វ៉ាស៊ីនតោន៖ យោងតាមទិន្នន័យពីសាកលវិទ្យាល័យ Johns Hopkins បានឱ្យដឹងថា សហរដ្ឋអាមេរិក បានបំបែកកំណត់ត្រាមួយថ្ងៃជាមួយនឹងករណីឆ្លងកូវីដ-១៩ ជាង ១លានករណីកាលពីថ្ងៃចន្ទ ចំពេលមានការរីករាលដាលយ៉ាងឆាប់រហ័សនៃទម្រង់ឆ្លងអូមីក្រុង។
គិតត្រឹមម៉ោង ៥ល្ងាចថ្ងៃអង្គារនេះ ប្រទេសនេះបានចុះបញ្ជីករណីដែលបានបញ្ជាក់ប្រហែល ១,០៧លានករណីក្នុងរយៈពេល ២៤ម៉ោងចុងក្រោយនេះ ដែលជាប្រទេសដែលរងគ្រោះខ្លាំងបំផុតដោយជំងឺរាតត្បាត។
ប្រព័ន្ធផ្សព្វផ្សាយក្នុងស្រុកបានរាយការណ៍ថាចំនួនករណីថ្មីនៃជំងឺកូវីដ-១៩ បានកើនឡើងទ្វេដងក្នុងរយៈពេល ៧ថ្ងៃចុងក្រោយនេះដល់ជាមធ្យមជាង ៤១ម៉ឺនករណីក្នុងមួយថ្ងៃ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
ការកើនឡើងនេះកើតឡើងនៅពេលដែលមជ្ឈមណ្ឌលគ្រប់គ្រង និងការពារជំងឺរបស់សហរដ្ឋអាមេរិក បានសម្រេចចិត្តកាត់បន្ថយពេលវេលាដែលបានណែនាំ ដែលមនុស្សគួរតែនៅដាច់ដោយឡែកបន្ទាប់ពីលទ្ធផលតេស្តវិជ្ជមានពី ១០ថ្ងៃមកត្រឹម ៥ថ្ងៃ ប្រសិនបើពួកគេមិនបង្ហាញរោគសញ្ញា។
ទោះជាយ៉ាងណាក៏ដោយ ការរីករាលដាលយ៉ាងឆាប់រហ័សនៃមេរោគមិនត្រឹមតែដាក់សម្ពាធកាន់តែខ្លាំងលើប្រព័ន្ធថែទាំសុខភាពរបស់ប្រទេសនេះប៉ុណ្ណោះទេ ប៉ុន្តែថែមទាំងប៉ះពាល់ដល់សេដ្ឋកិច្ចម្តងទៀត ដែលបណ្តាលឱ្យមានការខ្វះខាតកម្លាំងពលកម្ម ការលុបចោលជើងហោះហើររាប់ពាន់ និងអាជីវកម្មមួយចំនួនត្រូវបិទទ្វារម្តងទៀត៕ដោយ ឈូក បូរ៉ា
