តេអេរ៉ង់៖ ទីភ្នាក់ងារសារព័ត៌មាន ផ្លូវការ IRNA បានរាយការណ៍ថា រដ្ឋមន្ត្រីការបរទេសអ៊ីរ៉ង់ លោក Hossein Amir Abdollahian បានលើកឡើងថា សកម្មភាពរបស់សហរដ្ឋអាមេរិក នឹងក្លាយជាលក្ខណៈវិនិច្ឆ័យ សម្រាប់អ៊ីរ៉ង់ ក្នុងការសម្រេចចិត្ត លើការចរចានុយក្លេអ៊ែរ។
លោក Amir Abdollahian ត្រូវបានដកស្រង់សម្តីដោយលើកឡើងថា“ យើងបាននិយាយយ៉ាងច្បាស់ថា យើងនឹងប្រើអាកប្បកិរិយាជាក់ស្តែងរបស់ជនជាតិអាមេរិក ជាមូលដ្ឋាននៃការវិនិច្ឆ័យរបស់យើង” ។
លោកបានប្រាប់ទូរទស្សន៍រដ្ឋអ៊ីរ៉ង់ថា“ សញ្ញាផ្ទុយ” ដែលជនជាតិអាមេរិក បញ្ជូនតាមរយៈប្រព័ន្ធផ្សព្វផ្សាយ ឬបណ្តាញការទូត មិនធ្វើជាមូលដ្ឋានសម្រាប់ការសម្រេចចិត្តចុងក្រោយរបស់អ៊ីរ៉ង់នោះទេ។
រដ្ឋមន្ត្រីការបរទេសអ៊ីរ៉ង់ បានធ្វើការកត់សម្គាល់នេះ មុនពេលចាកចេញពីទីក្រុងញូវយ៉ក ជាកន្លែងដែលលោកបានចូលរួមកិច្ចប្រជុំ មហាសន្និបាតអង្គការសហប្រជាជាតិ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
គួរបញ្ជាក់ថា សម្រាប់ការរស់ឡើងវិញ នៃកិច្ចព្រមព្រៀង នុយក្លេអ៊ែរ ឆ្នាំ២០១៥ អ៊ីរ៉ង់ បានជំរុញឱ្យសហរដ្ឋអាមេរិក ដកទណ្ឌកម្ម ដែលដាក់ដោយអតីតរដ្ឋបាលអាមេរិក និងអនុវត្តរាល់ការប្តេជ្ញាចិត្តរបស់ខ្លួនក្រោមកិច្ចព្រមព្រៀងនេះ៕
ដោយ ឈូក បូរ៉ា
