ភ្នំពេញ៖ សមរភូមិសង្គ្រាម រវាងរុស្ស៊ីនិងអ៊ុយក្រែន បានធ្វើឱ្យប្រទេសដែលធ្លាប់ឆ្លងកាត់ នូវភ្នក់ភ្លើងសង្គ្រាម វិនាសកម្ម បាននឹកឃើញនូវពាក្យបណ្ដាំចុងក្រោយនៃមេដឹកនាំ ដែលជឿលង់ ទៅនឹងប្រទេសមហាអំណាច លោកខាងលិច ជាក់ស្ដែងនៅប្រទេសកម្ពុជា វៀតណាម និងថ្មីៗនេះគឺនៅអាហ្វហ្គានីស្ថាន។
ក្នុងនាម ជាតាមដានព្រឹត្តិការណ៍ទាំងអស់នេះ លោក សយ សុភាព អគ្គនាយកសារព័ត៌មាន ដើមអម្ពិល និងជាប្រធានសមគមអ្នកសារព័ត៌មាន កម្ពុជា-ចិន បានរំលឹកនូវព្រះរាជបន្ទូល របស់អ្នកអង្គម្ចាស់ ស៊ី សុវត្ថិ សិរីមតៈ ដែលជាអ្នកដឹកនាំម្នាក់ ជឿលង់ទៅនឹងមនោគមវិជ្ជា របស់សហរដ្ឋអាមេរិក ក្នុងស.វទី៧០ ដោយបានបោះបង់កម្ពុជាចោល ក្រោយក្រុមខ្មែរក្រហម វាយចូលដល់ទីក្រុងភ្នំពេញ ក្នុងឆ្នាំ១៩៧៥ ។
តាមរយៈគេហទំព័រហ្វេសប៊ុក នៅថ្ងៃទី២៥ ខែកុម្ភៈ ឆ្នាំ២០២២នេះ លោក សយ សុភាព បានសរសេររៀបរាប់យ៉ាងដូច្នេះថា “អ្នកអង្គម្ចាស់ ស៊ី សុវត្ថិសិរីមតៈ « កំហុសខ្ញុំតែមួយគត់ គឺ ជឿលើអាមេរិកកាំង ខ្ញុំសុខចិត្តស្លាប់នៅទីនេះ…»”។
លោកថា “ឥឡូវមកដល់វេនប្រធានាធិបតី អ៊ុយក្រែនម្តង តើលោកសុខចិត្តស្លាប់ ឬ រត់តាមអាមេរិក”។
លោក សយ សុភាព បន្ថែមថា ខ្មែរបានជួបហើយ មហាសែនឈឺចុកចាប់ ដោយសារអាមេរិក។ យួនខាងត្បូងក៏ដូចគ្នាដែរតែ ប្រធានាធិបតី ធីវ ឡើងយន្តហោះC135 រត់ទៅជ្រកកោននៅកោះតែវ៉ាន់។
សូមបញ្ជាក់ថា ពិភពលោក បាននឹងកំពុងតាមដាន យ៉ាងយកចិត្តទុកដាក់ ចំពោះភាពតានតឹងរវាង រុស្ស៊ីនិងអ៊ុយក្រែន បន្ទាប់ពីកងកម្លាំងយោធារុស្សី បានបើកការវាយប្រហារទ្រង់ទ្រាយធំ និងឈានដល់ការកាន់កាប់ទីក្រុង និងតំបន់សំខាន់ៗជាច្រើន នៅក្នុងប្រទេសអ៊ុយក្រែន៕
