ភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានអំពាវនាវដល់ប្រជាពលរដ្ឋ ឲ្យចូលរួមសហការជាមួយអាជ្ញាធរ ដើម្បីប្រយុទ្ធប្រឆាំងគ្រឿងញៀន ជាពិសេស បង្ការកុំឲ្យសមាជិកគ្រួសារពាក់ព័ន្ធគ្រឿងញៀន។
ក្នុងពិធីសម្ពោធដាក់ឲ្យប្រើប្រាស់ជាផ្លូវការ អគារសិក្សា ចំនួន២ខ្នង មាន១១បន្ទប់ នៅសាលាបឋមសិក្សា ពងពស់ និងសាលាបឋមសិក្សា នាគរង្សី ស្ថិតនៅឃុំរោងដំរី ស្រុកបាភ្នំ ខេត្តព្រៃវែង នាថ្ងៃទី១៥ ខែកុម្ភៈ ឆ្នាំ២០២២នេះ សម្ដេច ស ខេង បានទាញចំណាប់អារម្មណ៍អង្គពិធី អំពីការចរាចរណ៍គ្រឿងញៀន និងការផលិតគ្រឿងញៀនសំយោគ។
សម្ដេច មានប្រសាសន៍ថា «សូមអំពាវនាវប្រជាពលរដ្ឋ ចូលរួមសហការជាមួយអាជ្ញាធរ ដើម្បីប្រយុទ្ធនឹងគ្រឿងញៀន និងត្រូវបង្ការកុំឲ្យសមាជិក ក្រុមគ្រួសារពាក់ព័ន្ធគ្រឿងញៀន»។
នាឱកាសនោះ សម្ដេច ស ខេង ក៏បានលើកឡើងពីដំណើរការបោះឆ្នោត ជ្រើសរើសក្រុមប្រឹក្សាឃុំ-សង្កាត់ នៅពាក់កណ្ដាល ឆ្នាំ២០២២នេះ ខណៈសម្ដេចថា ការបោះឆ្នោតនេះ កម្ពុជាបានឆ្លងកាត់ រយៈពេល២០ឆ្នាំមកហើយ ហើយពីមួយអាណត្តិ ទៅមួយអាណត្តិ ការបោះឆ្នោតនេះ កាន់តែមានភាពល្អប្រសើរ មានន័យថា ប្រជាពលរដ្ឋមានការឲ្យតម្លៃ និងយល់ដឹងចំពោះសេចក្ដីត្រូវការចាំបាច់ នៃការបោះឆ្នោត ដើម្បីធ្វើឲ្យមូលដ្ឋានមានស្ថិរភាព។
យោងតាមរបាយការណ៍ របស់គណៈកម្មការប្រឆាំងគ្រឿងញៀន បានឲ្យដឹងថា ឆ្នាំ២០២១ កម្លាំងសមត្ថកិច្ចបង្ក្រាប បានបទល្មើសគ្រឿងញៀនទូទាំងប្រទេស ចំនួន ៦ ២៤២ករណី ឃាត់មនុស្សចំនួន ១៣ ៧៦៥នាក់ (ស្រី៨០២នាក់) ក្នុងនោះជនបរទេស ៣៦២នាក់ (ស្រី៤៥នាក់ មាន១៣សញ្ជាតិ) ៕
