្រាណដ៏រឹងមាំ ប្រឆាំងនឹងទម្រង់ឆ្លងថ្មី។
ថ្វីបើ Moderna បានឲ្យដឹងថា វ៉ាក់សាំងកូវីដ -១៩ របស់ខ្លួន នៅតែមានប្រសិទ្ធភាពប្រហែល ៩៣ ភាគរយក្នុងរយៈពេល ៦ ខែបន្ទាប់ពីការចាក់វ៉ាក់សាំងលើកទី២ ក៏ដោយ ក៏វាបានសង្កេតឃើញថា កម្រិតអង្គបដិប្រាណបានថយចុះគួរឱ្យកត់សម្គាល់នៅចំណុចនោះ។
ក្រុមហ៊ុនបានឲ្យដឹងថា អ្នកចូលរួមជិត ៣៥០ នាក់នៃការសាកល្បងដំណាក់កាលទី ២ ដើមរបស់ខ្លួន ត្រូវបានផ្តល់វ៉ាក់សាំងដូសទី៣ ដែលបង្កើតការឆ្លើយតបនៃប្រព័ន្ធភាពស៊ាំល្អជាង អ្វីដែលបានឃើញបន្ទាប់ពីការចាក់ដូសទី២ នៅក្នុងការសាកល្បងព្យាបាលដំណាក់កាលទី៣ ដ៏ធំរបស់ខ្លួន៕
ដោយ ឈូក បូរ៉ា
