ភ្នំពេញ៖ សមត្ថកិច្ចនគរបាលក្រុងប៉ោយប៉ែត កាលពីថ្ងៃទី៦ ខែធ្នូ ឆ្នាំ២០២១ បានឃាត់ខ្លួនជនសង្ស័យចំនួន ៦នាក់ ដែលជាមុខសញ្ញាចោរប្លន់យ៉ាងសកម្ម នៅក្នុងទីក្រុងប៉ោយប៉ែត ជាប់ពាក់ព័ន្ធនឹង ការគាស់ឃ្លាំងម៉ូតូ និងលួចម៉ូតូចំនួន ៥គ្រឿង ប្រព្រឹត្តចំណុចភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត។
សមត្ថកិច្ចក្រុង ប៉ោយប៉ែត បានឲ្យដឹងថាជនសង្ស័យ ទាំង៦នាក់នេះ មានឈ្មោះ៖ ទី១-ឈ្មោះ ហេង ចាន់ថា ភេទប្រុស អាយុ ២៨ឆ្នាំមានទីលំនៅភូមិប៉ោយតាសេក ឃុំបឹងព្រីង ស្រុកថ្មគោល ខេត្តបាត់ដំបង ។ ទី២-ឈ្មោះ វឿ សូវៀត ភេទប្រុស អាយុ ២៦ឆ្នាំ មានទីនៅភូមិបឹងព្រីង ឃុំបឹងព្រីង ស្រុកថ្មគោល ខេត្តបាត់ដំបង ។ ទី៣-ឈ្មោះ រឿន ពិសិទ្ធ ភេទប្រុស អាយុ ២៥ឆ្នាំ មានទីលំនៅភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ។ ទី៤-ឈ្មោះ ម៉ៅ មករា ហៅអារាមីន ភេទប្រុស អាយុ ១៦ឆ្នាំ មានទីលំនៅភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ។ ទី៥-ឈ្មោះ តឿន ពាង ភេទប្រុស អាយុ ១៦ឆ្នាំ មានទីលំនៅភូមិចាន់គីរី សង្កាត់ប៉ោយប៉ែត ក្រុងប៉ោយប៉ែត។ និងទី៦- ឈ្មោះ កាន រ៉ង ភេទប្រុស អាយុ ១៦ឆ្នាំ មានទីលំនៅភូមិបាលិលេយ្យ១ សង្កាត់ប៉ោយប៉ែត ។
ពួកគេត្រូវបានជាប់ចោទពីបទ: លួចមានស្ថានទម្ងន់ទោស និងត្រូវបានចាប់ឃាត់ខ្លួន កាលពីថ្ងៃទី៦ ខែធ្នូ នៅចំណុចកើតហេតុខាងលើ។
ក្រោយឃាត់ខ្លួន, សមត្ថកិច្ចនគរបាល ដកហូតបាន ម៉ូតូចំនួនចំនួន ៥គ្រឿង និងសម្ភារៈពាក់ព័ន្ធមួយចំនួនទៀត ពីពួកគេ។
សមត្ថកិច្ចនគរបាល បានបញ្ជាក់ថា បច្ចុប្បន្ននេះ, ជនសង្ស័យទាំង ៦នាក់ខាងលើ ត្រូវបានសមត្ថកិច្ចនគរបាលជំនាញ កសាងសំណុំរឿង និងបញ្ជូនខ្លួនទៅកាន់ សាលាដំបូងខេត្ត បន្ទាយមានជ័យ ដើម្បី ចាត់ការតាមនីតិ វិធីច្បាប់៕
ដោយ រស្មី អាកាស
